Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxj. Capittel.

¶ Iosua wert in Moses plaetse den volcke tot eenen Ouersten ghegeuen. Een Prophetie van toecomende ouertredinghen, ende daer by de straffinghe.

1

⁺ ENde Mose ghinck henen, ende sprack dese woorden met den gantschen Israel, ende sprack tot hen:

+ A vers 1

2

Ick ben heden hondert ende twintich Iaer out. Ick en can niet meer wt ende in gaen.^† Daer toe heeft de HEERE tot my gheseyt: Ghy en sult niet ouer desen Iordaen gaen.

† Nu. 20.b.12. Deut. 3.e.26.

3

De HEERE uwe God, sal seluer voor v henen gaen. Hy sal selue dese volcken voor v verdoen, dat ghyse inneemt.^† Iosua die sal voor v henen ouer gaen, so de HEEre gheseyt heeft.

† Num. 27.c.18.

4

Ende de HEEre sal hen doen, so hy^† Sihon ende Og den Coninghen der Amoriten, ende haren Lande ghedaen heeft, de welcke hy verdaen heeft.

† Nu. 21.d.24.e.33.

5

^* Wanneerse nv de HEERE voor v gheuen sal, soo suldy hen doen nae alle dat ghebot dat ick v gheboden hebbe.

* Deut. 7.a.5. 20.c.16.

6

^+† Weest goets moets ende onuersaecht: En vreest v niet, ende en laet v voor hen niet grouwelen. Want de HEEre uwe God, sal selue met v wandelen,^* ende en sal de hant niet af trecken, noch v verlaten.

+ B vers 6

† Esai. 35.a.4.

* Iosue. 1.a.5. Hebre. 13.a.5.

7

Ende Mose riep Iosua, ende sprack tot hem voor den ooghen des gantschen Israels:^† Sijt goets moets ende onuersaecht: Want ghy sult dit volck int lant brenghen, dat de HEEre haren Vaderen ghesworen heeft, hen te gheuen, ende ghy sullet onder hen wt deylen.

† Iosue. 1.b.7. 3.Reg. 2.a.2.

8

Maer de HEERE die selue voor v henen gaet, die sal met v zijn, ende en sal de Hant niet aftrecken, noch v verlaten. En vreest v niet, ende en verschrict niet.

9

Ende Mose schreef dese Wet, ende gaft den Priesteren, den kinderen Leui,^* die de Arcke des verbonts des HEEREN droeghen, ende al den Ouderen Israels,

* Num. 3. 4.

10

⁺ Ende gheboot hen ende sprac:^† Ouer seuen Iaer, ter tijt des Vrijiaers, inde feest der Loouerhutten,

+ C vers 10

† 2.Esd. 8.a.3.

11

Als alle dat Israel coemt, om te openbaren voor den HEEre uwen God, in de plaetse die hy verkiesen sal, so suldy dese Wet voor alle Israel laten wtroepen, voor haren ooren,

12

Te weten, voor de vergaderinge des volcx, beyde der Mannen ende der Wijuen, Kinderen, ende ws vreemdelincx, die in uwer poorten is, op dat zijt hooren ende leeren, op dat si den HEEre haren God vreesen, ende houden, dat si alle de woorden deser Wet doen.

13

Ende dattet hare kinderen, diet niet en weten, oock hooren ende leeren, op dat sy den HEERE uwen Godt vreesen, alle uwe leefdaghen die ghy op den Lande leeft, daer ghy in gaet, ouer de Iordaen, om het in te nemen.

14

⁺ Ende de HEERE sprack tot Mose: Siet, uwen tijt is hier by ghecomen, dat ghy sterft. Ontbiet Iosua, ende treedt in de Hutte des ghetuychenis, dat ick hem beuel doe. Mose ghinck henen met Iosua, ende traden in de Hutte des ghetuychenis.

+ D vers 14

15

Ende de HEERE openbaerde in de Hutte, in een Wolcken columne,^* ende die selue Wolckencolumne stont inder Huttenduere.

