Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hier worden twee verspieders tot Iericho ghesonden, Ende by Rahab de hoer gheherbercht, verborghen ende besaect, ende heymelijck wt ghelaten. Waerom si haer een teeken der toecomender ghenaden gheuen.

1

⁺ IOsua de sone Nun, hadde twee verspieders heymelijck wt gheseynt van Sittim, ende hen gheseyt: Gaet henen, besiet dat Lant ende Ieriho.^† Die ghinghen henen, ende quamen in dat huys eender hoeren, die hiet Rahab, ende laghen aldaer ter herberghe.

+ A vers 1

† Hebre. 11.e.31 Iacob. 2.c.25.

2

Doen werdt den Coninck tot Ieriho geseyt: Siet, hier zijn in deser nacht mannen in ghecomen, vanden kinderen Israels, dat Lant te bespieden.

3

Doen seynde de Coninck te Ieriho tot Rahab, ende liet haer seggen: Brengt de mannen hier wt, die tot v, in v huys gecomen zijn: Want si zijn gecomen om alle dat Lant te bespieden.

4

Maer dat Wijf verberch die twee mannen, ende sprack alsoo: Daer zijn ymmer mannen tot my in comen: Maer ick en wist niet van waer si waren.

5

Ende doemen de Poorte toe wilde sluyten, doent duyster was, ghinghen si wt, dat ick niet en weet, waer si henen ghegaen zijn. Iaghet hen haestelijck nae, want ghy sultse vanghen.

6

Maer si lietse op dat dack climmen, ende bedectese onder dat vlasch, dat si haer op dat dack wtghebreyt hadde.

7

⁺ Maer de Mannen iaechden hen nae, op den wech totter Iordanen tot aent veer. Ende men sloot de Poorte toe, doen die wt waren, die hen nae iaechden.

+ B vers 7

8

Ende eer hen de Mannen te slapen leyden, clam si op tot hen op dat dack, ende sprac tot hen:

9

Ick wetet dat de HEEre v dit Lant ghegeuen heeft.^* Want een verschrickinghe is op ons gheuallen van uwen twegen, ende alle Inwoonders des Lants zijn van uwer toecoemst versaecht gheworden.

* Deut. 28.a.10. Iosue. 5.a.1.

10

Want wy hebben ghehoort,^† hoe dat de HEEre dat water in de Roode zee wt ghedroocht heeft voor v, doe ghy wt Egipten trockt.^* Ende wat ghy den twee Coninghen der Amoriten, Sihon ende Og, op geen side der Iordanen ghedaen hebt, hoe ghyse verbannen hebt.

† Exod. 14.e.21 Iosue. 9.b.9.

* Nu. 21.d.24 e.33.

11

Ende sint dat wy sulcx ghehoort hebben, is onse herte versaecht, ende daer en is gheenen oprechten moet meer in yemanden, om uwer toecoemst. Wandt de HEEre uwe Godt, is een Godt, beyde bouen inden Hemel, ende onder opter Aerden.

12

⁺ Dus sweret my nv^† byden HEEre, dat, naeden male dat ick ontfermherticheyt aen v gedaen hebbe,^* dat ghy ooc wederom aen mijns Vaders huys ontfermherticheyt doet. Ende geuet my een waerteeken,

+ C vers 12

† Iudic. 1.e.24.

* Deut. 10.d.20.

13

Dat ghy leuen latet mijnen Vader, mijn Moeder, mijn Broeders, ende mijn Susters, ende al wat sy hebben, ende behout onse sielen vanden doot.

14

De Mannen spraken tot haer:^† En doen wy gheen bermherticheydt ende trouwe aen v, als ons de HEEre dit Lant gheeft, soo sal onse siel voor v des doots zijn, also verre als ghy onsen aenslach niet en verraet.

† Iosue. 6.c.17.

15

^* Doen liet si de selue aen een seel neder doort venster. Want haer huys was aender stadt mueren, ende si woonde ooc op de mueren. Ende si sprack tot hen:

* 1.Reg. 19.c.12. Acto. 9.c.25.

6[16]

Gaet op dat gheberchte, op dat sy v niet en ontmoeten die v na iagen, ende verberghet v aldaer drie daghen, tot dat die weder comen, die v nae iaghen, daer nae gaet uwer straten.

17

⁺ Maer de mannen seyden tot haer: Mer wy willen des eets ontslaghen zijn, den welcken ghy van ons ghenomen hebt,

+ D vers 17

18

Als wy int landt comen, ende ghy dit roode Seel niet in dat venster en knoopt, daer ghy ons mede neder ghelaten hebt. Ende tot v int huys vergadert, uwen vader, uwe moeder, uwe broeders, ende alle ws vaders huys.

19

Ende soo wie ter dueren ws huys wt gaet, des bloet sy op zijn hooft, ende wy ontschuldich. Maer alle der gheenre die in uwen huyse zijn, ist dat een hant aen hen geslegen wert, so sal haer bloet op onsen hoofde zijn.

20

Ende ist dat ghy yet van desen onsen aenslage na sult seggen, so willen wy des eedts ontsleghen zijn, dien ghy van ons genomen hebt.

21

Sy sprac: Het sy soo ghy segt, ende lietse gaen. Ende si ghinghen henen, ende si knoopte dat roode Seel int venster.

22

Maer si ghingen wech, ende quamen opt geberchte, ende bleuen aldaer drie daghen lanck, tot dat die weder quamen die hen nae iaechden. Want si haddense ghesocht, op alle straten, ende doch niet gheuonden.

23

Also keerden die twee Mannen weder, ende gingen vanden geberchte, ende voeren ouer, ende quamen tot Iosua

[p. 81r]

den sone Nun. Ende vertelden hen alle dinck, soo zijt beuonden hadden,

24

Ende seyden tot Iosua:^† De HEERE heeft ons alle dat Landt in onsen handen ghegheuen. Oock soo zijn alle Inwoonders des Lants verbaest voor ons.

† Iudi. 7.e.15.