Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ De Israelijten worden vluchtich voor haer Vianden, om dat een vanden verbanden ghestolen had, ende hoe hy ghestraft werdt.

1

⁺ MAer de kinderen Israels^† ontghingen hen aen dat^* verbande goet. Want Achan de sone Chatmi, des soons Sabdi, des soons Serab, vanden stamme Iuda, nam wat vanden verbanden goede. Doen verbolch de gramschap des HEEREN ouer de Kinderen Israels.

+ A vers 1

† Vergrepen.

* Deut. 7.c.25 Iosue. 6.c.18. 22.d.20. 2.mac. 12.f.40

2

Doen nv Iosua mannen wt sant van Ieriho nae Ai, die by BethAuen leydt, teghen dat Oosten voor BethEl, ende sprack tot hen: Gaet henen op, ende bespiet dat landt. Ende doen si opghegaen waren, ende Ai bespiet hadden,

3

Quamen si weder tot Iosua ende spraken tot hem: En laet dat gantsche volck niet opwaerts trecken, maer by twee oft drie duysent mannen, dat si opwaerts trecken ende slaen Ai, op dat hem alle dat

[p. 82v]

volck daer mede niet en bemoeye, want haerder is weynich.

4

Also trocken ontrent drie duysent mannen des volcx opwaerts,^† ende die vluchten voor de mannen Ai,

† Iosue. 8.a.5.

5

Ende die van Ai sloegen haerder by sessendertich mannen, ende iaechdense van de poorte aen, tot Sabarim toe, ende sloegense den wech neder. Doen wert den volcke dat hert versaghet,^* ende wert als water.

* Psal. 22.b.15.

6

Maer Iosua verschuerde zijn cleederen, ende viel op zijn aensicht ter Aerden, voor de Arcke des HEEREN, tot tsauonts toe, metten Outsten Israels, ende wierpen stof op haer hoofden.

7

Ende Iosua sprack: Ach HEERE HEERE, waerom hebdy dit volc ouer de Iordane gheuoert, dat ghy ons inde handen der Amoriten gaeft, ons te verdoen? O, oft wy op ghene zijde der Iordanen waren ghebleuen, soo wy beghost hadden.

8

⁺ Ach,^* mijn HEEre wat sal ick segghen, nv Israel sinen Vianden den rugghe toe keert.

+ B vers 8

* Deut. 9.e.26.

9

Als dat de Cananiten, ende alle Inwoonders des Landts hooren, soo sullen si ons omuanghen, ende oock onsen naem wtroeyen vander Aerden. Wat wildy dan by uwen grooten naem doen?

10

Doen sprack de HEEre tot Iosua: Staet op, waerom ligt ghy alsoo op v aensicht?

11

Israel heeft hen besondicht, ende hebben mijn verbont ouergetreden, dat ic hen geboden hebbe. Daer toe hebben si vanden verbanden goede ghenomen ende gestolen, ende verloochent, ende onder haer ghereetschap gheleyt.

12

De kinderen Israels en moghen niet staen voor haren vianden, maer moeten haren vianden den rugghe toe keeren: Want si zijn inden Ban. Ick en sal voortaen niet met v zijn, ist dat ghy den Ban wt v niet en roeyt.

13

⁺ Staet op,^† ende heylicht dat volck, ende segt: Heylighet v teghen morghen, want alsoo seyt de HEERE de God Israels.^† Daer is eenen Ban onder v, Israel, daerom en cont ghy niet gestaen voor uwe Vianden, tot dat ghy den Ban wt v wech doet.

+ C vers 13

† 1.Reg. 16.a.5.

† Deut. 13.c.17.

14

Ende sult vroech toe gaen, den eenen stam na den anderen. Ende welcken stam de HEERE raken sal, die sal voort comen, deen geslachte nae dander. Ende welck geslachte de HEEre raken sal, dat sal voortcomen, deen huys na dander. Ende welck huys de HEEre raken sal, dat sal voort comen, deen Huysweert nae den anderen.

15

Ende wie beuonden wort inden Ban, dien salmen met vier verbernen, met al dat hy heeft. Daerom, dat hy dat verbondt des HEEren ouer ghetreden, ende een dwaesheyt in Israel bedreuen heeft.

16

^* Doen maecte hem Iosua smorgens vroech op, ende dede Israel voort comen, den eenen stam na den anderen, ende den stam Iuda wert gheraect.

* 1.Reg. 14.f.40. 10.d.20.

17

Ende doen hi de geslachten in Iuda daer toe bracht, wert dat gheslachte der Serahiten gheraeckt. Ende doen hy dat gheslachte der Serahiten toe bracht, deen huys-weert na den anderen, wert Sabdi gheraeckt.

18

Ende doen hy zijn Huys toe bracht, deen Weert nae den anderen, wert geraect Achan de sone Carmi, des soons Sabdi, des soons Serach, wt den stamme Iuda.

19

Ende Iosua sprack tot Achan:^‡ Mijn sone, geeft den HEERE den Gode Israels de eere, ende gheeft hem den Lof, ende gheeft my te kennen: Wat hebt ghi ghedaen? Ende en loochent my daer niet af.

‡ 1.Re. 14.f.43 Ioan. 9.c.24.

20

⁺ Doen antwoorde Achan, Iosua ende sprack: Waerachtelijck ick heb my besondicht aenden HEERE den Godt Israels, alsoo ende alsoo heb ick ghedaen:

+ D vers 20

21

Ick sach onder den roof, eenen costelijcken Babyloonschen mantel, ende twee hondert Sikels siluers, ende een gulden tonghe, vijftich sikels weerdich in ghewichte, dies gheluste my, ende namt, ende siet, het is begrauen in de Aerde, in mijn Hutte, ende dat siluer daer onder.

22

Doen sant Iosua boden henen, die liepen totter Hutten, Ende siet, het was begrauen in zijnder Hutten, ende dat siluer daer onder.

23

Ende si nament wter Hutten, ende brachtent tot Iosua, ende tot allen kinderen Israels, ende leydent voor den HEEre.

24

Doen nam Iosua ende alle Israel met hem, Achan de sone Serah, metten siluer, mantel, ende gulden tonghe, zijne sonen ende dochteren, zijn Ossen ende Ezelen, ende Schapen, zijn Hutte, ende al wat hy hadde, ende voerdense opwaerts int dal Achor.

25

Ende Iosua sprack: De wijle dat ghy ons bedroeft hebt, soo bedroeue v de HEEre in desen daghe. Ende dat gantsche Israel steenden hem, ende verberndense met vier.

26

^† Ende doen syse gesteent hadden, maecten si eenen grooten steenhoop ouer hem, die blijft tot desen daghe toe. Alsoo keerde hem de HEEre vander gramschappen zijns toorens. Daer af hiet de selue plaetse, dat dal Achor, tot desen daghe toe.

† 2.Reg. 18.c.17