Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Coninghen aen ghene zijde der Iordanen worden vernedert, dat volc tot Gilgal wordt besneden, Ende sy eten dat Passah ende dat onghesuerde broot.

1

⁺ DOen nv^† alle Coningen der Amoriten, die op ghene zijde der Iordanen teghent Westen woonden, ende alle Coningen der Cananiten aen de zee, hoorden, dat de HEEre dat water der Iordanen had wtgedroocht voor de kinderen Israels, tot dat si daer henen ouer ghinghen, versaechde haer herte, ende daer en was gheenen moet meer in hen, voor de kinderen Israels.

+ A vers 1

† Iosue. 2.b.9. Deut. 28.a.10.

2

Tot dier tijt sprack de HEERE tot Iosua: Maect v^* steenen messen, ende besnijdt de kinderen Israels weder anderwerf.

* Exod. 4.e.25.

3

Doen maecte hem Iosua steenen messen, ende besneet de kinderen Israels, op den Berghe^† Aralot.

† Dat is voorhuyt.

4

Ende dat is de sake, daer Iosua alle dat volc, dat wt Egipten getrocken was, mans namen, om besneet. Want alle Crijschlieden waren ghestoruen inder woestijnen opten wege, doen si wt Egipten trocken,

5

⁺ Want alle dat volck, dat wt trock, was besneden. Maer alle dat volc, dat inder woestijnen geboren was opten wege doen si wt Egipten trocken, dat en was niet besneden:

+ B vers 5

6

Want de kinderen Israels, wandelden veertich iaren inder woestijnen, tot dat al dat volck der Crijschmannen, die wt Egipten ghetrocken waren, verginghen. Daerom dat si de stemme des HEEren niet gehoort en hadden,^† soo hen de HEEre gesworen hadde, dat si dat lant niet sien en souden, welck de HEERE haren vaderen ghesworen had, ons te gheuen, een landt daer Melck ende Honich in vloeyt.

† Num. 14.c.21 d.28.

7

Der seluer kinderen, die in haer plaetse waren opghecomen, besneet Iosua. Want si hadden de voorhuyden noch, ende en waren opten weghe niet besneden.

8

⁺ Ende doen dat gantsche volck besneden was, bleuen si in haer plaetse, inden Legher, tot dat si heel werden.

+ C vers 8

9

Ende de HEERE sprack tot Iosua: Heden heb ick de schande Egipti van v af ghekeert. Ende de selue plaetse werdt Gilgal ghenoemt, tot op desen dach.

10

Ende als de kinderen Israels in Gilgal alsoo den Legher hadden,^‡ hielden si Paesschen opten veerthienden dach der maent, tsauonts, op den velde Ieriho.

‡ Exod. 12.a.3. 23.b.15. Leuit. 23.a.5. Num. 28.c.16. Ezech. 45.c.21 Deut. 16.a.1.

11

Ende aten vanden Coren des lants, opten anderen dach van Paesschen, te weten, ongesuert broot, ende^† versengde Aren, effen des seluen daechs.

† (Sangen) heeft het exempelaer.

12

^* Ende dat Man hielt op, des anderen daechs, doen si des lants Coren aten, dat de kinderen Israels geen Man meer en hadden. Maer si aten vanden Coren des lants Canaan, vanden seluen iare.

* Exo. 16.f.36

13

Ende het gheuiel doen Iosua tot Ieriho was, dat hy zijn ooghen op hief, ende wert ghewaer, dat daer een man teghen hem stont, ende hadde een bloot Sweert in zijn hant. Ende Iosua ghinc tot hem, ende sprack tot hem: Gaet ghy ons aen, oft onsen Vianden?

14

Hy sprack: Neen^† maer ick ben een Vorst ouer dat Heyr des HEEren, ende ben nv ghecomen. Doen viel Iosua op zijn aensicht ter Aerden, ende aenbadt, ende sprack tot hem: Wat seyt mijn Heere zijnen knecht.

† Dan. 10.b.13.

15

Ende de Vorst ouer dat Heyr des HEEren, sprack tot Iosua:^† Treckt wt uwe schoenen, van uwen voeten, want de plaetse daer ghy op staet, is heylich. Ende Iosua dede alsoo.

† Exod. 3.a.5. Act. 7.d.33.