Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiiij. Capittel.

¶ Vanden scheytbrief. Ende van de vrijheyt des nieuwen ghehouden mans, Ende ander gheboden, de liefde des naesten aengende.

1

⁺ ALs yemant een wijf neemt, ende neemtse te houwelijcke, ende en vint geen ghenade voor zijnen ooghen, om eenigher onlust wille,^* soo sal hy eenen scheydtbrief schrijuen, ende haer in de

+ A vers 1

* Iere. 2.e.43. Matt. 5.d.31. 19.a.7. Marc. 10.a.4.

[p. 75r]

handt gheuen, ende verlatense wt sinen huyse.

2

Als si dan wt sinen huyse gegaen is, ende wech gaet, ende wort eens anders Wijf.

3

Ende de selue ander man op haer oock gram wort, ende eenen scheybrief schrijft, ende haer in de hant gheeft, ende verlaetse wt sinen huyse. Oft ist dat de selue ander man sterft,

4

Diese hem tot eenen wijue genomen hadde, so en machse haer yerste man diese wt liet, niet wederom nemen, dat si zijn wijf si, nae dien dat si onreyn is: Want sulcx is eenen grouwel voor den HEEre. Op dat ghy dat landt niet tot sonde en maeckt, dat v de HEEre uwe Godt, tot een erue ghegheuen heeft.

5

^* Als yemant nieuwelincx een wijf ghenomen heeft, dien en sal niet int Heyr reysen, ende men en sal hem niet opleggen. Hy sal vrij in zijn huys zijn een iaer lanck,^* dat hy vrolijck si met sinen Wijue, die hy ghenomen heeft.

* Deut. 20.a.7.

* Prou. 5.c.18.

6

^+† Ghy en sult niet te pande nemen, den ondersten oft ouersten Muelensteen: Want hy heeft v de siele te pande geset.

+ B vers 6

† Exo. 22.d.26.

7

^* Als yemant beuonden wort die wt sinen broederen een siele steelt wt den kinderen Israels, ende versetse ende vercooptse, alsulcken Dief sal steruen, dat ghy dat quaet van v doet.

* Exo. 21.b.16.

8

Wacht v voor de plaghen der Lazarien, dat ghy met neersticheyt houdt ende doet,^* alle dat v de Priesteren, de Leuiten leeren. Ende alsoo si v ghebieden, dat suldy houden, ende daer nae doen.

* Deut. 17.c.15. Mat. 23.a.3.

9

Gedenct wat de HEEre uwe Godt^† met MirIam opten weghe dede, doen ghy wt Egypten trockt.

† Nu. 12.b.9.

10

⁺ Als ghy uwen naesten eenighe schult borcht, so en suldy niet in zijn huys gaen ende nemen hem eenighen pant:

+ C vers 10

11

Maer ghy sult daer buyten staen, ende hy, dien ghy borcht, sal zijn pant buyten brengen tot v.

12

Maer is hy benoot soo en suldy niet slapen gaen met sinen pant.

13

Maer sult hem sinen pant weder gheuen, als de Sonne ondergaet, dat hy in zijn cleet slape, ende ghebenedie v. Dat sal v voor den HEEre uwen Godt een gherechticheyt wesen.

14

Ghy en sult den nootdruftighen ende armen^* sinen loon niet inhouden, hy si van uwe broederen, oft vreemdelinghen, die in uwen lande, ende binnen uwer poorten is.

* Leuit. 19.c.13. Eccl. 7.c.23. Tob. 4.c.15.

15

Maer ghy sult hem sinen loon gheuen, inden seluen daghe, dat de Sonne daer ouer niet onder en gae. Want hy is benoodicht, ende onthout zijn siele daermede, op dat hy den HEERE niet aen en roepe teghen v, ende dattet v een sonde si.

16

^* De Vaders en sullen niet, voor de kinderen, noch de kinderen voor de vabers steruen. Maer een yegelijck sal voor zijn sonde steruen.

* Iere. 31.d.29. 4.Re. 14.a.6

17

^‡ Ghy en sult des vreemdelingen ende der Weesen recht niet buyghen. Ende ghy en sult der Weduwen cleet niet te pande nemen.

‡ 2.par. 25.a.4. Ezec. 18.a.3. Deut. 17.a.2. 27.c.20.

18

⁺ Want ghy sult gedencken, dat ghy een knecht in Egypten gheweest zijt. Ende dat de HEEre uwe Godt v van daer verlost heeft. Daerom ghebiede ick v, dat ghy sulcx doet.

+ D vers 18

19

Als ghy in uwen^* Acker gheoogst hebt, ende hebt eenen schoof inden Acker vergheten, so en suldy niet om keeren om dien te halen: Maer hy sal des vreemdelingen, des Weesen, ende der Weduwen zijn. Op dat v de HEEre uwe Godt, gebenedije in alle wercken van uwen handen.

* Leuit. 19.c.9. 23.d.22.

20

Als ghy uwe Olijfboomen af gelesen hebt, so en suldijse daer na niet nauwer aflesen: Het sal des vreemdelingen, des Weesen, ende der Weduwen zijn.

21

Als ghy uwen Wijnberch ghelesen hebt, soo en suldy daer nae niet nauwer op lesen: Het sal des vreemdelingen, des Weesen, ende der Weduwen zijn.

22

Ende sult gedencken, dat ghy een knecht in Egypten lant geweest zijt. Daerom ghebiede ick v, dat ghy sulcx doet.