* Exod. 33.b.9.

16

Ende de HEEre sprack tot Mose: Siet, ghi sult slapen met uwen Vaderen. Ende dit volck sal op comen, ende sal vreemde Goden na hoereren des Lants, daer si in comen,^* ende sal my laten, ende laten dat verbont varen, dat welck ick met hen ghemaect hebbe.

* 1.Reg. 8.b.7.

[p. 78v]

17

Soo sal mijnen toren vergrammen, ouer hen ter seluer tijt, ende salse verlaten, ende mijn aensicht voor hen verberghen, dat si verteert worden.^* Ende alsse dan veel onghelucx ende ancxt beuangen sal, soo sullen sy segghen: Is my alle dit quaet niet ghebuert, de wijle mijn Godt met my niet en is?

* Iere. 2.d.24.

18

Maer ic sal mijn aensicht verbergen, tot dier tijt, om allet quaets wille, dat sy ghedaen hebben, dat si hen tot ander Goden ghekeert hebben.

19

⁺ So scrijft v nv dit Liet ende leeret den kinderen Israels, ende legghet in haren mont,^† dat my dat Liet een ghetuyghe sy onder den kinderen Israels.

+ E vers 19

† Deut. 32.a.1.

20

Want ick wilse int Lant brenghen, dat ick haren vaderen ghesworen heb, daer Melck ende Honich in vloeyt.^* Ende als si eten ende sadt, ende vet worden, so sullen si hen tot andere goden keeren, ende hen dienen, ende my lasteren, ende laten mijn verbont varen.

* Deut. 8.c.14. Prou. 30.a.9.

21

Ende als hen dan veel onghelucx ende ancxt ontmoeten sal, so sal dit Liet hen antwoorden, tot een getuychenis. Want ten sal niet vergeten worden wten monde haers saets. Want ick weet haer ghedachten, daer si nv alreede mede omgaen, eer dat icse int Lant brenghe, dat ic ghesworen hebbe.

22

Alsoo schreef Mose dit Liet ter seluer tijt, ende leerdet den kinderen Israels.

23

⁺ Ende beual Iosua Nuns soon, segghende:^† Weest goets moets ende onuersaecht. Want ghy sult den kinderen Israels in dat Lant leyden, dat ick hen ghesworen heb, ende ick wil met v zijn.

+ F vers 23

† Iosue. 1.b.7. 3.Reg. 2.a.2.

24

^* Doen nv Mose de woorden van deser Wet gheheel wt ghescreuen hadde in eenen boeck,

* Deut. 10.a.5.

25

Gheboot hy den Leuiten, die de Arcke des ghetuychenis des HEEren droeghen, seggende:

26

Neemt dat Boeck van deser Wet, ende legghet aen de zijde vander Arcken des verbonts des HEEren ws Godts, dattet aldaer een ghetuyghe sy teghen v.

27

Want ick kenne v^* onghehoorsaemheyt ende hertneckicheyt. Siet, want heden de wijle dat ick met v leue, sydy onghehoorsaem gheweest teghen den HEEre. Hoe veel te meer, nae mijnder doot?

* 4.Re. 17.c.14 Mala. 3.b.7.

28

⁺ Soo vergadert nv voor my alle de Outsten van uwen stammen, ende uwe Officiers, dat ick dese woorden voor haren ooren spreke,^† ende Hemel ende Aerde teghen hen tot ghetuyghe neme.

+ G vers 28

† Deut. 4.d.26 30.d.19.

29

Want ick wetet, dat ghijt na mijnen doot verderuen sult, ende wt den weghe treden, den welcken ick v gheboden heb. Ende dan sal v ongheluck ouer comen hier nae, daerom dat ghy qualijck ghedaen hebt, voor de oogen des HEEren, dat ghy hem vertorent door de wercken uwer handen.

30

Aldus sprack Mose de woorden vandesen Liet, gheheel wt, voor de ooren der gheheelder Menichten Israels.