Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Godt de HEERE gheeftse om haerder sonden wille inde handen der Midianiten, ende als si hem aenroepen, soo seynt hy haer Gideon eenen verlosser.

1

⁺ ENde doen de kinderen Israels^† quaet deden voor den HEERE, gafse de HEERE onder de handt der Midianiten, seuen Iaer. Ende doen der Midianiten handt te sterck werdt, ouer Israel,

+ A vers 1

† Iudic. 2.b.11. 3.a.7.b.12. 4.a.1. 13.a.1.

2

Maecten de kinderen Israels voor hen holen inden gheberchten, ende speluncken, ende vesten.

3

Ende als Israel yet saeyde, soo quamen de Midianiten ende Amalekiten, ende die wten Oosten Lande, opwaerts ouer hen,

4

Ende belegerdense, ende verdoruen de vrucht opten Lande, tot Gasa toe. Ende en lieten niet ouerblijuen van Lijftocht in Israel, noch Schapen, noch Ossen, noch Ezelen.

5

Wandt si quamen daer op met haren Vee ende Hutten, ghelijck als eenen grooten hoop Sprinchanen. Also dat noch si, noch hare Kemelen, te tellen en waren, ende vielen int Lant, dat zijt verdoruen.

6

Aldus werdt Israel seer neder voor de Midianiten. Doen riepen de kinderen Israels totten HEERE.

7

⁺ Maer als si totten HEERE riepen,

+ B vers 7

[p. 93r]

om der Midianiten wil,

8

Seynde de HEERE eenen Propheet tot hen, die sprack tot hen: Dus seyt de HEERE de Godt Israels:^† Ick heb v wt Egypten gheleyt, ende wt den diensthuyse ghebracht.^* Ende ick heb v verlost vander Egyptenaers hant,

† Exodi. 13.g.51

* Exod. 14.f.30

9

Ende van alder hant die v drongen, ende hebse voor v wtghestooten, ende haer lant v ghegeuen,

10

Ende sprack tot v: Ick ben de HEERE uwe Godt,^‡ en vreest der Amoriten Goden niet, inder welcker Lant ghy woont, ende ghy en hebt mijnder stemmen gheen ghehoor ghegheuen.

‡ 4.Re. 17.g.35

11

Ende een Engel des HEEREN, quam ende sadt onder een eycke te Ophra, die behoorde Ioas den Vader der Esriten toe, ende zijn soon Gideon dorschte de terwe inder Persen, op dat hy vluchten soude voor de Midianiten.

12

Doe openbaerde hem de Engel des HEEREN, ende sprack tot hem: De HEEre met v, ghy strijdtbaer Heldt.

13

⁺ Maer Gideon sprack tot hem: Mijn Heere, is de HEERE met ons, waerom is ons dan dit al geschiet? Ende waer zijn alle sine wonderlijckheden die ons onse vaderen vertelden? Ende spraken: De HEERE heeft ons wt Egypten gheleyt. Maer nv heeft ons de HEEre verlaten, ende onder de Midianiten handen ghegheuen.

+ C vers 13

14

Maer de HEERE keerde hem tot hem ende sprack:^† Gaet henen in dese uwe cracht. Ghy sult Israel verlossen wt der Midianiten handen. Siet, ic heb v ghesonden.

† 1.Reg. 12.b.11

15

Maer hi sprac tot hem:^† Mijn HEERE, waer mede sal ic Israel verlossen? Siet,^* mijn maechschap is dat minste in Manasse, ende ic ben de cleynste in mijns vaders huys. Maer de HEERE sprack tot hem:

† Exodi. 3.b.11.

* 1.Regum. 9.c.21

16

Ick wil met v zijn, alsoo dat ghy de Midianiten slaen sult, als eenen eenighen man.

17

⁺ Maer hy sprack tot hem: Lieue, heb ick ghenade voor v vonden, soo gheeft my een teeken, dat ghijt zijt, die met my spreeckt.

+ D vers 17

18

En wijckt niet van hier, tot dat ick weder tot v come, ende brenghe mijn Spijsoffer, dat ick voor v sette. Hy sprack: Ick wil hier blijuen, tot dat ghy weder coemt.

19

Ende Gideon quam, ende bereyde een Bocxken, ende een Epha onghesuert meels, ende leyde vleesch in eenen korf, ende dede dat vleesch nat in eenen pot, ende brachtet tot hem daer wt onder de Eycke,

20

Ende tradter toe. Maer de Enghel Gods sprack tot hem:^† Neemt dat vleesch, ende dat onghesuerde, ende settet opten steen die hier is, ende ghiet dat vleeschnat wt. Ende hy dede alsoo.

† Iudi. 13.d.19.

