Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ De Heydensche Coningen vergaderen teghen Israel te strijden, maer sy crijghen de nederlaghe, ende hare Steden werden in ghenomen.

1

⁺ MAer doen Iabin de Coninck tot Hazor sulcx hoorde,^* seynde hi tot Iobab den Coninck tot Madon, ende totten Coninck tot Simron, ende totten Coninck tot Achsaph,

+ A vers 1

* Iosue. 9.a.1. 10.a.3.

2

Ende totten Coningen die noortwaerts opt gheberchte, ende opten slechten velde, zuytwaerts Cinneroth, ende inde Leechten, ende in NaphotDor, aen de zee woonden.

3

Den Cananiten teghent Oosten ende Westen, Den Amoriten, Hethiten, Pheresiten, ende Iebusiten opt geberchte. Daer toe de Heuiten, onder aenden berch Hermon, inden lande Mizpa.

4

Dese trocken wt met alle haren Heyr, een groot volck, so veel als des sants aen de zee, ende seer veel Rossen ende Waghens.

5

Alle dese Coningen vergaderden hen, ende quamen, ende maecten haren Leger by malcanderen,⁺ aen dat water Merom, om te strijden teghen Israel.

+ B vers 5

6

Ende de HEERE sprac tot Iosua: En vreest v niet voor hen, want morgen ontrent desen tijt wil icse al verslaghen gheuen voor de kinderen Israels. Haer Rossen suldy verlemen, ende haer Waghenen met vier verbernen.

7

^‡ Ende Iosua quam bottelijck ouer hen, ende allet oorloochs volck met hem aent water Merom, ende oueruielense.

‡ Iosua. 10.b.9.

8

Ende de HEEre gafse in de handen Israels, ende si sloeghense, ende ioegense tot groot Sidon toe, ende tot de werme wateren, ende tot aen de breede tot Mizpe teghent Oosten, ende sloeghense tot datter niemant onder hen ouer en bleef.

9

Doen dede hen Iosua, soo hem de HEERE gheseyt hadde, ende verleemde haer Rossen, ende verbernde hare Waghenen.

10

Ende keerde omme ter seluer tijt, ende wan Hazor, ende sloech haren Coninc metten sweerde (want Hazor was te voren de Hooftstadt, aller deser Conincrijcken)

11

Ende sloeghen alle sielen die daer in waren, metter scherpten des sweerts, ende verbandese, ende en liet niet ouerblijuen, dat den adem hadde, ende verbernde Hazor met vier.

12

Daer toe wan Iosua alle de Steden deser Coninghen, met haren Coningen, ende sloechse metter scherpten des sweerts, ende verbandese,^* soo Mose de knecht des HEEren gheboden hadde.

* Deut. 20.c.16.

13

⁺ Doch en verbranden de Kinderen Israels gheene Steden die opten berghen laghen, Maer Hazor alleene verbrande Iosua.

+ C vers 13

14

^† Ende alle den Roof deser Steden, ende dat Vee, deylden de Kinderen Israels onder hen: Maer alle de menschen sloeghen sy metter scherpten des

† Nu. 31.d.26. Deut. 20.b.14. Iosue. 8.f.27. 1.Reg. 30.e.22. 2.Mac. 8.c.28.

[p. 85r]

sweerts, tot dat sise vernielden, ende en lieten daer niet ouer blijuen, dat den adem hadde.

15

Soo de HEERE Mose sinen knechte, ende Mose Iosua geboden hadde, so dede Iosua, also datter niet en faelgeerde, aen alle dat de HEEre Mose geboden hadde.

16

Aldus nam Iosua al dat lant op dat gheberchte in, ende al wat tegent Suyden leyt, ende alle dat Lant Gosen, ende de Leechten ende blacke Velden, ende dat gheberchte Israels met sinen gronden,

17

Vanden gheberchte aen, dat het Lant opwaerts nae Seir scheydet, tot Baal Gad toe, inder breyden des berchs Libanon, onder aenden berch Hermon. Alle hare Coninghen ouerwan hy, ende sloechse, ende doodese:

18

Maer hy voerde eenen^† langhen tijt teghen dese Coninghen strijdt.

† Exo. 23.d.29.

19

⁺ Maer daer en was gheen Stadt die haer met vreden op gaf den kinderen Israels (wtghenomen de Heuiten,^† die tot Gibeon woonde) maer si wonnense alle met strijde.

+ D vers 19

† Iosu. 9.c.15.

20

Ende dat gheschiede alsoo vanden HEEre, op dat haer herten verherdt souden worden, den kinderen Israels met strijde tegen te gaen, op dat si verbannen souden worden, ende dat hen gheen ghenade en soude gheschien,^† maer vernielt worden, soo de HEEre Mose gheboden hadde.

† Deut. 20.c.16.

21

In die tijt quam Iosua ende royde wt de Enakim, vanden gheberchte van Hebron, dat Debir, van Anab, van alle geberchten Iuda, ende van alle gheberchte Israel, ende verbandese met haren Steden.

22

Ende en liet gheenen Enakim ouerblijuen, inden Lande der kinderen Israels, behaluen tot Gasa, tot^* Gath, ende tot Asdod, daer bleuender sommighe ouer.

* 1.Re. 17.a.4.

23

Alsoo nam Iosua alle dat Lant in, in alle manieren, soo de HEEre tot Mose ghesproken hadde, ende gafse Israel tot een erue,^* elcken stamme zijn deel. Ende dat Lant hielt op te oorloghen.

* Nu. 26.f.53.