Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Den stamme Ephraim wort toornich, dat Gideon haer oock niet ten strijde gheroepen en had, Gideon veruolcht haestelijck Sebah ende Salmuna, ende scheyntse. Ende hy straft die van Suchot. Hy maect eenen lijfrock vanden buete oft roof. Hy sterft ende wert begrauen.

1

⁺ ENde de Mannen van Ephraim spraken tot hem:^* Waerom hebdy ons dat ghedaen, dat ghy ons niet en riept, doen ghy inden strijdt trockt teghen den Midianiten? Ende keuen sterckelijck teghen hem.

+ A vers 1

* Iudic. 12.a.1.

2

^† Maer hy seyde tot hen: Wat hebbe ick nv ghedaen, dat uwer daet ghelijck sy? En is niet een Wijnrancke Ephraims beter, dan den gheheelen Wijnoogst^* AbiEzer?

† Prou. 15.a.1.

* Iudi. 6.g.34.

3

Godt heeft de Vorsten der Midianiten, Oreb ende Seb, in uwen handen ghegheuen: Hoe hadde ick dat connen ghedoen, dat ghy ghedaen hebt? Doen hy sulcx sprack, liet haren toorne van hem af.

4

Doen nv Gideon aen de Iordane quam, ghinck hy daer ouer metten drie hondert mannen, die by hem waren, ende waren moede, ende iaechden nae.

5

⁺ Ende hi sprack totten lieden te Sucoth:^† Lieue gheeft den volcke dat onder my is, sommighe brooden, want si zijn moede, dat ick na iaghe de Coninghen der Midianiten, Sebah ende Salmuna.

+ B vers 5

† 1.Reg. 21.a.3. 25.b.8.

6

Maer de Ouerste te^† Sucoth spraken: Sijn de vuysten Sebah ende Salmuna alreede in uwen handen, dat wy uwen Heyre broot souden gheuen?

† Gen. 33.d.17. 1.Re. 10.e.27.

7

Gideon sprack: wel aen, als de HEERE Sebah ende Salmuna in mijnen handen gheeft, soo wil ic v vleesch met doornen wt der woestijnen, ende met dijstelen in stucken wrijuen.

8

Ende hy track van daer opwaerts na Pnuel, ende sprack oock also tot hen. Ende de lieden tot Pnuel antwoorden hem gelijc als die tot Sucoth.

9

Ende hy sprack oock totten lieden te Pnuel: Come ick met vreden weder, soo wil ick desen Toren in stucken breken.

10

⁺ Maer Sebah ende Salmuna wa-ren te Karkar, ende haer heyr met hen by vijfthien duysent, die alle ouer bleuen waren vanden gheheelen Heyr der gheenre vanden Oosten Lande, want hondert ende twintich duysent warender gheuallen, die sweerden wt trecken costen.

+ C vers 10

11

Ende Gideon trock opwaerts, op de strate daermen in Hutten woont teghent Oosten, nae Nobah ende Iagbeha, ende sloech dat Heyr: Want dat Heyr was seker ende sonder sorghe.

12

Ende Sebah ende Salmuna vloden. Maer hy iaechde hen nae ende vinc de twee Coninghen der Midianiten, Sebah ende Salmuna, ende^† verstoorde dat heel Heyr.

† Veruaerde.

13

Doen nv Gideon, de sone Ioas, weder quam vanden strijde, eer de Sonne op gheghaen was,

14

Vinck hy eenen Ionghelinck vanden lieden te Sucoth, ende vraechde hem. Die beschreef hem de Ouerste te Sucoth, ende haer ouders, seuenentseuentich mannen.

15

⁺ Ende hy quam totten lieden te Sucoth, ende sprac: Siet, hier is Sebah ende Salmuna, ouer welcke ghy my bespottet, ende seyt: Is dan Sebahs ende Salmunas vuyst alreede in uwen handen, dat wy uwe lieden die moede zijn, broot gheuen souden?

+ D vers 15

16

Ende hi nam de Ouders der stadt, ende doornen wt der woestijnen, ende dijstelen, ende lietet de lieden te Sucoth voelen.

