Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ Het verbont wort vernieut inden Lande Moab, Ende Moses vermaent haer de goedertierenheyt Gods, Ende datse opten HEEre haer vast blijuen betrouwende.

1

⁺ DIt zijn de woorden des verbonts, dat de HEERE Mosi gheboden heeft te maken metten kinderen Israels,^† inder Moabiten Lant ten anderen mael,^* nae dien hy dat selue met hen ghemaect hadde in Horeb.

+ A vers 1

† Num. 21.e.36.

* Exod. 19.a.5

2

Ende Mose riep alle Israel, ende sprac tot hen: Ghy hebt ghesien, al wat de HEEre ghedaen heeft in Egipten, voor uwen oogen, den Pharaoni tsamen met alle sinen knechten, ende allen sinen Lande.

3

De groote versueckinghen, die welcke dat uwe ooghen ghesien hebben, dattet groote teeckenen ende wonderen waren.

4

Ende^* de HEEre en heeft v tot op den dach van heden noch niet ghegeuen een herte, dat verstandich ware, ooghen die daer sagen, ende ooren die daer hoorden.

* Deut. 30.b.6. Iere. 31.e.33. 32.e.39.

5

Hy heeft v veertich Iaren in de woestijne laten wandelen:^* Vwe cleederen en zijn aen v niet veroudert, ende uwen schoen en is niet out gheworden aen uwen voet.

* Deut. 8.a.4.

6

Ghy en hebt gheen broot gheten, ende gheenen wijn ghedroncken, noch stercken dranc, op dat ghy weet, dat ic de HEERE uwe Godt ben.

7

⁺ Ende doen ghy quaemt in dese plaetse,^† trock de Coninc Sihon tot Hesbon,

+ B vers 7

† Nu. 21.d.23. Deut. 2.f.31. 3.a.1.

[p. 77v]

wt,^* ende de Coninck Og tot Basan, ons teghen, om teghen ons te strijden. Ende wy hebbense gheslaghen,

* Num. 21.e.33.

8

Ende haer Lant in genomen, ende tot eenen erfdeel ghegheuen den Rubeniten ende Gadditen, ende den haluen stamme der Manassiten.

9

^† So hout nv de woorden van desen verbonde ende doet daer nae, op dat ghy wijsselijc handelen muecht in al dat ghy doet.

† Deut. 4.a.1.

10

Ghy staet heden alle voor den HEEre uwen Godt, de Ouerste van uwen stammen, uwe Ouders, uwe Officiers, een yegelijck in Israel:

11

Vwe kinderen, uwe wijuen, uwe vreemdelinck die in uwen Legher is,^† beyde uwen houthouwer ende uwe waterdraghers,

† Iosue. 9.c.21.

12

Dat ghy gaen sult in dat verbont des HEEren ws Gods, ende inden Eedt, dat welcke de HEERE uwe GOD heden met v maect.

13

Op dat hy v heden hem oprechten soude tot eenen Volcke, ende hy uwe God sy, soo hy v gheseyt heeft,^* ende soo hy uwen vaderen, Abraham, Isaac ende Iacob ghesworen heeft.

* Gene. 17.b.7.

14

Want ick en make dit verbont ende desen Eedt niet alleen met v,

15

Maer ooc beyde met v, die ghy heden hier zijt, ende met ons staet voor den HEEre onsen Godt, ende metten ghenen, die heden met ons niet en zijn.

16

⁺ Want ghi wetet, hoe wy in Egiptten Lant gewoont hebben, ende midden door de Heydenen ghetrocken zijn, door den welcken ghy troct,

+ C vers 16

17

Ende saecht haren grouwel, ende hare Afgoden, hout ende steen, siluer ende gout, die by hen waren.

18

Dat niet misschien eenich Man, oft een Wijf, oft eenich ghesin, oft eenighen stamme onder v en sy, wiens herte hem heden vanden HEEre onsen God afgekeert hebbe, dattet henen gae, ende diene den Goden van desen volcken, ende worde misschien een wortel onder v,^* die daer Galle ende Alssen draghe.

* Act. 8.b.22.

19

Ende oft hy al schoon de woorden van dese vermaledijdinge hoort, ende nochtans hem ghebenedijt in zijn herte, ende spreect: Het gaet my wel,^* de wijle ick wandele, alsoo alst mijnder herten dunct. Op dat den droncken metten dorstighen verloren worde.

* Deut. 12.a.8.

20

Ende dan en sal de HEEre den ghenen niet genadich zijn, maer dan sal sinen toorne, ende ijuer roocken ouer alsulcken man, ende alle vermaledijdinghen sullen op hem comen, die in desen Boeck gheschreuen zijn.

21

Ende de HEEre sal sinen naem wtdoen onder den Hemel, ende sal hem^* afscheyden tot ongheluck, wt alle stammen Israels, na dat inhouden van alle de vermaledijdinghen des verbonts, dat inden Boeck van deser Wet gheschreuen is.

* Afsonderen.

22

Soo sullen dan segghen de Nacomelinghen van uwen kinderen, die na v op comen sullen, ende die Vreemde, die wt verren landen comen, als sy de plaghen van desen Landen sien, ende de siecten, daer mede datse de HEERE beladen heeft.

23

⁺ Dat hy alle haer Lant met Solfer ende Sout verbrant heeft, dattet niet besaeyt en mach worden, noch en wast, noch dat gheen cruyt daer in op en gaet.^* Ghelijck Sodoma ende Gomorra, Adama ende Seboim omghekeert zijn, de welcke de HEERE in sinen toren ende gramschappe omghekeert heeft.

+ D vers 23

* Gen. 19.c.24. Hozee. 11.b.8.

24

^* Soo sullen alle volcken segghen: Waerom heeft de HEEre desen Lande alsoo ghedaen? Wat is dat voor een soo grooten grammighen tooren?

* Iere. 22.b.8. 3.Reg. 9.b.8.

25

Soo salmen segghen: Daeromme, dat si dat verbont des HEEren des Gods verlaten hebben, dat welcke hy met hen maecte, doen hyse wt Egipten Lant leyde.

26

Ende zijn henen ghegaen, ende hebben andere Goden ghedient, ende hebbense aenghebeden: Alsulcke Goden, die si niet en kennen, ende die hen niet ghegheuen en hebben.

27

Daerom is des HEEren toren vergramt op dit lant, olsoo dat hy ouer haer heeft laten comen, alle de vermaledijdinghen, die in dit boeck gheschreuen staen.

28

Ende de HEERE heeftse wt haren lande gestooten, met groten toren, gramschappen ende onghenaden, ende heeftse in een ander Lant gheworpen, gelijct staet heden ten daghe.

29

^* De Heymelijckheyt des HEEren ons Godts is ons ende onsen kinderen gheopenbaert eewelijck, dat wy doen sullen, alle de woorden van deser Wet.

* 1.Cor. 4.a.1.