Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Vanden lote ende deel Manasse.

1

⁺ ENde dat Lot viel op^* den stam Manasse: Want die is Iosephs^† yerste soon, ende viel op Machir, den yersten soon Manasse, den vader Gilead. Want hy was een strijdtbaer Man, daerom gewert hem Gilead ende Basan.

+ A vers 1

* Ios. 13.d.29.

† Ge. 48.c.14 Nu. 26.d.28.

2

Maer den anderen kinderen Manasse, nae haren maechschappen, viel dat ooc te weten, den kinderen Abieser, den kinderen Helck, den kinderen Assriel, den kinderen Sechem, den kinderen Hepher ende den kinderen Semida. Dat zijn de kinderen Manasse, des soons Iosephs, Mans namen, onder haren maechschappen.

3

^* Maer Selaphehad de sone Hepher des soons Gilead, des soons Machir, des soons Manasse, en hadde gheen soonen, maer dochteren. Ende haer namen zijn dese: Mahala, Noa, Hagla, Milca, Tirza.

* Nu. 27.a.1. 36.a.2.

4

Ende si traden voor den Priester Eleazar, ende voor Iosua den sone Nun ende voor de Ouersten, ende spraken: De HEEre heeft Mose gheboden, dat hy ons erfdeel soude gheuen, onder onsen broederen. Ende men gaf hen erfdeel onder den broederen haers vaders, nae dat beuel des HEEren.

5

⁺ Maer daer vielen op Manasse thien snoeren, buyten den Lande Gilead ende Basan, dat op gheen sijde der Iordanen leyt.

+ B vers 5

6

Want de dochteren Manasse, namen erfdeel onder sinen sonen. Ende dat Lant Gilead, ghewert den anderen kinderen Manasse.

7

Ende den pael Manasse, was van Asser aen, nae Michmethath, die voor Sichem leet, ende strect totter rechter sijden, aen die van EnTapuah.

8

Want dat Lant Thapuah wert Manasse, ende is den Pael Manasse, aen de kinderen Ephraim.

9

Daerna daelt hy af nae Nahalcana teghent Suydenwaert, totten beke steden, die Ephraims zijn, onder den Steden Manasse. Mer vant Noorden,

[p. 87r]

is de pale Manasse, aen de beke, ende gaet wt aende zee,

10

Den Ephraim tegen het Suyden, ende Manasse teghent Noorden, ende de zee is zijnen pale. Ende sal strecken aen Asser, vant Noorden, ende aen Isaschar, vant Oosten.

11

⁺ Dus had nv Manasse onder Isaschar ende Asser,^* BethSean ende hare dochteren, Ieblaam ende haer Dochteren, ende die tot Dor ende haer Dochteren, ende die tot Endor ende haer dochteren, ende die tot Taanach ende haer Dochteren ende die tot Meggido ende haer Dochteren, ende dat derdendeel Naphet.

+ C vers 11

* Iudic. 1.e.27.

12

Ende de kinderen Manasse en conden dese Steden niet innemen. Maer de Cananiten begosten te woonen inden seluen Lande.

13

Maer doen de kinderen Israels machtich werden, maeckten sy de Cananiten chijnsbaer, ende en verdreuense niet.

14

Doen spraken de kinderen Iosephs, met Iosua, segghende: Waerom en hebdy my maer een Lot, ende een snoer des erfdeels ghegheuen? Ende ick ben doch een groot volck, soo my de HEEre soo wel gheseegent heeft.

15

Doen sprack Iosua tot hen: Want ghy een groot volck zijt, so gaet opwaerts in dat Wout, ende houwet omme, ende maeckt v aldaer steden, inden lande der Pheresiten ende Raphaim, aengesien v dat geberchte Ephraim te enghe is.

16

⁺ Doen seyden de kinderen Iosephs: Dat geberchte en sullen wy niet vercrijgen: Want daer zijn ijsere waghens by allen Cananiten, die int dal des Landts woonen, by welcken leyt Bethesan, ende haer dochteren, ende Iesreel int dal.

+ D vers 16

17

Iosua sprac totten huyse Iosephs, tot Ephraim ende Manasse: Ghi zijt een groot volck, ende dewijle ghy so groot zijt, soo en muechdy niet alleen een Lot hebben,

18

Maer dat gheberchte sal v zijn, daer dat Wout is, dat houwet om, so salt ws Lots eynde zijn, als ghy de Cananiten verdrijuet, die de ijsere Wagens hebben, ende machtich zijn.