21

Doen stack de Enghel des HEEren den stock wt, die hy inde hant hadde, ende ruerde metten wtersten dat vleesch, ende dat ongesuerde meel aen,^* ende dat vier voer wt den steen, ende verteerde dat vleesch, ende onghesuerde meel. Ende de Enghel des HEEREN verdwijnde wt sinen ooghen.

* Gene. 15.c.17. 3.Reg. 18.e.38

22

⁺ Doen nv Gideon sach, dattet een Engel des HEEren was, soo sprack hy: O HEEre HEEre,^* heb ick alsoo eenen Engel des HEEren van aengesichte gesien?

+ G vers 22

* Exo. 33.d.20.

23

Maer de HEEre sprac tot hem: Vrede si met v, En vreest niet,^† ghy en sult niet steruen.

† Iudi. 13.d.22.

24

Doen^* boude Gideon aldaer den HEEre eenen Altaer, ende hiet dien: De HEERE des vreedts. Die staet noch tot opten dach van heden tot Ophra des Vaders der Esriten.

* Maeckte.

25

Ende inder seluer nacht sprac de HEERE tot hem: Neemt eenen Os van de Ossen, die uwen Vader toebehooren, ende eenen anderen Os die seueniarich is, ende breeckt den Altaer Baal, die uwen vader toebehoort, ende hout die Haghe af, die daer by staet,

26

Ende bouwet den HEERE uwen Gode, bouen opter hoochten des^* steens eenen Altaer, ende maect dien toe. Ende neemt den anderen Osse, ende offert eenen Brantoffer metten houte der Haghen, die ghy af gehouwen hebt.

* Iudic. 6.d.21.

27

Doen nam Gideon thien mannen wt zijne knechten, ende dede also hem de HEERE geseyt hadde. Maer hi vreesde hem dat te doen inden daghe voor zijns vaders huys, ende de lieden inder stadt, ende hy deet by nachte.

28

⁺ Doe nv de lieden inder stadt smorgens vroech op stonden, Siet, doen was den Altaer Baal gebroken, ende de Hage daer by af gehouwen, ende den anderen Osse eenen Brantoffer opten Altaer die ghebouwet was.

+ F vers 28

29

Ende deen sprac totten anderen: Wie heeft dat ghedaen? Ende doen si sochten, ende daer na vraechden, so wert geseyt: Gideon de sone Ioas heeft dat ghedaen. Doen spraken de lieden der stadt tot Ioas:

30

Gheeft uwen soon herwaerts, hy moet steruen, om dat hy den Altaer Baal ghebroken heeft, ende de Haghe daer by af ghehouwen heeft.

31

Maer Ioas sprack tot alle die by hem stonden: Wilt ghi om Baal kijuen? Wilt ghy hem helpen? Wie om hem kijft, die sal desen morghen steruen. Is hy Godt, soo rechte hy voor hem seluen, dat zijnen Altaer ghebroken is.

32

Van dien daghe aen hietmen hem^* IerubBaal, ende sprack: Baal rechte voor hem seluen, dat zijnen Altaer ghebroken is.

* Iudic. 7.a.1.

33

⁺ Doen nv de Midianiten, ende Amalekiten, ende die wten Oosten lande, hen te hoope vergadert hadden, ende trockender door, ende Legerden hen inder leechten Iesrael,

+ G vers 33

34

Track de geest des HEEren Gideon aen.^† Ende hy dede de Basuyne blasen, ende riep^* AbiEzer, dat sy hem volghen souden.

† Num. 10.a.7. Iudic. 3.d.27.

* Iudic. 8.a.2.

35

Ende seynde bootschappen in alle Manasse, ende riepse aen, dat si hem oock na souden volgen. Hy seynde ooc bootschap tot Asser, ende Sebulon, ende Naphtali, die quamen op, hem te ghemoete.

36

Ende Gideon sprack tot God: Wildy Israel door mijn hant verlossen, soo ghy ghesproken hebt,

37

Soo wil ick een vel

[p. 93v]

metter wollen inden Hof leggen, ist dat den dauwe alleen sy op dat vel, ende op alle de Aerde drooghe, so wil ic mercken dat ghy Israel verlossen sult door mijne hant, soo ghy ghesproken hebt.

38

Ende het gheschiede alsoo. Ende toen hy des anderen morgens vroech op stont, soo wranck hy den dau wt vanden velle, ende veruulde een gantsche schale vol vanden water.

39

Ende Gideon sprack tot God:^† Vwe gramschap en verbolghe niet op my, dat ick noch eens spreke. Ick wil slechs noch eens proeuen metten velle. Het sy alleen op dat vel drooghe, ende dauwe op alle de Aerde.

† Gene. 18.e.30.

40

Ende Godt dede also den seluen nacht, dattet alleen opt vel drooch was, ende dauwe op de gheheele Aerde.