Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Hy roept dat volck te samen tot Sichem, ende vertelt haer de weldaden Godts. Ende het verbont werdt met Godt vernieut, Iosua sterft ende Eleazar.

1

⁺ IOsua vergaderde alle de Stammen Israels tot Sichem, ende riep de Ouders van Israel, de Hoofden, Rechters ende Officiers. Ende doen si voor Gode ghetreden waren,

+ A vers 1

2

Sprack hy tot alle den volcke: Dus seyt de HEERE, de Godt Israels:^† Vwe Vaderen woonden voortijts ouer ghene zijde des waters, Tharah, Abrahams ende Nahors Vader, ende dienden anderen Goden.

† Gene. 11.d.27

3

^† Doen nam ick uwen Vader Abraham op gene zijde des waters, ende liet hem wandelen in alle den lande Canaan, ende vermeerde hem sine saet,

† Genes. 12.a.1.

4

Ende gaf hem^* Isaac. Ende Isaac gaf ick Iacob ende Esau. Ende ick gaf Esau dat gheberchte Seir te besitten. Maer Iacob ende sine kinderen, trocken neder in Egipten.

* Genes. 21.a.2. 25.c.23. 32.a.1. 46.a.1.

5

^+† Doen seynde ic Mose ende Aaron,^* ende plaechde Egipten, ghelijck ick dan onder hen ghedaen heb. Daer nae leyde ick v,

+ B vers 5

† Exodi. 3.b.10.

* Exod. 7. 8. 9 10. 11. 14.

6

Ende uwe vaders wt Egipten. Ende doen ghy aen de See quaemt,^† ende de Egiptenaers uwen Vaderen na iaechden, met waghenen ende Ruyteren tot aen de roode See,

† Exod. 14.c.9.

7

Doen riepen si totten HEEre: Die sette een duysternisse tusscen v, ende den Egiptenaren, ende leyde de zee ouer hen, ende bedectese. Ende uwe ooghen hebben ghesien, wat ick in Egipten gedaen hebbe. Ende ghy hebt eenen langen tijt inder woestijnen ghewoont.

8

^† Ende ick heb v ghebracht in dat Landt der Amoriten, die op ghene zijde der Iordanen woonden.^* Ende doen sy teghen v streden, gaf ickse in uwen handen, dat ghy haer Lant besaet, ende vernieldese voor v.

† Nu. 21.d.24.

* Deut. 2.f.31. 29.b.7.

9

Doen maecte hem^† Balak op, de sone Siphor, der Moabiten Coninck, ende street teghen Israel.^‡ Ende hy seynde henen, ende dede Bileam den soon Beor halen, dat hy v veruloecken soude.

† Num. 22.a.1.

‡ Deut. 23.a.4.

10

Maer ick en wilde hem niet hooren. Ende hy seghende v, ende ick verloste v, wt sinen handen.

11

⁺ Ende doen ghy ouer de Iordane ghinct, ende tot Ieriho quaemt,^* streden teghen v de borghers van Ieriho, de Amoriten, Pheresiten, Cananiten, Hethiten, Girgositen, Heuiten ende Iebusiten. Maer ick gafse in uwen handen.

+ C vers 11

* Iosue. 6.a.1.

12

^† Ende seynde Horsselen voor v henen, die dreuense wt, voor v henen, die twee Coninghen der Amoriten, Niet door uwe sweert, noch door uwen boge.

† Exod. 23.d.28. 33.a.2. Deut. 7.d.20.

13

Ende heb v een Landt^* ghegheuen, daer ghy niet aen ghearbeyt en hebt, ende steden die ghy niet ghetimmert en hebt, dat ghy daer in sout woonen, ende eten vanden Wijnberghen ende Olijfberghen, die ghy niet gheplant en hebt.

* Deut. 6.b.10.

14

^* So vreeset nv den HEERE, ende dient hem ghetrouwelijck ende oprechtelijck, ende laet de Goden varen, den welcken uwe Vaders gedient hebben, ouer ghene zijde des waters, ende in Egipten, ende dient den HEERE.

* 1.Reg. 7.a.7. Tobie. 14.c.11

15

⁺ Maer en behaghet v niet, dat ghy den HEERE dient, soo verkiest v heden wien ghy dienen wilt, den Gode, dien uwe Vaders gedient hebben, ouer ghene sijde des waters: Oft den Goden der Amoriten, inder welcker landt ghy woont. Maer ick, ende mijn huys, willen den HEERE dienen.

