Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Als Iosua out gheworden was, ende zijnen sterfdach na by was, soo riep hy tvolck te samen, ende vermaent haer, dat si scherpelijck de gheboden des HEEREN souden onderhouden.

1

⁺ ENde nae eenen langen tijt, doen de HEERE Israel tot rusten hadde ghebracht, van allen haren Vianden rontom: Ende Iosua nv out ende wel bedaghet was,

+ A vers 1

2

Doen riep hy dat gheheele Israel, ende hare Outste Hoofden, Rechters ende Officiers te samen, ende sprack tot hen: Ick ben oudt ende wel bedaecht.

3

Ende ghy hebt ghesien al wat de HEERE uwe Godt ghedaen heeft, aen alle desen volcke, voor v. Wandt de HEERE uwe Godt, heeft selue voor v ghestreden.

4

^* Siet, ick heb v de ouerbleuen volcken doort Lot wtgedeylt, elcken stamme zijn erfdeel, vander Iordanen aen, ende alle volcken die ick wtgheroeyt hebbe, ende aen de groote zee, teghen der Sonnen onderganck.

* Iudicum. 1.a.2.

5

⁺ Ende de HEERE uwe Godt salse wtstooten voor v, ende van v verdrijuen, dat ghy haer lant inneemt, also v de HEERE uwe God ghesproken heeft.

+ B vers 5

6

So hebt nv eenen gantsch vrijmoedighen moet, dat ghy hout ende doet, al wat gheschreuen staet int Wetboeck

[p. 89v]

Mose,^* dat ghy daer niet af en wijckt, noch ter rechter, noch ter slincker handt.

* Deut. 4.a.2. 6.d.25.

7

Op dat ghy niet onder dese ouerbleuen volcken en coemt, die by v zijn, ende niet en ghedenct noch^† en sweert by den naem haerder goden, noch hen niet en dient, noch en aenbidt,

† Deut. 10.d.20.

8

Maer aenhanghet den HEERE uwen Godt, so ghy tot desen daghe toe ghedaen hebt,

9

So sal de HEERE voor v verdrijuen groote ende machtighe volcken, ende niemant en heeft v teghen ghestaen, tot desen daghe toe.

10

^+* Vwer een, salder duysent iaghen. Want de HEERE uwe Godt strijdt voor v, soo hy v ghesproken heeft.

+ C vers 10

* Leuit. 26.a.5. Esaie. 30.c.17

11

Daerom soo bewaert uwe sielen opt alder neerstichste, dat ghy den HEEre uwen Godt lief hebt.

12

^† Maer ist dat ghy v om keert, ende desen ouerghebleuen volcke aenhangt, ende v met hen vereenicht, also dat ghy onder hen, ende si onder v comen,

† Deut. 7.a.2.

13

So wetet dat de HEERE uwe Godt, alle dese volcken niet meer voor v en sal verdrijuen:^‡ Maer si sullen v tot stricken, ende netten, ende tot gheesselen in uwen zijden worden, ende tot eenen Doorn in uwen oogen, tot dat hy v verniele, vanden goeden lande, dat v de HEERE uwe Godt ghegheuen heeft.

‡ Num. 33.f.55.

14

^* Siet, ick gae heden daer af, als alle werelt.^† Ende ghy sult weten van gheheelder herten, ende van gheheelder sielen, dat niet een woort ghefaelgeert en heeft, aen alle den goede, dat de HEEre uwe Godt v ghesproken heeft. Het is al ghecomen, ende niet een achter bleuen.

* 3.Regum. 2.a.2

† 3.Re. 8.h.56

15

Ghelijck als nv alle dat goet ghecomen is, dat v de HEERE uwe Godt ghesproken heeft.^+* Alsoo sal de HEEre oock ouer v laten comen, alle dat quaet, tot dat hy v verniele van desen goeden Lande, dat v de HEERE uwe Godt ghegeuen heeft,

+ D vers 15

* Iosu. 24.e.20 Deut. 28.b.15

16

Als ghy dat verbont des HEEREN ws Gods ouertreedt, dat hy v gheboden heeft, ende henen gaet, ende anderen goden dient, ende die aenbidt. Alsoo dat de verbolghentheydt des HEEREN ouer v vergrammet, ende v haestelijcken verniele, vanden goeden lande, dat hy v ghegheuen heeft.