Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxx. Capittel.

¶ Van des HEEREN bermherticheyt, In dien si anders oprecht zijn, oft haer bekeeren. Ende van zijnder straffinghe, Indien sy niet ghehoorsaem en zijn.

1

⁺ ALs dit nv al op v coemt, het sy de ghebenedijnghe oft de vermaledijdinghe, die ick v voor gheleyt hebbe,^† ende in uwer herten gaet, waer dat ghy zijt onder de Heydenen, daer v de HEERE uwe Godt henen verstooten heeft,

+ A vers 1

† 3.Reg. 8.e.33. 2.Par. 33.c.12.

2

^† Ende bekeert v totten HEEre uwen God, dat ghy sine stemme hoort, ghy ende uwe kinderen, van gheheelder herten, ende van gheheelder sielen, in al dat ick v heden ghebiede.

† 2.Par. 6.g.37 Iob. 8.a.5.

3

^‡ So sal de HEEre uwe Godt, uwe gheuanckenisse keeren, ende uwer ontfermen, ende sal v weder vergaderen wt allen volcken, daer v de HEERE uwe Godt henen verstroeyt heeft.

‡ Iere. 32.e.37.

4

Al waerdy^* aen des Hemels eynde verstooten, so sal v toch de HEEre uwe Godt van daer vergaderen, ende halen v van daer.

* 2.Mach. 1.e.29. 2.c.18.

5

Ende hy sal v in dat Lant brenghen, dat uwe vaderen beseten hebben, ende ghy sullet in nemen, ende hy sal v wel doen, ende v vermeerderen bouen uwe vaderen.

6

^+† Ende de HEEre uwe Godt sal v hert besnijden, ende dat herte ws saets, dat ghy den HEERE uwen Godt lief hebbet van gantscher herten, ende van gantscher sielen,

+ B vers 6

† Deut. 10.d.16.

7

Op dat ghy leuen muecht. Maer alle dese vermaledijdinghen sal de HEEre uwe Godt op uwe vianden legghen, ende op de ghene, die v haten ende veruolghen.

[p. 78r]

8

Maer ghy sult v bekeeren, ende de stemme ws HEEren hooren, dat ghy doet alle zijn geboden, die ic v heden gebiede.

9

Ende de HEERE uwe Godt, sal v gheluck gheuen in alle de wercken uwer handen. Aen de vrucht ws lichaems, aen de vrucht ws vees, aen de vrucht ws lants, dattet v te goede come.^† Want de HEEre sal hem keeren, dat hy hem van v verblije v te goede, alsoo hy hem verhuecht heeft van uwen Vaderen,

† Iere. 32.e.41.

10

⁺ Daeromme, dat ghy de stemme des HEEren ws Gods hoort, houdende zijn geboden ende Rechten, die geschreuen staen in dat Boeck van deser Wet, ist dat ghy v bekeeren sult totten HEEre uwen Godt, van gantscher herten ende van gantscher sielen.

+ C vers 10

11

Want dat ghebot, dat ick v heden ghebiede, en is v niet verborghen, noch te verre,

12

Noch inden Hemel, dat ghy mocht seggen:^* Wie wil ons inden Hemel varen, ende halen ons, dat wijt hooren ende doen?

* Rom. 10.a.6.

13

Het en is oock niet ouer geen zijde vander zee, dat ghi muecht segghen: Wie wil ons ouer de zee varen, ende halen ons, dat wijt hooren ende doen?

14

Want dat woort is seer nae by v, in uwen mont, ende in uwer herten, dat ghijt doet.

15

Siet,^‡ ic hebbe v heden voor geleyt, dat leuen ende dat goet, den doot ende dat quade,

‡ Deut. 11.d.26. Iere. 21.b.8. Eccle. 15.c.22.

16

Die ick v heden ghebiede, dat ghy den HEEre uwen God lief hebbet, ende wandelt in sine weghen, ende sine geboden, Wetten ende Rechten houdet, ende leuen muecht, ende vermeerdert wordet, ende v de HEEre uwe God ghebenedije, inden Lande daer ghy in trect, om dat selue in te nemen.

17

⁺ Maer ist dat ghy v herte keert, ende en hoort niet, maer laet v verleyden, dat ghy ander goden aenbidt ende hen dient:

+ D vers 17

18

So vercondighe ick v heden, dat ghy vergaen sult, ende niet lange in dat Lant blijuen, daer ghy henen in treckt, ouer de Iordaen, om dat selue in te nemen.

19

^† Ick neme Hemel ende Aerde heden ouer v tot ghetuyghen. Ick hebbe v dat Leuen ende den doot, ghebenedijnghe ende vermaledijdinge voor gheleyt,^* dat ghy dat leuen kiest, ende ghy, ende v saet, leuen muecht.

† Deut. 4.d.26 31.g.28.

* 4.esd. 7.d.59.

20

Dat ghy den HEERE uwen Godt lief hebt, ende zijn stemme hoort, ende hem aen hanghet. Want dat is uwe leuen, ende uwen langhen ouderdom, dat ghy inden lande woonet, dat de HEEre uwen vaderen, Abraham, Isaac ende Iacob ghesworen heeft, hen te gheuen.