Den Bibel, Inhoudende dat Oude ende Nieuwe Testament (Biestkensbijbel)

[p. 90v]

Iudicum, Dat Boeck der Rechteren.

¶ Dat eerste Capittel.

¶ Iudas wert een Ouerste ende leytsman des volcx, ende hy brengt onder hem de Cananiten ende wint Ierusalem. Ende de Israelijten en roeyden de Cananiten niet wt, ghelijc als haer Godt gheboden hadde.

1

⁺ NA den doot Iosua,^† vraechden de kinderen Israels den HEERE, ende spraken: Wie sal onder ons dat oorloge voeren, tegen de Cananiten?

+ A vers 1

† Iudic. 18.b.5. 20.d.27. 1.Reg. 30.b.8. 3.Reg. 22.a.6.

2

De HEERE sprack: Iuda salt voeren,^* Siet ick heb dat lant in sine hant ghegheuen.

* Iosue. 23.a.4

3

Doen sprack Iuda tot sinen Broeder Simeon:^† Treckt met my opwaerts in mijn Lot, ende laet ons teghen de Cananiten strijden, soo wil ick weder met v trecken in v Lot. Aldus troc Simeon met hem.

† Prou. 18.c.24

4

Doen nv Iuda opwaerts trock, gaf hem de HEERE de Cananiten, ende Pheresiten in haren handen, ende si sloeghen tot Besek, thien duysent mannen.

5

Ende vonden AdoniBesek tot Besek, ende streden teghen hem: Ende sloeghen de Cananiten, ende Pheresiten.

6

Maer AdoniBesek vluchte, ende sy iaechden hem na. Ende doen si hem grepen, hieuwen si hem de duymen aen zijn handen, ende voeten af.

7

⁺ Doen sprack AdoniBesek: Tseuentich Coninghen met afghehouwen duymen haerder handen ende voeten, lasen onder mijne Tafelen de Cruymen op.^* Ghelijc als ick nv ghedaen hebbe, soo heeft my God weder vergouden. Ende men bracht hem te Ierusalem, aldaer sterf hy.

+ B vers 7

* Leui. 24.d.19 Iudi. 15.c.11.

8

Maer de kinderen Iuda streden tegen Ierusalem, ende wonnense,^† ende sloeghense metter scherpten des Sweerts, ende stoocten de stadt aen.

† Deut. 20.c.16.

9

Daer nae trocken de kinderen Iuda neder, om teghen de Cananiten te strijden, die opt gheberchte, ende tegent Suyden, ende inden Leechten woonden.

10

⁺ Ende Iuda trock henen tegen de Cananiten, die tot Hebron woonden^* (maer Hebron hiet voortijts KiriahArba,) ende sloeghen Sesai, ende Ahiman, ende Thalmai.

+ C vers 10

* Iosue. 15.d.13.

11

Ende trock van daer teghen de Inwoonders tot Debir (maer Debir hiet voortijts KyriathSepher.)

12

^† Ende Caleb sprack: Wie KyriathSepher slaet, ende wint, dien wil ick mijne dochter Achsa tot eenen Wijue gheuen.

† Iosue. 15.d.16 1.Par. 12.a.6. 1.Reg. 17.c.25

13

Doen wanse Athniel, de sone Kenas Calebs Ioncste broeder. Ende hy gaf hem zijn dochter Achsa tot eenen Wijue.

14

Ende het gheuiel, doen sy tot hem in trock, wert haer gheraden, dat sy eenen Acker van haren vader bidden soude: Ende sy viel vanden Ezel. Doen sprack Caleb tot haer: Wat is v?

15

Sy sprack: Gheeft my een segheninghe. Want ghy hebt my een^† Suyden landt ghegheuen, gheeft my oock een waterachtich Lant. Doen gaf hi haer een waterachtich lant bouen ende beneden.

† Middachs.

16

⁺ Ende de kinderen des Keniters Moses swaghers, trocken opwaerts wter^* Palmenstadt, metten kinderen Iuda, in de woestijne Iuda, die tegen Tzuyden leyt der stadt Arad,^† ende ghinghen henen, ende woonden onder dat volck.

