Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Hoe datmen steenen op ghene sijde der Iordanen oprechten sal, ende daer op de gheboden des Heeren schrijuen sal. Hoemen op de twee Bergen goet ende quaet wunschen sal.

1

⁺ ENde Mose geboot tsamen met den Ouders Israels, den volcke ende sprack: Bewaert alle gheboden, die ick v heden ghebiede.

+ A vers 1

2

Ende tot dier tijt, als ghy ouer de Iordane gaet in dat landt dat v de HEEre uwe Godt gheuen sal,^* so suldy groote steenen oprech-

* Iosue. 4.a.3.

[p. 76r]

ten, ende plaesterense met kalck.

3

Ende schrijuen daer op alle de woorden van deser Wet, als ghy daer ouer coemt, op dat ghy coemt in dat lant, dat v de HEEre uwe Godt gheuen sal. Een landt daer Melck ende Honich in vloeyt. Alsoo v de HEEre uwer Vaderen Godt, gheseyt heeft.

4

Als ghy nv ouer de Iordane gaet, so suldy alsulcke steenen oprechten (daer ick v heden af ghebiede) opten Berch Ebal, ende met Calck plaesteren.

5

^† Ende ghy sult aldaer den HEEre uwen Gode eenen steenen Altaer bouwen, daer gheen ijser op en coemt.

† Iosu. 8.g.30.

6

^* Van heelen steenen suldy desen Altaer den HEERE uwen Gode bouwen, ende Brantoffer daer op offeren den HEEre uwen Gode,

* Exo. 20.d.25. 1.Mach. 4.f.47.

7

Ende sult Danckoffer offeren, ende aldaer eten, ende vrolijck zijn voor den HEEre uwen Godt.

8

Ende ghy sult op de steenen schrijuen alle de woorden van deser Wet, claer ende bediedelijck.

9

⁺ Ende Mose metten Priesteren, ende Leuiten, spraken tot alle Israel ende seyden: Merckt, ende hoort toe, Israel: Heden op desen dach sydy gheworden een volck des HEEren ws Godts,

+ B vers 9

10

Dat ghy der stemmen des HEEren ws Godts ghehoorsaem zijt, ende doet nae zijn gheboden ende Rechten, die ick v heden ghebiede.

11

Ende Mose geboot den volcke inden seluen daghe, ende sprack:

12

^† Dese sullen staen opten Berch Grisim, om te ghebenedijen dat volck, als ghy ouer de Iordane ghegaen zijt: Symeon, Leui, Iuda, Isaschar, Ioseph ende BenIamin.

† Deut. 11.d.28. Iosu. 8.g.33.

13

Ende dese sullen staen opten Berch Ebal, om te vermaledijen: Ruben, Gad, Asser, Sebulon, Dan ende Naphthali.

14

Ende de Leuiten sullen beginnen ende segghen, tot alle man van Israel, met luyder stemmen.

15

^* Vermaledijt si, wie eenen^† Afgodt oft ghegoten Beelt maeckt, een grouwel des HEEren,^* een werc der werckmeesters handen, ende settet verborghen.

* Veruloeckt.

† Exo. 20.a.4.

* Esa. 57.a.6.

16

Ende alle dat volck sal antwoorden, ende segghen, Amen.

17

⁺ Vermaledijt si,^* wie zijn Vader oft Moeder vloeckt. Ende al dat volck sal segghen, Amen.

+ C vers 17

* Exo. 21.b.17.

18

^* Vermaledijt si, wie zijns naesten Palen engher maeckt. Ende al dat volck sal segghen, Amen.

* Deu. 19.c.14.

19

Vermaledyt si, wie^† eenen blinden doet dolen inden wege. Ende al dat volck sal segghen, Amen.

† Leui. 19.d.14

20

Vermaledijt si,^† wie dat recht des vreemdelinghen, des Weesen, ende der Weduwen buycht. Ende al dat volc sal segghen, Amen.

† Deu. 24.c.17.

21

Vermaledijt si,^* wie by zijns Vaders Wijf leyt, dat hy ontdect dat decsel zijns vaders. Ende al dat volck sal segghen, Amen.

* Leuit. 18.a.8. 20.b.11. Deut. 22.d.30.

22

Vermaledijt si, wie by eenich^† Vee leyt. Ende al dat volck sal segghen, Amen.

† Exod. 22.c.19. Leui. 20.b.15. Leuit. 18.c.23.

23

Vermaledijt si,^* wie by zijn Suster leyt, die zijns Vaders oft zijns Moeders dochter is. Ende al dat volck sal seggen, Amen.

* 2.re. 13.d.14

24

Vermaledijt si, wie by zijns Wijfs^‡ Moeder leyt. Ende al dat volck sal segghen, Amen.

‡ Leui. 20.b.14

25

Vermaledijt si,^* wie sinen naesten heymelijck slaet. Ende al dat volck sal segghen, Amen.

* Exod. 21.b.12. Leui. 24.d.17 Deut. 19.a.4.

26

Vermaledijt si,^† wie giften neemt, dat hy de siele des ontschuldigen bloets slae. Ende al dat volck sal segghen, Amen.

† Ezec. 22.b.12

27

Vermaledijt si,^* wie niet en veruult alle de woorden deser wet, dat hy daer nae doe. Ende al dat volck sal seggen, Amen.

* Gal. 3.b.10.