Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Iosua trect metten volcke totter Iordanen, De Leuiten werden gheordineert voor henen te gaen. De Iordaen stont aen deen side stil, ende beneden vloeydet water wech.

1

⁺ ENde Iosua maecte hem vroech op, ende si trocken wt Sittim, ende quamen aen de Iordane, hy ende alle de kinderen Israels, ende bleuen aldaer den nacht ouer, eer si ouer trocken.

+ A vers 1

2

Maer nae drie daghen ghinghen de Hooftlieden door den Legher,

3

Ende gheboden den volcke, ende spraken: Als ghy sien sult de Arcke des verbonts des HEEren ws Gods, ende de Priesters wt den Leuiten haer draghen, soo treckt nv wt van uwe plaetsen, ende volghet haer nae,

4

Also nochtans, dat tusschen v ende haer ruymte sy, by twee duysent ellen. Ghy en sult haer niet ghenaken, op dat ghy wetet, op welcken wech ghy gaen sult, want ghy en hebt dien wech te voren niet ghegaen.

5

Ende Iosua sprack totten volcke:^† Heylighet v, want morgen sal de HEERE eenen wonder onder v doen.

† Leuit. 20.a.7. Num. 11.d.18. 1.Reg. 16.a.5.

6

Ende totten Priesteren sprac hy: Draecht de Arcke des verbonts, ende gaet voor dat volck henen.^+† Doen droeghen si de Arcke des verbonts, ende ghingen voor dat volck henen.

+ B vers 6

† Num. 7.b.9.

7

Ende de HEEre sprack tot Iosua: Heden wil ick beghinnen v groot te maken voor alle Israel, dat si weten,^* gelijck als ick met Mose gheweest ben, dat ick oock alsoo met v ben.

* Iosu. 1.a.5. 4.c.14.

8

Ende ghebiet ghi den Priesteren, die de Arcke des verbonts draghen, ende segt: Als ghy voor aen int water der Iordanen coemt, soo staet stille.

9

Ende Iosua sprac totten kinderen Israels: Herwaerts, ende hoort de woorden des HEEren ws Gods.

10

⁺ Ende sprack: Daer by suldy mercken, dat een leuende Godt onder v is, ende dat hy voor v wt drijuen sal, de Cananiten, Hethiten, Heuiten, Pheresiten, Gergositen, Amoriten, ende Iebusiten.

+ C vers 10

11

Siet, de Arcke des verbonts, des heerschappers, ouer de gantsche werelt, sal voor henen gaen in de Iordane.

12

So neemt nv twaelf mannen wten stammen Israel, wt elcken stam eenen.

13

Als hen dan de voetsolen der Priesters, die des HEEren Arcke des Heerschappers ouer de gheheele werelt draghen, in des Iordaens water laten, so sal hem dat water, dat van bouen nederwaerts vloeyt, inder Iordanen aftrecken, dattet op eenen hoop staende blijue.

14

^+* Doen nv dat volc wt trock, wt sine Hutten, dat si ouer de Iordaen ginghen,^† ende de Priesters de Arcke des verbonts voor den volcke henen droeghen,

+ D vers 14

* Act. 7.f.45.

† Iosue. 4.c.18.

15

Ende aen de Iordane quamen, ende met haer voeten voor int water traden, (^* Maer de Iordaen was vol, aen allen haren Oeueren, den gantschen tijt des oogsts)

* Eccle. 24.d.30

16

Doen^† stont dat water dat van bouen neder quam, op gherecht ouer eenen hoop, seer verre vanden lieden der stadt, die ter zijden Sartan leyt. Maer dat water dat na der zee nederwaert liep, totter Soutzee, dat nam af, ende verliep.^* Alsoo ginc dat volc henen ouer tegen Iericho.

† Psal. 114.a.3.

* Psal. 66.a.6.

17

Ende de Priesters, die de Arcke des verbonts des HEEren droeghen, stonden alsoo int drooghe, midden in de Iordane: Ende alle Israel ghinc drooch door, tot dat allet volc ouer de Iordane quam.