17

^† Ende hy brack den thoren tot Pnuel ende doode de lieden der stadt.

† 3.Reg. 12.d.25

18

Ende hy sprack tot Sebah ende Salmuna: Wat warent voor mannen die ghy doodet te Tabor? Sy spraken: Sy waren als ghy, ende een yegelijc schoon als eens Conincx kinderen.

19

Maer hy sprack: Het zijn mijn broeders, mijnder moeder sonen gheweest. So warachtich als de Heere leeft, waert dat ghijse hadt laten leuen, so en soude ick v niet dooden.

20

⁺ Ende sprack tot sinen eerst gheboren sone Iether: Staet op, ende dootse. Maer de Ionghelinck en trock sijn sweert niet wt: Wandt hy vreesde hem, om dat hy noch een Ionghelinck was.

+ E vers 20

21

Maer Sebah ende Salmuna spraken: Staet ghy op, ende slaet ons: Want nae dat de man is, daer nae is oock zijn macht. Aldus stont Gideon op, ende doode Sebah ende Salmuna, ende nam de spanselen, die aen haerder Kemelen halsen waren.

22

Doen seyden sommighe in Israel tot Gideon: Sijt een Heer ouer ons, ghy ende v soon, ende ws soons soon, wandt ghy ons vander Midianiten handt verlost hebt.

23

Maer Gideon sprac tot hen: Ick en wil gheen Heere zijn ouer v, ende mijn soon en sal oock gheen Heer zijn ouer v: Maer de HEEre sal Heer ouer v zijn.

24

Maer Gideon seyde tot hen: Een dinck begheere ick van v,^* elck geue my de^† voorhooftsbanden die hy gherooft heeft.⁺ Want om dattet Ismaeliten waren, so hadden si gulden voorhooftsbanden.

* Exodi. 32.a.2.

† Oorringen.

+ F vers 24

25

Sy seyden: Die willen wy v gheuen. Ende si spreyden een cleet wt, ende elck

[p. 94v]

werp de voorhooftsbanden daer op, die hy gherooft hadde.

26

Ende de gulden voorhooftsbanden die hy eyschte, maecten in gewichte, duysent ende seuen hondert Sikelen gouts, sonder de spansselen ende ketenen, ende scharlaken cleederen, die der Midianiten Coningen draghen, ende sonder de halsbanden haerder kemelen.

27

Ende Gideon maecte eenen Lijfrock daer af, ende sette hem in zijnder stadt te Ophra. Ende dat gantsche Israel bedreef daer hoererije mede aldaer. Ende het wert Gideon ende sinen huyse tot argernisse.

28

⁺ Alsoo werden de Midianiten verootmoedicht voor de kinderen Israels, ende en hieuen haer hooft niet meer op. Ende dat Lant was stille veertich iaren, alsoo langhe als Gideon leefde.

+ G vers 28

29

Ende IeruBaal de sone Ioas, ginck henen, ende woonde in sinen huyse.

30

Ende Gideon hadde^† tseuentich sonen, die wt zijnder dgyen gecomen waren: Want hy hadde vele wijuen.

† 4.Re. 10.a.1.

31

Ende zijn^† Concubine die hy tot Sichem hadde, baerde hem ooc eenen sone, dien hiet hy AbiMelech.

† Bywijf.

32

Ende Gideon de sone Ioas, sterf in goeden Ouderdom, ende werdt begrauen in zijns vaders Ioas graf, tot Ophra, des Vaders der Esriten.

33

Maer doen Gideon gestoruen was, keerden hen de kinderen Israels om,^* ende bedreuen hoerderije met Baalim, ende maeckten hen BaalBerith tot eenen God.

* Num. 25.a.2.

34

Ende de kinderen Israels en gedachten niet aen den HEERE haren God, diese rontom vander hant aller haerder Vianden verlost hadde.

35

Ende en deden gheen ontfermherticheydt aenden huyse IeruBaal Gideon, soo hy alle goet by Israel ghedaen hadde.