Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hoe dat Iericho gewonnen, ingenomen ende verweldicht wort.

1

⁺ MAer^† Ieriho was toeghesloten, ende bewaert, om der kinderen Israels wil, datter niemandt wt oft in comen en cost.

+ A vers 1

† Iosue. 24.c.11

2

Maer de HEERE sprack tot Iosua: Siet daer, ick hebbe Ieriho tsamen met haren Coningen ende Oorloochs lieden in uwe hant ghegheuen.

3

Laet alle Oorloochs mannen, rontom de stadt gaen een mael, ende doet also ses daghen lanck.

4

Maer opten seuenden dach, laet de Priesters seuen Basuynen des Luytiaers nemen, voor de Arcke, ende gaet des seluen

[p. 82r]

seuensten daechs seuenwerf om de stadt, ende laet de Priesters de Basuynen blasen.

5

Ende alsmen des Luytiaers Hoorn blaset, ende het langhe treckt, dat ghy de Basuyne hoort, so sal dat gantsche volck een groot veltgheschrey maken, so sullen der stadt mueren om vallen. Ende dat volck sal daer in vallen, een yeghelijck stracx voor hem.

6

⁺ Doen riep Iosua de sone Nun, de Priesteren, ende sprack tot hen: Draecht de Arcke des verbonts, ende laet seuen Priesters seuen Luytiaers Basuynen dragen, voor de Arcke des HEEren henen.

+ B vers 6

7

Maer totten volck seyde hy: Trect henen ende gaet, om de stadt, ende wie gherustet is, die gae voor de Arcke des HEEren henen.

8

Doen Iosua sulcks den volcke gheseydt hadde, droeghen de Priesters de seuen Luytiaers Basuynen, voor de Arcke des HEEren henen, ende ghinghen, ende bliesen de Basuynen: Ende de Arcke des verbondts des HEEren volchde hen nae:

9

Ende wie gherustet was, die ghinc voor de Priesters henen die de Basuynen bliesen, ende den hoop volchde der Arcken nae, ende blies Basuynen.

10

Maer Iosua geboot den volcke, ende sprack: Ghy en sult gheen veltgheschrey maken, noch uwe stemme laten hooren, noch een woort wt uwen monde gheuen, tot op den dach, wanneer ick tot v segghen sal: Maect een veltghescrey, so maect dan een veltgheschrey.

11

Also ghinck de Arcke des HEEren, rontom de stadt henen eenmael, ende quamen weder inden legher, ende bleuen daer in.

12

Want Iosua plach hem des morghens vroech op te maken, ende de Priesters droeghen de Arcke des HEEren.

13

So droegen de seuen Priesters de seuen Luytiaers Basuynen, voor de Arcke des HEEren henen, ende ghingen ende bliesen de Basuynen.

14

Ende wie gherust was, ghinck voor henen, ende den hoop volchde der Arcken des HEEren, ende blies Basuynen. Des anderen daechs ghinghen si oock eens om de stadt, ende quamen weder inden Legher. Alsoo deden si ses daghen lanck.

15

⁺ Maer opten seuensten dach, doen de morghenstont opghinck, maecten sy hen vroech op, ende ghinghen nae der seluer manieren, seuenwerf om de stadt, also dat si op den seluen eenigen dach, seuenwerf om de stadt quamen.

+ C vers 15

16

Ende ten seuensten mael, doen de Priesters de Basuynen bliesen, sprack Iosua totten volcke: Maect een veltgheschrey. Want de HEERE, heeft v de stadt ghegeuen.

17

Maer dese stadt, ende al watter in is, sal den HEEre verbannen zijn.^† Alleen de hoere Rahab, sal leuende blijuen, ende alle die met haer inden huyse zijn. Want si heeft de Boden verborghen, die wy wt sonden.

† Iosue. 2.c.14.

18

^* Alleen wacht v voor den verbanden goede, op dat ghy v niet en verbannet, (waert dat ghi yet des verbanden goets naemt) ende maecte den Legher Israels verbannet ende brochten tot ongheluck.

* Iosue. 7.a.1.

19

Maer alle dat siluer, ende gout, metten metalen ende ijseren ghereetschap, sal den HEEre gheheylicht zijn, op dattet tot des HEEren schat come.

20

Doen maecten dat volck een veltgheschrey, ende bliesen in de Basuynen. Want als dat volck den clanck der Basuynen hoorde, maecte het een groot veltgescrey.^† Ende de mueren vielen om, ende dat volc clam inde stadt, elck stracx voor hem. Alsoo wonnen si de stadt,

† Hebr. 11.e.30.

21

Ende verbandent^* al wat in de stadt was metter scherpten des Sweerts, beyde Mannen ende Wijuen, Ionghen ende ouden, Ossen, Schapen ende Ezelen.

* Deut. 20.c.16.

22

⁺ Maer Iosua sprac totten twee Mannen die dat lant bespiet hadden: Gaet in dat huys der Hoeren, ende brengt dat wijf van daer herwaerts wt met al dat sy heeft, also ghy haer ghesworen hebt.

+ D vers 22

23

Doen ghinghen de Ionghelinghen, de bespieders daer henen in, ende brachten Rahab daer wt, met haren Vader ende Moeder, ende broederen, al wat si hadde, ende al haer gheslacht, ende lietense buyten den Legher Israel.

24

Maer de stadt verbernden si met vier, ende al wat daer in was, alleen dat siluer ende gout, ende metalen ende ijseren ghereetschap, deden si totten schat in dat huys des HEEren.

25

^† Maer Rahab de Hoere metten huyse haers vaders, ende al wat si hadden, liet Iosua leuen, ende si woont in Israel tot op desen dach, Daerom, dat si de Boden verborghen hadde, die Iosua om te bespieden ghesonden hadde nae Ieriho.

† Hebre. 11.c.31. Iaco. 2.c.25.

26

In die tijt swoer Iosua ende sprack:^† Veruloect sy de man voor den HEEre, die dese stadt Iericho oprecht ende timmert. Als hy haer fondament leydt, dat coste hem sinen eersten soon: Ende als hi haer poorten settet, dat coste hem sinen Ioncsten soon.

† 3.Re. 16.d.27.

27

Also was de HEEre met Iosua, datmen van hem seyde in allen landen.