Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Hoe Gideon de hooftman dat heyr neemt ende deylt. Ende hoe hy de Midianiten bestrijt ende verslaet.

1

⁺ DOen maecte hem^† Ierubaal, dats Gideon, vroech op, ende alle dat volck dat met hem was, ende Legherden hen aen de Fonteyne Harod. Alsoo dat hy dat Heyr der Midianiten hadde teghent Noorden achter den berch der Wachten, inde valleyen.

+ A vers 1

† Iudic. 6.f.32.

2

Maer de HEEre sprac tot Gideon: Des volcx is te vele dat met v is, dat ick Midian in hare handen soude geuen, Israel mocht hem beroemen teghen my, ende segghen: Mijn hant heeft my verlost.

3

^† Dus laet nv wt roepen voor de ooren des volcx, ende segghen: Wie bloode ende versaecht is, die keere wederom, ende make hem gheringhe vanden geberchte Gilead. Doen keerde des volcks wederom, tweentwintich duysent [mannen] alsoo datter maer thien duysent ouer en bleuen.

† Deut. 20.b.8. 1.Mac. 3.g.56

4

⁺ Ende de HEEre sprack tot Gideon: Des volcks is noch te vele, leytse neder aent water, aldaer wil ickse v proeuen. Ende van welcken ick v segghen sal, dat hy met v trecken sal, die sal met v trecken. Maer van welcken ick segghen sal, dat hy niet met v trecken en sal, die en sal niet met v trecken.

+ B vers 4

5

Ende hy leyde dat volc nederwaerts aent water. Ende de HEERE sprack tot Gideon: Wie met zijnder tongen dat water lecket, als een hont lect, dien set alleen: Desghelijcks wie op sine knien valt om te drincken.

6

Doen was dat ghetal der gheenre die daer gheleckt hadden, wt der hant totten monde, drie hondert Mannen. Dat ander volck alle, had op de knien ghedroncken.

7

Ende de HEEre sprack tot Gideon: Door de drie hondert mannen, die daer ghelect hebben, wil ick v verlossen, ende de Midianiten in uwen handen gheuen. Maer dat ander volck, laet altemael tot zijnder plaetsen gaen.

8

⁺ Ende si namen Prouande voor dat volc met hen, ende hare basuynen. Maer de ander Israeliten, liet hy alle gaen, eenen ye-ghelijcken in zijn Hutte. Maer hy stercte hem met drie hondert mannen. Ende dat Heyr der Midianiten, lach daer onder voor hem inder Valleyen.

+ C vers 8

9

Ende de HEERE sprack inder seluer nacht tot hem: Staet op, ende gaet henen af int Leger, want ick hebt in uwen handen gegeuen.

10

Maer vreesdy af te gaen, so laet uwen Iongen Pura, met v af gaen int Leger,

11

Dat ghy hoort wat sy segghen. Daer na suldy metter macht af trecken totten Leger. Doen ginc Gideon met sinen Iongen Pura af, aende plaetse der Schiltwachters, die int Legher waren.

12

Ende de Midianiten ende Amalekiten, ende alle die vanden Oosten lande, hadden hen neder gheleyt in de Valleye, als eenen hoop Sprinchanen, ende haer kemelen waren ontellijck, om der Menichten wille, ghelijc als dat sant aenden Oeuer der zee.

13

⁺ Doen nv Gideon quam, Siet, doen vertelde deen den anderen, eenen droom, ende sprack: Siet, my heeft eenen droom ghedroomt. My dochte dat een geroostet gersten broot, wentelde hem totten Heyr der Midianiten: Ende doent aen de Tente quam, soo sloecht die selue ende werpse neder, ende keerdense omme, dat dat onderste bouen quam, dat de Tente lach.

+ D vers 13

14

Doen antwoorde dander: Dat en is niet anders, dan dat Sweert Gideons, des Soons Ioas des Israeliten. Godt heeft de Midianiten in sine handen ghegheuen, met alle den Heyre.

15

⁺ Doen Gideon dien hoorde sulcken droom vertellen, ende zijn wtlegginghe, aenbadt hy, ende quam weder int Heyr, Israels, ende sprac:^† Maect v op. Want de HEEre heeft dat heyr der Midianiten in uwen handen ghegheuen.

+ E vers 15

† Iosu. 2.d.24.

16

Ende hy^* deylde de drie hondert mannen in drie hoopen, ende ghaf elcken een basuyne in zijn hant, ende ledighe cruycken, ende Lampen daer in,

* 1.Re. 11.c.11.

17

^† Ende seyde tot hen: Siet op my, ende doet oock also. Ende siet, als ick aen de plaetse des Heyrs come, so ick doe, soo doet ghy oock.

† Iudi. 9.g.48.

18

Als ick de basuyne blase, ende alle die met my zijn, soo sult ghy ooc de basuyne blasen, om tgheheele heyr, ende segghen: Hier de HEEre ende Gideon.

19

Alsoo quam Gideon, ende de hondert mannen met hem, aende plaetse des Heyrs, aende eerste wachters, die daer verordineert waren, ende wectense op, ende bliesen met Basuynen, ende sloegen de cruycken in haren handen in stucken.

20

⁺ Alsoo bliesen alle de drie Hoopen met Basuynen, ende braken de Cruycken. Maer sy hielden de Lampen in haer slincker hant, ende de Basuynen in haer rechter hant, dat sy bliesen ende riepen: Hier dat Sweert des HEEren ende Gideon.

+ F vers 20

21

Ende elck stont op zijn plaetse rontsom dat Heyr.^† Doen werdt alle dat Heyr loopende, ende riepen, ende vloden.

† 1.Re. 14.c.16. 17.g.52.

22

Ende doen de drie hondert mannen de Basuynen bliesen, beschickte de HEEre,^* dat in alle het Heyr, eens yeghelijcx Sweert teghen den anderen was.⁺ Ende

* 2.Pa. 20.d.22. 1.Re. 14.c.20.

+ G vers 22

[p. 94r]

dat Heyr vluchte tot Bethsita Sereratha toe, tot aen de Palen der breyden Meholah, by Tabath.

23

Ende de mannen Israels van Naphtali, van Asser, ende van alle Manasse, riepen, ende iaechden den Midianiten nae.

24

Ende Gideon seynde boden op alle dat gheberchte Ephraim, ende dede segghen: Coemt af, den Midianiten teghen, ende onderloopt hen dat water tot BethBara, ende de Iordane. Doen riepen alle die van Ephraim waren, ende si onderliepen hen dat water tot BethBara ende de Iordane,

25

Ende vinghen twee Vorsten der Midianiten, Oreb, ende Seb, ende dooden Oreb opten steen Oreb: Ende Seb, inder Persen Seb, ende iaechden de Midianiten, ende brachten de Hoofden Oreb ende Seb tot Gideon ouer de Iordane.