Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ De stadt Ai wert inghenomen, ende de Borghers werden alle verslagen, Ende de Coninck leuendich gheuanghen ende ghehanghen, de stadt wert verbernt, Iosua maeckt den HEEre eenen Altaer opten Berch Ebal. De segheninghen ende vermaledijdingen werden ghelesen, ghelijck als bouen seuenentwintich Deuteronomij gheseyt is.

1

⁺ ENde de HEERE sprac tot Iosua:^† En vreest noch en versaget v niet. Neemt met v alle dat Oorloochs volck, ende maect v op, ende treckt opwaerts nae Ai. Siet daer, ick hebbe den Coninc Ai, met sinen volcke, in zijnder stadt ende lant in uwen handen ghegheuen.

+ A vers 1

† Deut. 7.d.18. Deut. 20.a.3.

2

Ende sult met Ai, ende haren Coninc doen,^* alsoo ghy met Ieriho, ende haren Coninck ghedaen hebt.^† Behaluen, dat ghy haren roof ende haer Vee, onder v deylen sult, maer bestellet een^‡ achterhoedinghe achter de stadt.

* Iosue. 6.c.21.

† deu. 20.b.14

‡ Achterwacht Achterlaghe.

[p. 83r]

3

Doen maecte hem Iosua op, ende alle dat Crijschvolck, op te trecken na Ai. Ende Iosua las wt dertich duysent strijdtbaer mannen, ende santse wt byder nacht,

4

Ende gheboot hen, ende sprack:^† Siet toe, ghy sult de achterhoedinghe zijn achter de stadt. Maer en maeckt v niet al te verre vander stadt, ende zijt al te samen bereyt.

† Iud. 20.e.29. 1.Reg. 15.b.5.

5

Maer ick, ende alle tvolc dat met my is, willen ons na der stadt maken. Ende als si teghen ons wtcomen,^* ghelijck te voren, soo willen wy voor hen vluchten,

* Iosue. 7.a.4.

6

Op dat si ons daer wt nae volghen, tot dat wijse daer wt locken vander stadt. Want si sullen dencken dat wy voor hen vlien, ghelijck als te voren.

7

⁺ Ende ter wijlen dat wy voor hen vlien, sult ghy v op maken wt der achterhoedinghe, ende de stadt innemen. Want de HEEre uwe Godt, salse in uwen handen gheuen.

+ B vers 7

8

Maer als ghy de stadt ingenomen hebt, so steectse aen met vier,^* Ende doet nae den woorde des HEEren. Siet, ick hebt v gheboden.

* Deut. 20.c.16.

9

Alsoo santse Iosua wech. Ende si ginghen henen op de Achterhoedinghe, ende hielden tusschen BethEl ende Ai, tegent Westen aen Ai. Maer Iosua bleef dien nacht onder dat volck:

10

Ende maecte hem smorghens vroech op. Ende ordineerde dat volck, ende trock opwaert metten Outsten Israels, voor dat volck henen nae Ai.

11

Ende allet crijschvolc dat by hem was, trock opwaerts, ende traden toe, ende quamen teghen de stadt, ende maecten haren Legher teghent Noorden voor Ai, also datter maer een dal en was tusschen hen ende Ai.

12

⁺ Maer hy hadde by vijf duysent mannen ghenomen, ende op de Achterhoedinghe ghesedt tusschen BethEl ende Ai,

+ C vers 12

13

Westwaert der stadt. Ende si ordineerden dat volck des gheheelen Leghers, dat tegent Noorden der stadt was, alsoo dat zijn eynde reycte teghent Westen der stadt. Alsoo ghinck Iosua henen inder seluer nacht midden int dal.

14

Maer als de Coninc tot Ai dat sach, haesteden si hen, ende maecten hen vroech op, ende de mannen der stadt wtwaerts, om Israel te ghemoeten, ten strijde, met al sinen volcke, aen een bescheyden plaetse, voor dat slechte velt. Want hi en wist niet dat daer een Achterhoedinghe op hem was achter de stadt.

15

Maer Iosua ende dat gantsche Israel stelden hen, als oft si gheslaghen werden voor hen, ende vloden opten wech nader woestijnen.

16

Doen riep alle dat volck inder stadt, datmen hen nae soude iagen. Ende si iaechden Iosua nae, ende gauen hen seluen buyten vander stadt,

17

⁺ Also datter niet een man ouer en bleef, in Ai ende BethEl, die niet wtghetrocken en waren, om Israel nae te iaghen, ende lieten de Stadt open staen, op dat sy Israel nae souden iaghen.

