Den Bibel, Inhoudende dat Oude ende Nieuwe Testament (Biestkensbijbel)

Dat Boeck Iosua.

¶ Dat eerste Capittel.

¶ Nae de doot Mose ghebiet Godt Iosua, dat hy hem soude op schicken, ende metten Volcke int beloofde Lant ouer de Iordaen trecken.

1

⁺ NAe den doot Mose des knechts des HEEren sprack de HEEre tot Iosua,⁺ den sone Nun Moses dienaer:

+ A vers 1

+ Exod. 33.c.

2

Mijn knecht Mose is gestoruen. So maect v nv op, ende trect ouer dese Iordaen, ghy ende dit gantsche Volck, in dat Landt, dat ic hen, den kinderen Israels ghegheuen hebbe.

3

^† Alle plaetse daer uwe Voetsolen op sullen treden,

† Deut. 11.d.24 Iosue. 14.c.19

4

Heb ick v ghegheuen, so ic Mose gheseyt hebbe. Vander woestijnen aen, ende desen Libano totten grooten water Phrath toe. Dat gheheele Lant der Hethiten, tot aen de groote zee teghent Westen, sullen uwe palen zijn.

5

Niemandt en sal v wederstaen v leuen lanck. Alsoo ick met Mose gheweest ben, also wil ick oock met v zijn.^* Ick en wil v niet verlaten, noch van v wijcken.

* Iosue. 3.b.7. Deut. 31.b.6. Hebre. 13.a.5.

6

^† Sijt ghetroost ende weest onuersaecht: Want ghy sult desen volcke dat Lant wt deylen, dat ick haren Vaderen gesworen hebbe, dat ict hen gheuen woude.

† Deut. 31.f.23

7

^+* Hebt slechts eenen goeden moet, ende weest gheheel vrijmoedich, dat ghy houdet, ende doet, altemale nae de Wet, die v Mose mijn knecht gheboden heeft.^* En wijckt daer niet af, noch ter rechter noch ter slincker hant, op dat ghy cloeckelijck handelen muecht, in al tghene dat ghy doen sult.

+ B vers 7

* Deut. 31.b.7.

* Deut. 12.d.32. Prou. 4.c.27

8

^† Ende en laet dat Boeck van deser Wet van uwen monde niet comen,^* mer ouerdencket dach ende nacht, op dat ghijt altemael hout, ende doet, nae dien dat daer inne geschreuen staet. Als dan salt v wel ghelucken in al tghene dat ghy doet, ende sult wijsselijck handelen connen.

† Deu. 17.d.24

* Psalm. 1.a.2

9

Siet, ick heb v gheboden dat ghy eenen goeden moet hebbet ende vrijmoedich zijt. En laet v niet grouwelen, ende en ontset v niet. Want de HEEre uwe Godt, is met v in al tghene dat ghy doen sult.

10

Doen geboot Iosua den Hooftlieden des volcx ende sprack:

11

Gaet door den Legher, ende ghebiet den Volcke, ende segt: Bereyt v^* victalie. Want nae drie dagen suldy ouer dese Iordane gaen, op dat ghy in coempt, ende dat Landt in nemet, dat v de HEERE uwe Godt gheuen sal.

* Prouisie, Prouande.

12

⁺ Ende totten Rubeniten, Gaditen, ende den haluen stamme Manasse sprac Iosua:

+ C vers 12

[p. 80v]

13

^† Gedenct des woorts, dat v Mose de knecht des HEEREN seyde, ende sprac: De HEEre uwe God, heeft v tot ruste ghebracht, ende dit Lant ghegheuen.

† Num. 32.d.20 Iosue. 4.c.12.

14

Vwe vrouwen, ende Kinderen, ende Vee, laet inden lande blijuen dat v Mose ghegeuen heeft, op dese side der Iordanen. Maer ghy sult voor uwe broeders henen trecken ghewapent, wat strijtbaer Mannen zijn, ende hen helpen,

15

Tot dat de HEEre uwe broeders oock tot ruste brengt, ghelijck v, dat si dat Lant oock in nemen, dat hen de HEERE uwe God gheuen sal. Als dan sult ghy wederom keeren in uwe Landt, dat v Mose de Knecht des HEEren in ghegeuen heeft te besitten, op dese side der Iordanen teghen der Sonnen opganck.

16

Ende si antwoorden Iosua, ende seyden:^† Alle wat ghy ons gheboden hebt, dat willen wy doen, ende werwaerts ghy ons seynt, derwaerts willen wy gaen.

† Deut. 5.d.27. 1.mac. 2.d.34. Iere. 42.a.5. Exod. 19.d.8. 24.a.3.

17

Ghelijck als wy Mose ghehoorsaem hebben gheweest, so willen wy v ooc gehoorsaem zijn. Alleen dat de HEEre uwe God, slechts met v sy, so hy met Mose was.

18

Wie uwen monde ongehoorsaem is, ende uwen woorden gheen ghehoor en gheeft, in alle dat ghy ons ghebiet, die sal steruen. Hebt slechts eenen goeden moet, ende weest onuersaecht.