Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Daerom straft haer de Engel Gods in Gilgal. De kinderen Israels vertoornden den Heere, ende dienden Baal, daerom lietse Godt inder gheuanckenisse onder de Heydenen comen.

1

⁺ MAer daer quam de Enghel des HEEREN opwaerts van Gilgal tot Bochim, ende sprack: Ick heb v wt Egipten opwaerts gheleyt, ende in dat lant ghebracht, dat ick uwen Vaderen ghesworen heb, ende sprack:^* Ick en wilde mijn verbont met v niet achter laten inder eewicheydt,

+ A vers 1

* Deut. 7.a.2. 12.a.2.

2

Op dat ghy gheen verbont metten Inwoonders des lants en sout maken, ende hare Altaren sout breken. Maer ghy en hebt mijnder stemmen geen ghehoor gegeuen. Waerom hebt ghy dat gedaen?

3

Doen sprac ick ooc: Ic en wilse niet verdrijuen voor v, op dat si v tot eenen stricke worden, ende hare goden tot eenen nette.

4

Ende doen de Engel des HEEren sulcke woorden gesproken hadde, tot allen kinderen Israels, hief dat volck sine stemme op, ende weende,

5

Ende hieten de plaetse Bochim, ende offerden aldaer den HEERE.

6

Want als Iosua dat volck van hem ghelaten hadde, ende de kinderen Israels wech ghetrocken waren, elck in zijn erfdeel, om dat Landt in te nemen,

7

^* So diende dat volck den HEEre, alsoo langhe, als Iosua leefde, ende de Ouders die langhe na Iosua leefden, ende alle de groote wercken des HEEREN ghesien hadden, die hy Israel ghedaen hadde.

* Iosue. 24.f.31

8

⁺ Doen nv^† Iosua de sone Nun gestoruen was, de knecht des HEEren, doen hy hondert ende thien Iaren out was,

+ B vers 8

† Iosu. 24.f.29

9

Begroeuen si hem in de palen zijns erfdeels tot Thimnath Heres, opt gheberchte Ephraim, van noortwaerts, aen dat gheberchte Gaas.

10

Doen oock alle die tot dier tijt geleeft hadden tot haren vaderen vergadert werden, doen quam nae hem een ander gheslachte op, dat den HEEre niet en kende, noch de wercken die hy aen Israel ghedaen hadde.

11

^† Doen deden de kinderen Israels quaet voor den HEEre. ende dienden Baalim,

† Iudic. 3.a.7. 4.a.1. 6.a.1.

12

⁺ Ende verlieten den HEERE, haerder vaderen Godt diese wt den lande Egypti gheleyt hadde, ende volchden andere goden nae. Oock de Goden der volcken, die ronts om hen woonden, ende aenbadense, ende vertoornden den HEEre.

+ C vers 12

13

Wandt si verlieten den HEERE, al meer ende meer, ende dienden Baal, ende Astharoth.

14

Aldus verbolch de gramschap des HEEREN ouer Israel, ende gafse inde hant der gheender diese beroofden, dat sise souden beroouen, ende vercochtse inden handen haerder Vianden rontom. Ende si en conden haer Vianden niet meer wederstaen.

15

Maer werwaerts dat si henen wilden,^* daer was de handt des HEEREN teghen hen, tot ongeluck, so hen de HEERE gheseyt ende ghesworen hadde, ende werden herdelijc ghedrongen.

* Deut. 2.c.14.

16

Als dan de HEERE, rechters verwecte, diese wten Roouers handen holpen,

17

Soo en gauen si den rechteren oock gheen ghehoor: Maer si bedreuen Hoererije met ander Goden, ende aenbadense, ende weken haest vanden weghe, daer hare vaderen opgegaen hadden, des HEEREN gheboden ghehoorsaem te zijne, ende en deden niet als de selue.

18

Maer als de HEERE hen Rechters verweckte, soo was de HEERE metten Rechter, ende halp hen wt haerder Vianden hant, soo langhe als de Rechter leefde.^* Want haer wee clagen, ouer de ghene diese dwonghen ende drongen, iammerde den HEERE.

* Exo. 2.d.25.

19

^+† Maer als de Rechter sterf, so keerden sy hen, ende verdoruent noch meer, dan haer vaders, dat si andere Goden volchden, hen te dienen ende te aenbeden, si en lieten van haren voornemen niet af, noch van haren hertneckigen wesen.

+ D vers 19

† Iudic. 3.b.12.

20

Daerom vergramde de verbolghentheyt des HEEren ouer Israel also, dat hy sprack: De wijle dit volck mijn verbont ouertreden heeft, dat ick haren Vaderen geboden hebbe, ende en gheuen mijn stemme gheen gehoor,

21

Soo en wil ick ooc voort aen de Heydenen niet verdrijuen, die Iosua heeft laten blijuen doen hy sterf.

22

^* Dat ick Israel aen hen^† proeue, oft si op den wech des HEEren blijuen, dat si daer in wandelen, so haer Vaders daer in gebleuen zijn oft niet.

* Deut. 8.a.2. 13.a.3. Iudic. 3.a.3.

† 2.par. 32.f.31.

23

Aldus so liet de HEEre dese Heydenen blijuen, dat hyse niet haest en verdreef, die hy in de handen Iosua niet en hadde gegeuen.