Den Bibel, Inhoudende dat Oude ende Nieuwe Testament (Biestkensbijbel)

[p. 84r]

¶ Dat .x. Capittel.

¶ Gibeon wordt vanden Heydenen beleghert, maer Iosua met sinen volcke coemt haer te hulpen, ende hy wint eenen grooten slach. De vijf Coninghen die inde Speloncke gheuloden waren, die worden voor Iosua ghebracht ende ghehanghen, ende daer nae neemt Iosua alle de ander steden in.

1

⁺ MAer doen Adonizedeck de Coninck te Ierusalem hoorde, dat Iosua Ai ghewonnen, ende die verbannen hadde, ende Ai met haren Coninck, ghedaen hadde, ghelijck hy Ieriho ende haren Coninck ghedaen hadde.^† Ende dat die te Gibeon vrede met Israel gemaect hadden, ende onder hen comen waren,

+ A vers 1

† Iosue. 9.a.3.

2

Vreesde hy gantsch seer (Want Gibeon was een groote stadt, als een Coninclijcke stadt, ende grooter dan Ai, ende alle haer Borghers strijtdbaer)

3

Ende sont henen tot Hoham, den Coninck te Hebron, ende tot Piream, den Coninck tot Iarmuth, ende Iaphia, den Coninck tot Lachis, ende tot Debir, den Coninck tot Eglon, ende dede hen segghen:

4

Coemt opwaerts tot my, ende helpt my dat wy Gibeon slaen: Want si heeft met Iosua, ende den kinderen Israels vrede ghemaect.

5

^* Doen quamen de vijf Coninghen der Amoriten te hoop, ende trocken opwaerts, de Coninc tot Ierusalem, de Coninck tot Hebron, de Coninck tot Iarmuth, de Coninc tot Lachis, de Coninck tot Eglon, met alle haer heyrleghers, ende beleyden Gibeon, ende streden teghen haer.

* Iosue. 9.a.2.

6

⁺ Maer die te Gibeon sonden tot Iosua inden Legher tot Gilgal, ende lieten hem segghen: En trect uwe hant niet af van uwen knechten, coemt haestelijc opwaerts tot ons, verlost ende helpt ons. Want alle de Coninghen der Amoriten, die opt gheberchte woonen, hebben hen teghen ons vergadert.

+ B vers 6

7

Iosua reysde opwaerts van Gilgal, ende al dat oorloochs volck met hem, ende alle strijtbaer mannen.

8

Ende de HEERE sprack tot Iosua: En vreest voor hen niet, want ick hebse in uwen handen ghegheuen: Niemandt van hen en sal voor v staen moghen.

9

Alsoo quam^* Iosua onuersiens snel ouer hen, want den gantschen nacht ouer, tooch hy op van Gilgal.

* Iosue. 11.b.7.

10

^† Ende de HEEre veruaerdese voor Israel, also datse eenen grooten slach sloeghen tot Gibeon, ende iaechden hen na, den wech na Beth Horon, ende sloegense tot Aseka ende Makeda.

† Esai. 28.d.21.

11

⁺ Ende doen si voor Israel vluchten, den wech nederwaerts na Beth Horon,^* liet de HEEre eenen grooten hagel vanden hemel op hen vallen, tot Aseka toe, dat si storuen. Ende haerder storuen veel meer vanden haghel, dan de kinderen Israels metten sweerde dooden.

+ C vers 11

* Iob. 38.c.22. Exod. 9.e.23.

12

Doen sprack Iosua metten HEEre, inden daghe, doen de HEEre de Amoriten ouer gaf, voor de kinderen Israels, ende sprack in de teghenwoordicheyt Israels: Sonne staet stille, tot Gibeon, ende ghy Mane, inden dal Aialon.

13

Doen^* stont de Sonne, ende de Mane stille, tot dat hem dat volck aen zijn Vianden wreecte. En is dit niet ghescreuen inden Boeck des^† vromen? Aldus stont de Sonne midden aenden Hemel, ende vertrack onder te gaen, by nae eenen heelen dach.

* Eccle. 46.a.5.

† Oprechten.

14

Ende daer en was gheenen dach, desen ghelijck te voren noch daer nae, doen de HEERE de stemme eens mans hoorde, want de HEEre streedt voor Israel.

15

Maer Iosua trock weder inden Legher na Gilgal, ende dat gantsche Israel met hem.

16

Maer de vijf Coninghen waren gheulucht, ende hadden hen versteken in de Speloncke tot Makeda.

17

⁺ Doen wert Iosua te kennen ghegheuen. Wy hebben de vijf Coningen gheuonden verborgen, inder Speloncke tot Makeda.

+ D vers 17

18

Iosua sprack: Soo wentelt groote steenen voor dat Hol der Speloncken, ende bestelt daer mannen voor, diese bewaren.

19

Maer en staet ghy niet stille, maer iaghet uwen Vianden na, ende slaet haer achterste, ende en laetse in haer steden niet comen. Want de HEERE uwe Godt, heeftse in uwen handen ghegheuen.

20

Ende doen Iosua ende de kinderen Israels, den seer grooten slach aen hen gheeynt hadden, ende haddense gantsch verslagen, wat doen van hen ouer bleef, quam in de vaste steden.

