Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Hier werden ghenoemt de ouergebleuen landen, die noch aen dese sijde des Iordaens in te nemen zijn, ende onder de thien stammen te deylen zijn.

1

⁺ DOen nv Iosua oudt was, ende wel bedaget, sprac de HEEre tot hem: Ghy zijt oudt geworden, ende wel bedaget, ende daer is noch seer veel Lants ouergebleuen, om in te nemen,

+ A vers 1

2

Te weten, dat gheheel Galilea, der Philisteen, ende dat gheheel Gessuri,

3

Van Sihor aen, die voor Egypten vloeyt, tot aen de palen Ekiron teghent Noorden, die den Cananiten toe gerekent wort, vijf Heeren der Philisteen, te weten, de Gasiten, de Asdoditen, de Askloniten, de Gethiten, de Eskroniten, ende de Auiten.

4

Maer vant Suyden aen, is dat gheheele Lant der Cananiten, ende Maara, der Sidoniers tot Aphek toe, tot aen de palen der Amoriten.

5

Daer toe dat Lant

[p. 85v]

der Gibliten, ende den geheelen Libanon tegen der Sonnen opganck, van BaalGad aen, beneden aen den Berch Hermon, tot datmen coemt tot Hamath.

6

Al die opt geberchte woonen van Libanon aen, tot aen de warme wateren, ende alle Sidoniers: Ick wilse verdrijuen voor de kinderen Israels. Legt slechts dat Lot daeromme, haer wt te deylen onder Israel, soo ick v gheboden hebbe.

7

⁺ Soo deylt nv dit Lant tot een erue, onder de neghen stammen, ende onder den haluen stamme Manasse.

+ B vers 7

8

Want de^* Rubeniten ende Gadditen, hebben metten anderen haluen Manasse haer Erfdeel ontfanghen, dat hen Mose gaf, op gheen sijde der Iordanen, teghen den opganck der Sonnen,^* so hen dat selue Mose de knecht des HEEren gegeuen heeft.

* Iosu. 12.b.6.

* Nu. 32.d.20. 34.c.14.

9

Van Aroer aen, die aenden Oeuer des waters by Arnon leyt, ende vander stadt midden int water, ende alle Contreye Medba, tot Dibon toe,

10

Ende alle Steden Sihon des Conincx der Amoriten, die tot Hesbon regeerde,^† tot aen de Palen der kinderen Amon.

† Iosu. 12.a.2.

11

Daer toe oock Gilead, ende de Palen aen Gessuri ende Maachati, ende den geheelen berch Hermon, ende dat geheele Basan, tot Salcha toe,

12

Dat geheele Rijck Og tot Basan, die tot Astharoth ende Edrei regheerde, de welcke noch een vanden ouerghebleuene Ruesen was. Maer Mose sloechse ende verdreefse.

13

Maer de kinderen Israels en verdreuen de Gessuriten ende Maachathiten niet. Mer Gessur ende Maachat woonen alle beyde onder de kinderen Israels, tot op desen dach.

14

^+† Maer den stamme der Leuiten en gaf hy gheen Erfdeel: Want dat offer des HEEren des Godts Israel, is haer Erfdeel, soo hy hen ghesproken heeft.

+ C vers 14

† Nu. 18.d.20. Iosu. 13.d.33. 14.a.3.

15

^* Also gaf Mose den stam der kinderen Ruben, nae haer gheslachten,

* Num. 32.f.33. Iosu. 22.a.1.

16

Dat hare Palen waren: Van Aroer, die aenden oeuer des waters by Arnon leyt, ende de Stadt midden int water, met allen effenen velden tot Medba toe.

17

Hesbon ende alle haer Steden, die inden effen velde liggen Dibon, Bamot, Baal, ende BethBaal, Meon

18

Iahza, Kedemoth, Mephaath, Kiriathaim,

19

Sabama, SerethSahar opten gheberchte int dal.

20

BethPeor, de beke aen Pisga ende BethIesimoth,

21

Ende alle Steden opt effen veldt, ende dat gheheele Rijck Sihon des Conincx der Amoriten, die tot Hesbon regheerde,^† die Moses sloech metten Vorsten Midian. Eui, Reken, Sur, Hur, ende Reda, die gheweldighe des Conincx Sihon, die inden Lande woonden.

† Nu. 21.d.24.

22

Daer toe^† Bileam den soon Beor, den Propheteerder doodden de kinderen Israels metten Sweerde, metten anderen verslaghenen.

† Num. 31.b.8. 2.Pet. 2.c.15.

23

Ende de palen der kinderen Ruben waren de Iordane. Dat is dat erfdeel der kinderen Ruben, in haren gheslachten, van Steden ende Dorpen.

24

⁺ Den stamme der kinderen Gad, nae haren geslachten, gaf Mose, dat hare palen waren,

+ D vers 24

25

Iaezar ende alle steden in Gilead, ende dat halue lant der kinderen Amon, tot Aroer toe, welcke leyt voor Rabbath:

26

Ende van Hesbon tot Ramath, Mizpe ende Betonim. Ende van Mahanaim, tot aen de Palen Debir.

27

Maer int dal BethHaram, BethNamra, Sucoth, ende Saphon, die ouerbleuen was vanden Rijck Sihon, des Conincx tot Hesbon, dat de Iordane de pale was tot aent eynde der zee Cinneroth, op dese sijde der Iordanen tegen den opganck der Sonnen.

28

Dat is dat Erfdeel der kinderen Gad, in haren geslachten, van Steden ende Dorpen.

29

^† Den haluen stamme der kinderen Manasse, nae haren geslachten, gaf Mose,

† Iosu. 17.a.1. 1.Par. 6.d.23.

30

Dat hare palen waren, van Mahanaim aen, dat geheele Basan, dat geheel Rijck Og des Conincx tot Basan, ende alle vlecken Iair, die in Basan liggen, te weten, tsestich Steden,

31

Ende dat halue Gilead, Astharoth, Edrei, de Steden des Coninckrijcx Og tot Basan, gaf hy den kinderen Machir des soons Manasse, dat is de helft der kinderen Machir, nae haren gheslachten.

32

Dat ist dat Mose wtghedeylt heeft, op dat velt Moab, op gheen sijde der Iordanen voor Iericho, teghen den opganck der Sonnen.

33

^† Maer den stamme Leui en gaf Mose gheen erfdeel. Want de HEEre de Godt Israels is haer erfdeel, soo hy hen ghesproken heeft.

† Iosu. 13.b.14. 14.a.3. 18.a.7