+ D vers 16

* Deut. 34.a.3.

† Num. 10.d.30 1.Reg. 15.b.6.

17

Ende Iuda trock henen met Simeon sinen Broeder, ende si sloeghen de Cananiten tot Sephat, ende verbandense,^* ende hieten de stadt, Harina.

* Num. 21.a.3.

18

Daer toe wan Iuda Gasa, met haren toebehoorten, ende Asklon, met haren toebehoorten,^† ende Ekron met haerder toebehoorten.

† Iosue. 15.f.45

19

Ende de HEERE was met Iuda, also dat hy dat geberchte in nam. Want hy en coste de Inwoonders inde Leechte niet inghenemen, om dat si ijseren wagens hadden.

20

^* Ende si gauen Caleb Hebron, soo Mose gheseyt hadde. Ende hy verdreef daer wt, de drie soonen des Enak.

* Iosu. 15.d.14

21

^† Maer de kinderen BenIamin, en verdreuen de Iebusiten niet, die tot Ierusalem woonden. Maer de Iebusiten woonden byde kinderen BenIamin tot Ierusalem, tot desen daghe toe.

† Iosue. 15.g.63

22

⁺ Des ghelijcx trocken de kinderen Iosephs oock opwaerts na^* BethEl, ende de HEERE was met hen.

+ E vers 22

* Iosue. 16.a.1.

23

Ende dat huys Iosephs bespiede BethEl (die te voren Lus hiet)

24

Ende de wachters saghen eenen man wt der stadt gaen, ende spraken tot hem: Wijst ons, waer wy in de stadt comen,^* soo willen wy ontfermherticheyt aen v doen.

* Iosue. 2.c.12.

25

Ende doen hijt hen wijsde, waer si in de stadt souden comen, sloegen si de stadt metter scherpten des Sweerts. Maer dien man ende alle zijn gheslachte lieten si gaen.

26

Doen trock de selue man int lant der Hethiten, ende timmerde een stadt, ende hietse Lus: Die heet noch huyden sdaechs alsoo.

27

Ende Manasse en^† verdreef BethSeam met haren^* dochteren niet, noch Thaenach, met haren dochteren, noch de Inwoonders tot Dor, met haren dochteren, Noch de Inwoonders tot Megiddo, met haren dochteren. Ende de Cananiten begosten te woonen inden seluen Lande.

† Num. 33.g.55

* Dochteren, heeten hier cleyne steden ende dorpen.

28

⁺ Maer doen Israel sterck wert, maecte hy de Cananiten Chijnsbaer, ende en verdreefse niet.

+ F vers 28

[p. 91r]

29

^* Des ghelijcx soo en verdreef oock Ephraim de Cananiten niet, die te Gaser woonden: Maer de Cananiten woonden onder hen te Gaser.

* Iosue. 16.b.10

30

Sebulon en verdreef ooc de Inwoonders tot Kitron ende Naholol niet: Maer de Cananiten woonden onder hen, ende waren Chijnsbaer.

31

Asser en verdreef de Inwoonders tot Aco niet, noch de Inwoonders tot Sidon, tot Ahelab, tot Achsib, tot Helba, tot Aphik, ende tot Rehob.

32

Maer de Asseriten woonden onder de Cananiten, die inden Lande woonden, wandt sy en verdreuense niet.

33

Naphtali en verdreef de Inwoonders tot BethSemes niet, noch tot BetAnath: Maer woonden onder de Cananiten, die inden Lande woonden. Maer die tot BethSemes ende tot BethAnath worden Chijnsbaer.

34

Ende de Amoriten dronghen de kinderen Dan opt gheberchte, ende en lieten niet toe, datse onder inden Leechten quamen.

35

Ende de Amoriten begosten te woonen opt gheberchte Heres, tot Aialon, ende tot Saalbim. Nochtans so wert hem de hant des huys Iosephs te swaer, ende worden Chijnsbaer.

36

Ende de Pale der Amoriten was, daermen na Akrabim opwaerts gaet, ende vanden steen, ende vander hoochten.