Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ Hoe de rechters straffen den misdadigen, men sal den Osse den mont niet stoppen. Hoe deen broeder des anderen dooden broeders wijf trouwen sal.

1

⁺ ALs eenen^* twist tusschen mannen is, so salmense voor dat recht brengen, ende doen hen recht: Ende geuen den rechtueerdighen recht, ende den godtloosen verdoemen.

+ A vers 1

* 1.Cor. 6.a.1.

2

Ende ist dat de godtloose slagen verdient heeft, so sal de rechter hem neder heeten vallen, ende sullen hem voor hem slaen, nae de mate, ende tgetal van zijnder misdaet.

3

^† Alsmen hem veertich slaghen ghegeuen heeft, so en salmen niet meer slaen, op dat hy niet, so wanneer men hem meer slagen gheeft te vele gheslagen worde, ende uwe broeder deerlijcken voor uwen ooghen si.

† 2.Cor. 11.c.24

4

^* Ghy en sult den Osse den mont niet verbinden, die daer dorsschet.

* 1.Cor. 9.b.9. 1.Tim. 5.c.18.

5

^‡ Als broeders by malcanderen woonen, ende die eene sterft sonder kinderen, so en sal dat wijf des verstoruens gheenen vreemden man daer buyten nemen. Maer haer^† Swagher salse beslapen, ende tot eenen wijue nemen, ende trouwense.

‡ Gen. 38.a.8. Ruth. 4.b.5. Mar. 12.b.19. Luc. 20.d.28.

† Mans broeder.

6

Ende den yersten sone die si baert, dien sal hy^† verheffen nae den naem van sinen ghestoruen broeder, dat sinen naem niet en worde wtghedaen wt Israel.

† Beuestighen.

7

⁺ Maer en ghenoeget den man niet, dat hy zijn^† Swagerinne neme, so sal si, zijn Swagherinne opgaen, onder de poorte voor de Ouders, ende seggen: Mijn Swagher weygert sinen broeder eenen naem te verwecken in Israel, ende en wil my niet te houwelijck nemen.

+ B vers 7

† Broeders wijf.

8

Soo sullen hem de Ouders vander stadt doen halen, ende met hem spreken. Als hy dan staet ende spreeckt: Het en belieft my haer niet te nemen,

9

^† So sal zijn Swagherinne tot hem treden, voor de Ouders, ende trecken hem eenen schoen wt, van sinen voet, ende spouwen hem in zijn aensicht, ende sal antwoorden, ende seggen: Also salmen doen eenen yeghelijcken, die zijns Broeders huys niet bouwen en wil.

† Ruth. 4.b.7.

10

Ende sinen naem sal in Israel heeten des^† Ongheschoeyden huys.

† Baruoeten.

[p. 75v]

11

Als twee mannen met malcanderen kijuen, ende dat Wijf vanden eenen loopt toe, dat si haren man verlosse, van des ghenen hant die hem slaet, ende steeckt haer hant wt, ende grijpt hem by zijne schamelheyt,

12

Soo suldy haer de hant afhouwen, ende v ooghe en sal haerder niet verschoonen.

13

^+† Ghy en sult gheen tweederley ghewichte in uwen sack hebben, groot ende cleyne.

+ C vers 13

† Leui. 19.g.36. Mich. 6.b.11.

14

Ende in uwen huyse en sal gheen tweederley^‡ Epha zijn, groot ende cleyne.

‡ Schepel.

15

^† Ghy sult een volcomen ende recht gewichte, ende een volcomen ende recht Epha hebben, op dat ghy langhe leuen muecht in dat lant dat v de HEEre uwe Godt gheuen sal.

† eze. 46.b.10

16

Want wie sulcx doet, die is den HEEre uwen Gode eenen grouwel, ghelijck alle de ghene die quaet doet.

17

^* Ghedenct wat v de Amalekiten deden opten weghe, doen ghy wt Egypten troct:

* Exod. 17.c.8.

18

Hoe si v aen tasten inden wege, ende slogen uwe achterste, alle de onstercke die achter v nae quamen, doen ghy moede ende mat waert, ende en vreesden Godt niet.

19

Als v nv de HEEre uwe Godt in de ruste brengt, van alle uwe vianden rontsom, inden lande, dat v de HEEre uwe Godt gheeft, tot eender eruen in te nemen,^* soo suldy de gedachtenisse der Amalekiten wt doen, onder den Hemel. Dat en vergheet niet.

* 1.re. 14.g.48. 15.a.2. Nu. 24.d.20.