Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Daer werden mannen wtghesonden, vanden seuen stammen om dat Lant te besien, ende wt te deylen. Het deel BenIamin wort beschreuen.

1

⁺ ENde de geheele ghemeynte der kinderen Israels, vergaderden hen tot Silo, ende rechten aldaer den Tabernakel des ghetuychenis op, ende dat Lant was hen onderworpen.

+ A vers 1

2

Ende daer waren noch seuen stammen der kinderen Israels, dien si haer Erfdeel niet wtgedeylt en hadden.

3

Ende Iosua sprack totten kinderen Israels: Hoe lange zijt ghy so traech, dat ghy niet henen en gaet, om dat Lant in te nemen, dat v de HEEre uwer Vaderen Godt ghegheuen heeft?

4

Beschickt v wt elcken stamme drie mannen, dat ickse henen seynde, ende dat si hen op maken, ende door dat Lant gaen, ende beschrijuent, nae haren erfdeel, ende weder tot my comen.

5

Deylt dat Lant in seuen deelen. Iuda sal blijuen op zijne palen vander Suytsijden, ende dat huys Ioseph, sal blijuen op zijne palen van Noorden af.

6

Maer beschrijft ghy dat Lant in seuen deelen, ende brengtse herwaerts tot my, soo wil ick v dat Lot worpen, voor den HEEre onsen Godt.

7

^* Want de Leuiten en hebben gheen deel onder v: Mer dat Priesterschap des HEEren is haer Erfdeel.^† Maer Gad ende Ruben, ende den haluen stamme Manasse, hebben haer deel genomen ouer gheen sijde der Iordanen, tegent Oosten, dat hem Mose de knecht des HEEren ghegheuen heeft.

* Iosu. 13.d.33. 14.a.3.

† Iosu. 12.b.6.

8

⁺ Doe maecten hen de mannen op, op dat si wech souden gaen. Ende Iosua geboot hen, dat si henen wilden gaen om dat Lant te beschrijuen, ende sprac: Gaet henen, ende doorwandelt dat Lant, ende beschrijuet: Ende coemt weder tot my, dat ick v hier dat Lot werpe voor den HEEre tot Silo.

+ B vers 8

9

Also ghingen de mannen henen, ende doortrockent Lant, ende beschreuent op eenen brief, nae die steden, in seuen deelen, ende quamen tot Iosua inden Legher tot Silo.

10

Doe werp Iosua het Lot ouer hen tot Silo, voor den HEERE, ende deylden aldaer tlant wt onder de kinderen Israels, eenen yeghelijcken zijn deel.

11

Ende dat Lot des stams der kinderen BenIamin, viel nae haren gheslachten, ende den pale haers Lots ghinc wt, tusschen den kinderen Iuda, ende den kinderen Iosephs.

12

Ende haren pale was, nae den hoeck tegent Noorden, vander Iordanen aen, ende gaet opwaerts aen de sijde Ieriho, vant Noorden, ende coemt opt geberchte teghent Westen, ende gaet wt aender woestijnen BethAuen,

13

Ende gaet van daer nae Lus, aen de sijde aen Lus, teghent Suyden, dat is BethEl, ende coemt af, nae AtharothAdar, aenden berge, die vant Suyden herwaerts leyt, aenden nederen BethHoron,

14

Daer nae neycht si haer ende cromt haer om, nae den hoec des Westens, teghent Suyden vanden berge, die voor BethHoron tegent Suyden leyt, ende gaet wt aen KiriathBaal dat is KiriathIearim, de stadt der kinderen Iuda: Dat is dat eynde teghent Westen.

15

⁺ Maer dat eynde teghent Suyden, is van KiriathIearim aen, ende gaet wt, tegent Westen, ende coemt wt totten Water fonteynen Nephthoah,

+ C vers 15

16

Ende daelt neder aen des berchs eynde, die voor den dal des soons Hinnan leyt, welck inde Leechte Raphaim tegent Noorden leyt. Ende daelt af doort dal Hinnam aender sijden der Iebusiten tegent Suyden,^† ende coemt neder totter fonteynen Roghel,

† Iosu. 15.b.7. 3.Reg. 1.b.9.

17

Ende treckt haer van Noortwaert. Ende coemt wt nae Ensenes, ende coemt wt totten hoopen die teghen Adumim opwaerts ligghen, ende coemt nederwaers totten steen Bohem, des soons Ruben.

18

Ende gaet ter sijden henen neffens den blacken velde, dat teghent Noorden leyt, ende coemt af opt black velt,

19

Ende gaet

[p. 87v]

aender sijden BethHagla, die teghent Noorden Leyt. Ende zijn eynde is aender tonghen der souter zee teghent Noorden aenden cant der Iordanen, tegent Suyden: Dat is de pale teghent Suyden.

20

⁺ Maer de eynden tegent oosten, sal de Iordane eynden. Dat is dat erfdeel der kinderen BenIamin, in haren Palen rontom nae haren gheslachten.

+ D vers 20

21

Maer de steden des stams der kinderen BenIamins in haren gheslachte zijn dese: Ieriho, BethHagla, EmekKezin,

22

BethAraba, Semaraim, BethEl,

23

Auim, Haphar, Ophra,

24

Capher, Amonai, Aphni, Gaba: Dat zijn twelf Steden, ende haer Dorpen.

25

Gibeon, Rama Beeroth,

26

Mispe, Caphira, Moza,

27

Rebem, Ierpeel, Tharaala,

28

Sela, Eleph, ende de Iebuseen, dat is Ierusalem, Gibeath, Kiriath, veerthien steden ende haer dorpen: Dat is dat erfdeel der kinderen BenIamin in haren gheslachten.