Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvj. Capittel.

¶ Van de yerste vruchten ende thienden. Hoe die ghebracht sullen werden met lof ende dancksegginghe Godts.

1

⁺ ALs ghy in dat lant coemt, dat v de HEERE uwe Godt, tot een erue gheuen sal, ende neemtet in, ende woont daer in,

+ A vers 1

2

So suldy nemen alderley^† yerste vruchten vanden lande, die wt der Aerden comen, die v de HEEre uwe Godt gheeft, ende sultse in eenen korf legghen, ende henen gaen inde plaetse, die v de HEEre uwe Godt verkiesen sal, dat sinen naem aldaer woone.

† Exod. 23.c.19. 34.c.26. Pro. 3.b.9.

3

Ende ghy sult tot den Priester comen, die tot dier tijt daer is, ende tot hem segghen: Ick bekenne heden den HEEre uwen Gode, dat ick ghecomen ben in dat landt, dat de HEEre onsen Vaderen gesworen heeft, ons te gheuen.

4

Ende de Priester sal den korf nemen van uwer hant, ende hem voor den Altaer des HEEren ws Godts neder setten.

5

⁺ Daer nae suldy antwoorden ende segghen voor den HEEre uwen Godt: De Syriers wouden mijnen Vader verdoen, die trock^* af in Egypten, ende was aldaer een vreendelinck met cleynen volcke,^† ende wert aldaer een groot sterck ende vele volcx.

+ B vers 5

* Gen. 46.a.1.

† Exod. 1.a.7.

6

Maer de Egyptenaren hantteerden ons qualijck, ende dwongen ons, ende leyden eenen herden Dienst op ons.

7

Doen^* riepen wy totten HEEre, onser vaderen Godt. Ende de HEEre verhoorde onsen roep,^† ende sach onse ellendicheyt, ancxt ende noot,

* Exod. 2.c.24.

† Exod. 3.b.7.

8

Ende leyde ons^* wt Egypten, met een machtighe hant, ende wtghereckten arm, ende met groote vreeselijcheden, door teekenen ende wonderen,

* Exo. 14.e.21.

9

Ende bracht ons in dese plaetse, ende gaf ons dit lant, daer Melck ende Honich in vloeyt.

10

Nv brenge ic de yerste vruchten des lants, die ghy HEEre ons gegeuen hebt. Ende ghy sultse laten voor den HEEre uwen Godt, ende aenbidden voor den HEEre uwen Godt,

11

Ende vrolijck zijn van alle den goede dat v de HEEre uwe Godt ghegheuen heeft, ende uwen huyse. Ghy, ende de Leuijt, ende de vreemdelinck die by v is.

12

^+* Als ghy alle de thienden van alle dat v incomende is, te samen ghebracht hebt, inden derden iare, dat een iaer der thienden is, soo suldy den Leuiten, den vreemdelingen, den Weesen, ende den Weduwen gheuen, dat si eten binnen uwe poorten, ende versaet worden.

+ C vers 12

* Deu. 14.c.28.

13

Ende sult segghen voor den HEEre uwen Godt:^† Ick hebbe ghebracht dat ghene dat gebenedijt is wt mijnen huyse, ende ick hebt ghegheuen den Leuiten, den vreemdelinghen, den Weesen ende den Weduwen, nae alle uwe gheboden, die ghy my gheboden hebt. Ick en hebbe niet ouergetreden uwe geboden, noch vergeten.

† Luc. 18.b.11.

14

Ick en hebbe daer af niet gheten in mijnen rouwe, ende ick en hebbe daer af niet gedaen in onreynicheden: Ic en hebbe daer af niet totten dooden ghegeuen. Ick hebbe des HEEren mijns Godts stemme ghehoorsaem gheweest, ende hebbe ghedaen soo ghy my gheboden hebt.

15

^† Siet af van uwe heylige Wooninge vanden Hemel, ende gebenedijt uwe volck Israel, ende dat landt dat ghy ons gegeuen hebt. Ghelijck ghy onsen vaderen ghesworen hebt, een lant daer Melck ende Honich in vloeyt.

† Baru. 2.c.16. Esai. 64.b.9.

16

⁺ Heden ten dage gebiet v de HEEre uwe Godt, dat ghy doet nae alle dese geboden ende Rechten, dat ghy die hout, ende daer nae doet, van gantscher herten ende van gantscher sielen.

+ D vers 16

17

^† Den HEEre hebt ghy heden ghesproken, dat hy uwe Godt si, dat ghy in alle zijne wegen wandelt, ende hout zijn Wetten, geboden ende Rechten, ende zijnder stemmen ghehoorsaem zijt.

† Exo. 19.b.8. 24.a.3. Deut. 5.d.27.

18

^‡ Ende de HEEre heeft v heden gheseyt, dat ghy zijn eyghen volck zijn sult, also hy v gheseyt heeft. Dat ghy alle gheboden houdt,

‡ Deut. 7.b.6. 14.a.2. Esai. 43.a.1.

19

Ende hy v dat hoochste make, ende dat ghy gelouet, gepresen ende geeert wort, bouen alle volcken, die hy ghemaeckt heeft.^† Dat ghy den HEERE uwen Gode, een heylich volck zijt, soo hy v gheseyt heeft.

† Iere. 13.b.11. 30.d.22.