Den Bibel, Inhoudende dat Oude ende Nieuwe Testament (Biestkensbijbel)

Dat .xv. Capittel.

¶ Dat Lant welcke Iuda met den lote te deel viel, dat wert hier beschreuen.

1

⁺ DAt Lot des stams der kinderen Iuda, in haren gheslachten, was den pale Edom, aender woestijnen Sin die teghent Suyden schiet, aenden eynde der Landen teghent Suyden.

+ A vers 1

2

Alsoo dat haer palen teghent Suyden waren vanden eynde der Souter zee aen, dat is vander tonghen die teghen Suydenwaert gaet,

3

Ende coemt wt van daer opwaerts tot Akrabbim, ende gaet door Sinna henen, ende gaet weder opwaerts van Suytwaerts tot KadesBarnea, ende gaet door Hezron, ende gaet opwaerts nae Adar, ende buycht hem om Karkaa,

4

Ende gaet door Asmon, ende coemt wt aen de beke Egypti, also dat dat eynde der Palen de zee wort: Dat zijn uwe palen teghen het Suyden.

5

⁺ Maer de pale teghent Oosten, is van de Soute zee aen, tot aen des Iordaens eynde.

De pale teghent Noorden, is vander tongen der zee, die aenden hoeck der Iordanen is,

+ B vers 5

6

Ende gaet opwaerts nae BethHagla, ende trect hem van Noortwaerts nae BethAraba, ende coemt op-waerts totten steen Bohen, des soons Ruben.

7

Ende gaet opwaerts nae Debir, vanden dal Achor, ende vanden Noortwaerts placke die teghen Gilgal leyt, welck ghelegen is teghen ouer nae Adumim, opwaerts, die van Suytwaerts aent water leyt. Daer nae gaetse totten water Ensemes, ende coemt wt totter^† Fonteynen Kogel.

† 3.Reg. 1.b.9. Iosu. 18.c.16.

8

Daernae gaet sy opwaerts totten dal des soons Hinnam aende sijde des Iebusiten, die van Suytwaerts woont, dat is Ierusalem, ende coemt opwaerts op de scherpte des berchs die voor dat dal Hinnam leyt, van Westwaerts, dwelck daer stoot aenden hoeck des dals Raphaim, tegent Noorden toe.

9

⁺ Daer na coemtse van des selfs berchs scherpte, totter water Fonteynen Nephthoah, ende coemt wt totten steden des geberchts Ephron, ende neyget haer tot Baala, dat is KiriatIearim.

+ C vers 9

10

Ende buyget hem daerom, van Baala, teghen den Westen, nae den gheberchte Seir, ende gaet aen de sijde henen, des gheberchs Iearim, van Noordenwaerts, dat is in Chessalon, ende coemt neder nae BethSemes, ende gaet door Thimma,

11

Ende breeckt wt aen de sijde Ekron, tegent Noordenwaerts, ende treckt haer nae Sicron, ende gaet ouer den berch Baala, ende coemt wt tot Iabneel, alsoo dat haer eynde de zee is.

12

Maer de pale teghent Westen, is de groote zee. Dit zijn de palen der kinderen Iuda, rontsomme in hare gheslachten.

13

^* Caleb de soone Iephunne, wert zijn deel ghegeuen onder den kinderen Iuda, nae dat de HEEre Iosua beual, te weten,^† de Kiriath Arba, des Vaders Enak, dat is Hebron.

* Iosu. 14.d.13.

† Iudic. 1.c.10.

14

^+‡ Ende Caleb verdreef van daer de drie soonen Enak: Sesai, Ahiman, ende Talmai, geboren van Enak.

+ D vers 14

‡ Iudi. 1.d.20.

15

Ende trock van daer opwaerts totten Inwoonders Debir. Maer Debir hiet voortijts KiriathSepher.

16

Ende Caleb sprac:^† Wie KiriathSepher slaet ende wint, dien wil ick mijn dochter Achsa tot eenen wijue gheuen.

† Iudic. 1.c.12. 1.Reg. 17.c.25. 1.Pa. 12.a.6.

17

Doen woonse Athniel de soone Kenas, des broeders Caleb, ende hy gaf hem zijn dochter Achsa tot eenen wijue.

