Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Hier wert verhaelt de wtdeylinge des lants, Ende ooc wat Caleb voor een man wort, bouen alle dandere.

1

⁺ MAer dit ist dat de kinderen Israels inghenomen hebben, inden Lande Canaan,^† dat onder hen wtghedeylt hebben, de Priester Eleazer, ende Iosua de soone Nun, ende de Ouerste Vaders onder den stammen der kinderen Israels.

+ A vers 1

† Nu. 34.d.17.

2

^† Maer sy deyldent door het Lot onder hen, so de HEEre door Mose gheboden hadde den neghen ende den haluen stamme te gheuen.

† Nu. 26.f.55. 33.f.54.

3

Want den tween, ende den haluen stam, hadde Mose erfdeel ghegheuen op gheen sijde der Iordanen.^* Maer den Leuiten en hadde hy gheen erfdeel onder hen ghegheuen.

* Iosu. 13.b.14

4

^† Want de kinderen Iosephs werden twee Stammen, Manasse ende Ephraim. Daerom en gauen sy den Leuiten gheen deel inden Lande, maer steden daer in te woonen, ende voorsteden voor haer vee ende goeden.

† Gen. 48.c.13.

5

^† So de HEEre Mose gheboden hadde, so deden de kinderen Israel, ende deylden dat Lant.

† Num. 35.a.2.

6

⁺ Doen traden de kinderen Iuda toe, tot Iosua tot Gilgal, ende Caleb de sone Iephunne, de Knisite, sprac tot hem:^† Ghy weet wat de HEEre tot Mose den man Godts seyde, van mijnen ende uwen tweghen in KadesBernea.

+ B vers 6

† Nu. 14.c.24.

7

Ick was veertich iaer out,^* doen my Mose de knecht des HEEREN wtseynde van KadesBarnea, om dat Lant te bespieden, ende ick seyde hem weder, so ickt in mijn herte

* Num. 13.a.6.

[p. 86r]

wist.

8

Maer mijne broeders die met my opwaerts ghegaen waren, maeckten den volcke dat herte versaecht. Mer ic volchde den HEEre mijnen Godt trouwelijc nae.

9

Doen swoer my Mose inden seluen daghe,^* ende sprac: Dat Lant, daer ghy met uwen voet opgetreden hebt, sal uwe ende uwer kinderen erfdeel zijn eewelijck, daerom, dat ghy den HEEre mijnen Godt trouwelijc nae geuolcht hebt.

* Iosu. 1.a.3. Deu. 11.d.24.

10

Ende nv siet,^* de HEEre heeft my laten leuen, so hy gesproken heeft. Het zijn nv vijfenveertich iaren, dat de HEEre sulcx tot Mose seyde, die Israel in de woestijne gewandelt heeft. Ende nv siet, Ick ben heden vijfentachentich iaer out,

* Nu. 14.c.24.

11

^* Ende ben noch heden inden daghe so sterck, als ick was inden daghe doen my Mose wtseynde. Gelijck mijn cracht doen was, alsoo is si nv oock te strijden, ende wt ende in te gaen.

* Eccl. 46.b.11.

12

⁺ So gheeft my nv dit geberchte, daer de HEEre af ghesproken heeft, in ghenen daghe: Want ghy hebtet gehoort inden seluen dage. Want de Enakim woonen daer bouen, ende het zijn groote ende vaste Steden, oft de HEEre met my zijn wilde, dat ickse verdreue, soo de HEEre ghesproken heeft.

+ D vers 12

13

Doen seegende hem Iosua,^* ende gaf also Hebron, Caleb den soone Iephune,^† tot een erfdeel.

* 1.Par. 7.d.56

† Iosu. 21.b.12. 1.mach. 2.e.56

14

Daer af werdt Hebron, Calebs des soons Iephune, des Knisiters erfdeel, tot op desen dach, daerom dat hy den HEEre den Godt Israels trouwelijck nae gheuolcht hadde.

15

^† Maer Hebron hiet voortijts KiriathArba, die was een groot mensch onder den Enakim. Ende dat Lant hadde opghehouden van oorloghe.

† Iosu. 15.c.13.