Den Bibel, Inhoudende dat Oude ende Nieuwe Testament (Biestkensbijbel)

[p. 92r]

¶ Dat .iiij. Capittel.

¶ Debora de Prophetersse met Barack verwint Sisseram, ende verlost dat volck des HEEREN.

1

⁺ MAer de kinderen Israels^* deden voorts quaet voor den HEEre, doen Ehud ghestoruen was.

+ A vers 1

* Iudic. 2.b.11. 3.a.7.

2

Ende de HEERE^† vercochtse in de hant Iabin, des Conincx der Cananiten, die te Hazor regeerde. Ende zijn velthooftman was Sissera, ende hy woonde tot Haroseth der Heydenen.

† 1.Reg. 12.b.9.

3

Ende de kinderen Israels riepen totten HEERE. Want hy had neghen hondert ijseren waghens, ende dwanck de kinderen Israels met ghewelt twintich iaer lanck.

4

Tot dier seluer tijt was een Rechtersse in Israel, de Prophetersse Debora, een huysvrouwe des Lapidoths.

5

Ende si woonde onder den Palmboom Debora, tusschen Rama ende BethEl, opt geberchte Ephraim: Ende de kinderen Israels quamen tot haer opwaerts, voor tgherechte.

6

De selue seynde henen,^* ende liet roepen Barack, den sone AbiNoam, van Kedes Naphtali, ende dede hem seggen: En heeft v de HEERE, de Godt Israels niet gheboden: Gaet henen, ende trect opten Berch Thabor, ende neemt thien duysent mannen met v, vanden kinderen Naphtali ende Sebulon?

* Iudic. 5.b.12.

7

Want ick wil Sissera den velthooftman Iabin, tot v voorbrenghen, aen dat water Kison, met zijnen waghens, ende met zijnder Menichte, ende wil hem in uwen handen gheuen.

8

Barack sprack tot haer: Ist dat ghy met my treckt, soo wil ick henen trecken: Maer en treckt ghy met my niet, soo en wil ick niet henen trecken. Sy sprack:

9

⁺ Ic wil met v trecken, maer den prijs en sal v niet zijn op dese reyse, die ghy doet, maer de HEERE sal Sissera in eens wijfs handt ouergheuen. Aldus maeckte haer Debora op, ende trock met Barack nae Kedes.

+ B vers 9

10

Doen riep Barack Sebulon ende Naphtali tot hem na Kedes, ende trock te voete met thien duysent mannen. Debora reysde oock met hem.

11

Maer Heber de Keniter, was vanden Keniten, vanden kinderen^* Hobab Mose swager getrocken, ende hadde zijne Hutten opgheslaghen, by de Eycke Saanaim, neffens Kedes.

* Num. 10.d.29 Iudic. 1.d.16.

12

Doen wert Sissera geseyt, dat Barac de soone AbiNoam, opten Berch Thabor ghetrocken ware.

13

Ende hy vergaderde alle sine wagenen te hoop, neghen hondert ijseren waghens, ende alle dat volc dat met hem was, van Harozeth der Heydenen, aen dat water Kison.

14

Maer Debora sprac tot Barack: Op, dit is den dach, in welcken v de HEERE Sissera, in uwen handen heeft gegheuen. Wandt de HEERE sal voor v wt reysen. Aldus trock Barack vanden berghe Thabor neder, ende die thien duysent mannen met hem.

15

^+† Maer de HEERE verschrickte den Sissera, met alle zijne waghens ende gantsche heyr voor de scherpte des Sweerts Barack. Alsoo dat Sissera van sinen waghen spranck, ende vluchte te voete.

+ C vers 15

† 1.Reg. 14.c.15 Iosue. 10.b.10

16

Maer Barack iaechde de waghens ende dat heyr na, tot Harozeth der Heydenen toe. Ende alle dat heyr Sissera viel voor de scherpten des sweerts, alsoo datter niet een ouer en bleef.

17

Maer Sissera vluchte te voet inde Hutte Iael, des wijfs Heber des Keniters. Want de Coninck Iabin tot Hazor, ende dat huys Heber des Keniters, stonden met malcanderen in goeden vrede.

18

Maer Iael ghinck wt Sissera te gemoete, ende seyde tot hem: Wijckt mijn HEERE, wijckt tot my in, ende en vreest v niet. Ende hy weeck tot haer in, in haer Hutte, ende si decte hem met eenen mantel.

19

Maer hy sprack tot haer:^† Lieue, gheeft my een weynich waters te drincken, want my dorstet. Doen dede sy eenen melckpot open, ende gaf hem te drincken ende deckte hem weder toe.

† 3.Re. 17.b.10. Iudic. 5.d.25.

20

Ende hy sprack tot haer: Tredet inder Hutten duere, ende als yemandt coemt, ende vraecht, oft yemandt hier sy, soo segt: Niemandt.

21

^+* Doen nam Iael dat Wijf Heber eenen nagel vander Hutten, ende eenen hamer in haer hant, ende ghinc lijfelijck tot hem in, ende sloech hem den nagel door tslaep [van sinen hoofde] also dat hy ter Aerden sanck. Maer hy ontsluymerde, wert amachtich ende sterf.

+ D vers 21

* Iudic. 9.c.14. 13.a.8.

22

Maer doen Barac Sissera na iaechde, ghinc hem Iael te ghemoet daer wt, ende sprack tot hem: Coemt herwaerts, ick wil v den Man thoonen dien ghy soect. Ende doen hy tot haer in quam, lach Sissera daer doot, ende den naghel stack in zijnen slaep.

23

Also vernederde Godt op die tijt Iabin der Cananiten Coninck, voor den kinderen Israels.

24

Ende de handt der kinderen Israels voer voort ende wert sterck teghen Iabin der Cananiten Coninck, tot dat si hem wtroeyden.

25

Doen sanck Debora ende Barack de sone AbiNoam in die tijt, ende seyden: