Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Van de wtdeylinge der Vrijsteden.

1

⁺ ENde de HEEre sprack met Iosua, seggende:

+ A vers 1

2

Segt den kinderen Israels:^† Geeft onder v Vrije steden, daer ick v door Mose af gheseyt hebbe,

† Exod. 21.b.13. Num. 35.b.11. Deut. 19.a.2.

3

Daer toe een dootslagher vluchten mach, die een siele onuerhuets ende onwetende slaet, dat si onder v vrij zijn, voor den bloetwreker.

4

Ende die daer vlucht tot een van dien Steden, die sal staen buyten voor der Stadt poorten, ende voor de Ouders der stadt zijne sake vertellen, soo sullen si hem tot hen in de Stadt nemen, ende hem ruymte gheuen, dat hy by hen woone.

5

⁺ Ende als de bloetwreker hem nae iaecht so en sullen si den dootslager niet in sinen handen ouer geuen, want hy onuersiens sinen naesten gheslagen heeft, ende en is hem te voren gheen viant gheweest.

+ B vers 5

6

Soo sal hy in de Stadt woonen, tot dat hy stae voor der ghemeynten, voor tgherechte, tot dat de hooge Priester sterue, die totter seluer tijt zijn sal. Als dan sal de dootslagher weder comen in zijn stadt, ende in zijn huys inder stadt, daer hy af gheulught is.

7

Doen heylichden si Kedes in Galilea op dat geberchte Naphthali, ende Sechem op dat gheberchte Ephraim, ende KiriathArba, dat is Hebron, op dat gheberchte Iuda.

8

⁺ Ende op gheen sijde der Iordanen, daer Ieriho leget, tegen den opganc der Sonnen, gauen si Beser inder woestijnen, op dat effen veldt, wt den stamme Ruben, ende Ramoth in Gilead, wt den stamme Gad, ende Golam in Basan wt den stam Manasse.

+ C vers 8

9

Dat waren de Steden, die allen kinderen Israels, ende den Vreemdelingen die onder hen woonden, geordineert waren, op dat derwaerts vluchten soude, so wie een siele onuerhoets slaet, dat hy niet en sterue, door den bloetwreker, tot dat hy voor de ghemeynte ghestaen heeft.