18

Ende het gheuiel, doen si tot hem trock^† wert haer geraden eenen Acker te eyschen van haren vader, ende si viel vanden Ezel. Doe sprack Caleb tot haer: Wat is v?

† Num. 36.a.2. Iosu. 17.a.4.

19

Sy sprack: Gheeft my een seegeninge, want ghy hebt my een Lant teghent Suyden ghegheuen, gheeft my oock een waterachtich lant. Doe gaf hy haer een waterachtich lant bouen ende beneden.

20

Dit is dat erfdeel des stams der kinderen Iuda, in haren gheslachten.

21

⁺ Ende de steden des stams der kinderen Iuda, vanden eenen hoeck totten anderen aen de Palen der Edomiten tegent Suyden, waren dese: Kabzeel, Eder Iagur,

+ E vers 21

22

Kina, Dimona, Adada,

23

Kedes, Hazor, Iethum,

24

Suph, Telem, Bealoth,

25

Hazor, Hadata, Kirioth, Hezron, dat is Hazor,

26

Aman, Sema, Molada,

27

HazarGadda, Hesmon, BethPaleth,

[p. 86v]

28

HazaSual, BeerSeba, Bisiothia,

29

Baala, Iijm, Azem,

30

ElTolad, Chesil, Harma,

31

Siklag, Madmanna, SanSanna,

32

Lebaoth, Silhim, Ain, Rimon,^* dat zijn negenentwintich steden, ende haer dorpen.

* Iosue. 19.a.6.

33

⁺ Mer inde leechten was Esthaol. Sarea, Asna,

+ F vers 33

34

Sanoah, EnGanim, Thapuah, Enam,

35

Iarmuth, Adullam, Socho, Aseka,

36

SaarIm, Aditaim, Gedera, Giderohaim: Dat zijn veerthien Steden ende haer dorpen.

37

Senam, Hadaza, MigdalGad,

38

Dilean, Mizpe, Iakthiel,

39

Lachis, Balekath, Eglon,

40

Chabon, Lahman, Chithlis,

41

Gederoth, BethDagon, Naema, Makeda. Dat zijn sesthien Steden ende haer dorpen.

42

Libna, Ether, Azan,

43

Iephthah, Asna, Nezib,

44

Kegila, Achsib, Maresa. Dat zijn negen steden ende haer dorpen.

45

^† Ekron met haren dochteren ende dorpen.

† Iudic. 1.d.18.

46

Van Ekron tot aen de zee, ende alle wat aen Asdod strect, ende haer dorpen.

47

Asdod met haren Dochteren ende Dorpen. Gasa met haren Dochteren ende Dorpen, tot aen dat water Egypti. Ende de groote zee is sinen Pael.

48

Maer opten geberchte, was Samir, Iathir, Socho,

49

Damna, KiriaSamna, dat is Debir,

50

Anab, Esthemo, Annim,

51

Gozen, Holon, Gilo: Dat zijn elf Steden ende haer Dorpen.

52

⁺ Arab, Duma, Esean,

+ G vers 52

53

Ianum, BethThapuah, Apheka,

54

Humta, KiriathArba, dat is Hebron, Sior: Dat zijn negen Steden ende haer Dorpen.

55

MaonCarmel, Siph, Iutha,

56

Iesrael, Iakdeam, Sanoag,

57

Kain, Gibea, Thimna: Dat zijn thien Steden ende haer Dorpen.

58

Halhul, Bethsur, Gedor,

59

Maarath BethAnoth, Elthekon: Dat zijn ses Steden ende haer Dorpen.

60

KiriathBaal, dat is KiriathIearim, Harabba: Twee Steden ende haer Dorpen.

61

Maer inder woestijnen was BethAraba, Middin, Sechacha,

62

Nibzan, ende de Soudts stadt, ende Engeddi: Dat zijn ses Steden ende haer Dorpen.

63

Maer de Iebusiten^* woonden tot Ierusalem, ende de kinderen Iuda en costense niet verdrijuen. Also bleuen de Iebusiten metten kinderen Iuda, te Ierusalem tot op desen dach.

* Iudic. 1.d.21.