Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiiij. Capittel.

¶ Moses climt opten Berch, ende sterft daer. Ende hy wert vanden kinderen Israels beweent.

1

⁺ ENde Mose ghinc vanden velde der Moabiten,^† opten berch Nebo, opten Top des gheberchts Pisga, tegen Ieriho ouer. Ende de HEEre toonde hem dat gheheele Lant Gilead, tot Dan toe,

+ A vers 1

† Num. 27.c.11. 2.Mac. 2.a.4

2

Ende gheheel Naphthali, ende dat Lant Ephraim ende Manasse, ende dat gheheele Lant Iuda, tot aen de wterste zee,

3

Ende teghent Suyden, ende de Contreyen der breetheden Ieriho der Palmen stadt, tot Soar toe.

4

Ende de HEEre sprack tot hem:⁺ Dit is dat Lant, dat ic Abraham, Isaac ende Iacob ghesworen heb, segghende: Ick wil dat uwen sade gheuen. Ghy hebbet met uwen ooghen

+ Genes. 12.b.7. 13.d.15. 15.d.18 26.a.4.

[p. 80r]

ghesien,^* maer ghy en sulter niet ouer gaen.

* Num. 20.b.10

5

⁺ Aldus sterf Mose de Knecht des HEEren aldaer, inder Moabiten Lant, nae den Woorde des HEEren.

+ B vers 5

6

Ende hy begroef hem in dat dal, inder Moabiten Lant, teghen dat huys Peor.^* Ende niemandt en heeft zijn Graf vernomen, tot opten dach van heden.

* Iude. b.9.

7

Ende Moses was hondert ende twintich iaer out, doen hy sterf. Sijn oogen en waren niet doncker gheworden, ende zijn cracht en was niet veruallen.

8

^† Ende de kinderen Israels beweenden Mose inder Moabiten velt, dertich dagen. Ende de dagen des Weenens ende Clagens ouer Mose werden veruult.

† Num. 20.d.29

9

⁺ Maer Iosua Nuns soon werdt veruult metten Gheest der wijsheyt:^† Want Mose hadde zijn handen om hem geleyt. Ende de kinderen Israels hoorden hem, ende deden soo de HEEre Mose gheboden hadde.

+ C vers 9

† Num. 27.d.22

10

^† Ende daer en stont naemaels gheen Propheet in Israel op, als Mose, den welcken de HEEre ghekent hadde van aenghesichte tot aengesichte,

† Deut. 18.c.15.

11

Tot alderley Teekenen ende Wonderen, daer hem de HEERE toe sant, dat hyse dede in Egipten Lant, aen Pharao, ende aen alle sine knechten, ende aen alle zijn Lant,

12

Ende tot alle dese machtighe hant, ende groote gesichten, die Mose dede voor de ooghen des gheheelen Israels.

¶ De Eynden der vijf Boecken Mose.