+ D vers 15

16

Doen antwoorde dat volck, ende sprack: Dat sy verre van ons, dat wy den HEERE souden verlaten, ende

[p. 90r]

anderen goden dienen.

17

Wandt de HEERE onse Godt heeft ons, ende onse vaders, wt den Lande Egipti gheleyt, wt den diensthuyse. Ende heeft voor onsen oogen sulcke groote teekenen ghedaen, ende ons bewaert op alle den weghe, die wy ghereyst zijn, ende onder allen volcken, door welcken wy ghegaen zijn,

18

Ende heeft wtghestooten voor ons henen, alle volcken der Amoriten, die inden Lande woonen. Daerom willen wy oock den HEERE dienen: Want hy is onse Godt.

19

⁺ Iosua sprack totten volcke: Ghy en condt den HEERE niet ghedienen. Wandt hy is een heylighe ende stercke Godt, ende een^† ijuerich Godt, die uwe ouertredinge ende sonden niet verschoonen en sal.

+ E vers 19

† Ieloers.

20

^* Maer als ghy den HEERE verlaet, ende eenen vreemden Godt dient, soo sal hy hem omkeeren, ende v plagen, ende v te niete doen, nae dien hy v goet ghedaen heeft.

* Iosue. 23.c.15.

21

Maer dat volck sprack tot Iosua: Alsoo niet: Maer wy willen den HEERE dienen.

22

Doen sprac Iosua totten volcke: Ghy zijt ghetuyghen ouer v, dat ghy den HEERE vercoren hebt, dat ghy hem dient. Ende si seyden: Ia.

23

Soo doet nv van v wech de vreemde goden, die onder v zijn, ende neyghet uwe herten totten HEERE den Godt Israels.

24

Ende dat volck sprack tot Iosua: Wy willen den HEERE onsen Gode dienen, ende zijnder stemmen ghehoorsaem zijn.

25

^† Alsoo maeckte Iosua opten seluen dach een verbondt metten volcke, ende gaf hen Wetten ende Rechten voor, tot Sichem.

† 4.Reg. 23.a.3

26

⁺ Ende Iosua schreef dit altemael int Wetboeck Godts,^* ende nam eenen grooten steen, ende rechte dien aldaer op, onder een Eycke, die byden Heylichdom des HEEREN was,

+ F vers 26

* 1.Regum. 7.c.12

27

Ende sprack tot alle den volcke:^* Siet, desen steen, sal een ghetuyge zijn tusschen ons. Want hy heeft ghehoort alle de redenen des HEEREN, die hy met ons ghesproken heeft: Ende sal een ghetuyghe ouer v zijn, dat ghy uwen Godt niet en verloochent.

* Gene. 31.g.52. Iosue. 22.f.27

28

Alsoo verliet Iosua dat volck, eenen yeghelijcken in zijn erfdeel.

29

^* Ende het gheuiel na dese gheschiedenisse, dat Iosua de soone Nun, de knecht des HEEREN sterf, doen hy hondert ende thien iaren out was.

* Iudic. 2.b.8.

30

Ende men begroef hem in de palen zijns erfdeels,^* tot Thimnath Serah, die opten gheberchte Ephraim leyt, vant Noordenwaert, aenden Berghe Gaas.

* Iosu. 19.d.50.

31

^† Ende Israel diende den HEERE, alsoo langhe als Iosua leefde. Ende de Ouders die langhen tijt leefden nae Iosua, die alle de wercken des HEEren wisten, die hy aen Israel ghedaen had.

† 2.par. 34.f.34 Iudic. 2.a.7.

32

^* De ghebeenten Iosephs, die welcke de kinderen Israels hadden wt Egipten ghebracht, begroeuen si te^† Sichem, inden stucke velts,^‡ dat Iacob cocht vanden kinderen Hemor des Vaders Sichem, om hondert^* penninghen, ende werdt der kinderen Iosephs erfdeel.

* Gen. 50.d.24 Exod. 13.d.19.

† Act. 7.b.16.

‡ Gen. 33.d.19

* Grossen.

33

Eleazar de soon Aaron sterf oock. Ende si begroeuen hem tot Gibeath Pinehas zijns soons, die hem ghegheuen was opt gheberchte Ephraims.

¶ Hier eyndet dat Boeck Iosua.