Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Dat lot Iosephs, ende Ephraims kinderen.

1

⁺ ENde dat Lot viel den kinderen Ioseph, vander Iordanen, teghen Ieriho, totten water by Ieriho, van Oostenwaert: Ende de woestijne die opwaert gaet van Ieriho, door dat geberchte^† BethEl,

+ A vers 1

† Iudi. 1.e.22.

2

Ende coemt van BethEl wt nae Lus, ende gaet door de palen ArciAtaroth,

3

Ende trect haer nederwaerts teghent Westenwaerts, nae de palen Iaphleti, tot aende palen des nederen BethHoron, ende tot Gaser toe, ende dat eynde is aen de zee.

4

Dat hebben die kinderen Ioseph, Manasse ende Ephraim tot eenen erfdeel ghenomen.

5

De palen der kinderen Ephraim, in haren gheslachten haers erfdeels, vanden Oostenwaert, was Atharoth, Adar, totten Ouersten BethHoron,

6

Ende gaet wt teghent Westen by Michmethath, die teghent Noorden leyt, aldaer crommen si haer daer omme, teghen den Oosten der stadt Thaenath Silo, ende gaet daer door vanden Oostenwaert, nae Ianoha.

7

⁺ Ende daelt neder van Ianoha, nae Ataroth ende Naaratha, ende strect aen Ieriho, ende gaet wt aen de Iordane,

+ B vers 7

8

Van Thapuah, gaetse tegen Westenwaert, nae NahalKana, ende haren wtganck is aen de zee.

Dat is dat erfdeel des stams der kinderen Ephraim, in haren gheslachten.

9

Ende alle Paelsteden met haren Dorpen der kinderen Ephraim, laghen verstroyt, onder dat erfdeel der kinderen Manasse.

10

^† Ende si en verderuen de Cananiten niet, die tot Gaser woonden. Alsoo bleuen de Cananiten onder Ephraim, tot op desen dach, ende worden chijnsbaer.

† Nu. 33.g.55. Iudi. 1.f.29.