+ D vers 17

18

Doen sprack de HEERE tot Iosua: Rect de lancie wt, die ghi in v hant hebt, teghen Ai, want ick wilse in uwer hant gheuen. Ende doen Iosua de Lancie, die in zijnder hant was, teghen de stadt wt recte,

19

Doen brack de Achterhoedinge haestelijck op, wt haerder plaetsen, ende liepen nae dien, dat hy zijn hant wtrecte, ende quamen in de stadt, ende wonnense, ende haesten hen, ende stakense met vier aen.

20

Ende de mannen van Ai keerden hen, ende saghen achterwaerts, ende sagen den roock der stadt opgaen nae den Hemel, ende en hadden gheen ruymte te vlien, noch herwaerts, noch derwaerts. Ende dat volck dat nader woestijnen vluchtede, keerden hen om, om hen na te iagen.

21

⁺ Want doen Iosua ende dat gantsche volck Israels sach, dat de Achterwacht de stadt ghewonnen hadde, de wijle dat den roock der stadt opghinck, keerden sy wederom, ende sloeghen de mannen van Ai.

+ E vers 21

22

Ende die in de stadt quamen oock wt, hen teghen, also dat si midden onder Israel quamen, van beyde zijden, ende sloeghense, tot datter niemant ouer en bleef, oft ontloopen en conde.

23

Ende grepen den Coninc te Ai leuende, ende brachten hem tot Iosua.

24

Ende doen Israel alle de inwoonders tot Ai verworcht hadde, opten velde, ende inder woestijnen, die hen nae gheiaecht hadden, ende vielen alle door de scherpte des sweerts, tot dat si al vernielt waren: Doen keerde hen dat gantsche Israel na Ai, ende sloeghense metter scherpten des Sweerts.

25

Ende alle die op dien dach vielen, beyde Mannen ende Wijuen, die waren twaelf duysent, altemael lieden van Ai.

26

⁺ Maer Iosua en trac zijn hant niet weder tot hem, daer mede hy de Lancie wtrecte, tot dat alle Inwoonders Ai verbannen worden:

+ F vers 26

27

^† Behaluen dat Vee, ende den roof der stadt, deylde Israel wt onder hen, na den woorde des HEEren, dat hy Iosua gheboden hadde.

† Num. 31.b.11. Deut. 20.b.14 Iosue. 8.a.2. 11 c.14. 22.b.8. 2.Mac. 8.c.28

28

Ende Iosua bernde Ai wt, ende maecte eenen hoop daer wt eewelijck, die noch heden ten daghe daer leyt.

29

Ende liet den Coninc te Ai, aen eenen boom hanghen, tot tsauonts toe.^† Maer doen de Sonne onder was gegaen, gheboot hy, datmen zijn lichaem vanden boom name, ende worpen hem onder der stadt poorte, ende maecten eenen grooten steenhoop op hem, die noch tot op desen dach toe daer is.

† Deut. 21.d.22. Iosue. 10.e.27

30

^+† Doen^* stichte Iosua den HEEre, den Gode Israels, eenen Altaer opten Berch Ebal,

+ G vers 30

† Deut. 27.a.5.

* Boude.

31

(So Mose de knecht des HEEren den kinderen Israels beboden hadde, also in dat Boeck der Wet Mose gheschreuen staet,^* eenen Altaer van gheheelen steenen, die met geenen ijseren behouwen en waren) ende offerde den HEEre daer op Brantoffer ende Dancoffer.

* Exod. 20.d.25

32

Ende schreef aldaer op de steenen, de ander Wet, die Mose den kinderen Israels voorgheschreuen hadde.

33

Ende alle Israel met sinen Ouders ende Officiers, ende Rechteren stonden tot beyde zijden der Arcken, teghen de Priesters ouer wt Leui, die de Arcke des verbonts des HEEren droegen, de

[p. 83v]

vreemdelingen also wel als de Ingheboren. Een helft neffens den Berch Grisim, ende dander helft neffens den Berch Ebal,^* so Mose de knecht des HEEREN te voren gheboden hadde, te seghenen dat volck Israel.

* Deut. 27.b.12. 11.d.29.

34

Daer nae liet hy wtroepen alle de woorden deser Wet, vanden seghenen ende vloecken, so si gheschreuen staen inden Wetboeck.

35

Daer en was gheen woort dat Mose gheboden hadde, dat Iosua niet wt en hadde laten roepen, voor de geheele ghemeynte Israels, ende voor de Wijuen, ende kinderen, ende vreemdelingen, die onder hen wandelen.