21

Aldus quam alle dat volck weder inden Legher tot Iosua tot Makeda, met vrede. Ende niemant en dorste voor den kinderen Israels zijn tonghe roeren.

22

Maer Iosua sprac: Doet dat Hol der Speloncken open, ende brengt de vijf Coninghen herwaerts tot my.

23

Sy deden alsoo, ende brachten de vijf Coninghen tot hem wt der Speloncken, den Coninck tot Ierusalem, den Coninck tot Hebron, den Coninck tot Iarmuth, den Coninck tot Lachis, den Coninck tot Eglon.

24

Maer doen dese vijf Coninghen tot hem daer wtghebracht waren, riep Iosua dat gantsche Israel, ende sprac totten Ouersten des Oorloochs volcx die met hem trocken: Coemt herwaerts, ende treedt dese Coninghen met voeten op haer halsen.⁺ Ende si quamen toe, ende traden met voeten op haer halsen.

+ E vers 24

25

Ende Iosua sprac tot hen: En vreest v niet, ende en verschrict niet, hebt eenen goeden moet, ende weest onuersaecht. Want alsoo sal de HEERE alle uwe Vianden doen, daer ghy tegen oorloocht.

26

Ende Iosua sloechse daer nae, ende doodese,^* ende hinckse aen vijf Boomen. Ende sy hinghen aen de Boomen tot tsauonts toe.

* Iosue. 8.f.29.

27

^† Maer doen de Sonne onder ghegaen was, gheboot hy, datmense vanden Boomen soude nemen, ende worpense in de Speloncke, daer si hen in verborghen hadden. Ende leyden groote steenen voor dat Hol der Speloncken, die zijn daer noch tot op desen dach.

† Deut. 21.d.23.

[p. 84v]

28

Opten seluen dach wan Iosua oock Makeda, ende sloechse metter scherpten des Sweerts, daer toe haren Coninck,^* ende verbandense, ende alle sielen die daer in waren, ende en liet niemanden ouer blijuen. Ende dede den Coninck tot Makeda,^† ghelijck hy den Coninck tot Ieriho ghedaen hadde.

* Deut. 20.c.16.

† Iosue. 6.c.21.

29

Doen trock Iosua, ende alle Israel met hem, van Makeda na Libna, ende street teghen haer.

30

Ende de HEEre gaf de selue oock inder hant Israels met haren Coninghen, ende hy sloechse metter scherpten des Sweerts: Ende alle sielen die daer in waren, ende en lieter niet eenen in ouerblijuen. Ende dede haren Coninck, so hy den Coninck tot Ieriho ghedaen hadde.

31

⁺ Daer na trock Iosua, ende alle Israel met hem, van Libna nae Lachis, ende beleydense, ende bestormdense.

+ F vers 31

32

Ende de HEEre gaf Lachis oock in de handen Israels, alsoo dat syse tsanderdaechs wonnen, ende sloeghense metter scherpten des Sweerts, ende alle sielen die daer inne waren, in alle manieren soo hy Libna ghedaen hadde.

33

Inder seluer tijt trock Horam, de Coninck tot Gezar opwaerts, om Lachis te helpen. Maer Iosua sloech hem, met alle sinen volcke, tot dat niemant daer in ouer en bleef.

34

Ende Iosua trock van Lachis, met allen Israel na Eglon, ende beleydese, ende bestormdese, ende wanse, inden seluen daghe, ende sloechse metter scherpten des Sweerts.

35

Ende verbande alle sielen die daer in waren, opten seluen dach, in alle manieren so hy Lachis ghedaen hadde.

36

Daer nae trock Iosua opwaerts met alle Israel, van Eglon nae Hebron, ende bestormdese,

37

Ende wanse, ende sloechse metter scherpten des sweerts, ende haren Coninck met alle haer Steden. Ende alle sielen die daer in waren, ende en lieter niet eenen ouer blijuen, in alder manieren so hy Eglon ghedaen hadde. Ende verbandese, ende alle sielen die daer in waren.

38

⁺ Doen keerde Iosua wederom met alle Israel, na Debir,

+ G vers 38

39

Ende bestormdese, ende wanse met haren Coninghen, ende met alle haer steden, ende sloegense metter scherpten des Sweerts. Ende verbanden alle sielen die daer in waren, ende en lieter niet eenen ouerblijuen. Ghelijck hy Hebron ghedaen hadde, so dede hy Debir oock, ende haren Coninck, ende soo hy Libna ende haren Coninc gedaen hadde.

40

Alsoo sloech Iosua alle dat lant opt gheberchte, ende teghen Tzuyden, ende inden Leechten, ende aen de Beken, met allen haren Coningen, ende en lieter niet eenen ouerblijuen, ende verbande al wat eenen adem hadde,^* soo de HEEre de Godt Israel gheboden hadde.

* Deut. 20.c.16.

41

Ende sloechse van Cades Bernea aen, tot Gasa toe, ende alle dat Lant Gosen, tot Gibeon toe.

42

Ende ouerwan alle dese Coninghen met haren Lande teenen male. Want de HEERE de God Israels streedt voor Israel.

43

Ende Iosua trock weder inden Legher nae Gilgal, met alle Israel.