Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Hier worden gheschreuen ende ghenoemt die in de Menichte des HEEren niet gaen en sullen. Ende ander geboden gheordineert.

1

⁺ GHeen ghebroken^† noch ghesneden, en sal in de^* Menichte des HEEren comen.

+ A vers 1

† Esaie. 56.a.3.

* Vergaderinghe.

2

Ende daer en sal ooc gheen Hoeren kint in de Menichte des HEEren comen, oock niet na dat thiende lidt. Maer het en sal gheensins in de Menichte des HEEren comen.

3

^* De Ammoniten ende Moabiten, en sullen niet comen in de Menichte des HEEren, oock niet na dat thiende lidt, maer sy en sullen nemmermeer daer in comen.

* 2.Esd. 13.a.1.

4

Daerom, dat sy v niet teghen en quamen met broode, ende water, opten weghe, doen ghy wt Egipten troct: Ende daer toe tegen v huerden den^† Bileam Beors soon van Pethor wt Mesopotamia dat hy v vermalendijen soude.

† Num. 22.a.4. Iosue. 24.b.9

5

Maer de HEERE uwe Godt, en woude Bileam niet hooren, ende veranderde v de vermaledijdinghe in de ghebenedijdinge, Daerom, dat de HEEre uwe Godt v lief hadde.

6

Ghy en sult hen noch geluc noch salicheyt wenschen, alle v leuen lanck eewelijck.

7

⁺ Den Edomiten en suldy voor gheenen grouwel houden: Hy is uwe Broeder. Den Egiptenaer en suldy oock voor geenen grouwel houden: Want ghy zijt een vreemdelinck in zijn lant gheweest.

+ B vers 7

8

De kinderen, die sy int derde lidt winnen, die sullen in de Menichte des HEEren comen.

9

^* Als ghy wten Legher gaet teghen uwe Vianden, soo wacht v voor allen quaden.

* Ephe. 6.b.14 2.Cor. 10.a.4.

10

Als yemant onder v is, die niet reyn en is, dat hem des nachts yet gheschiet is, die sal buyten voor den Legher gaen, ende niet weder in comen, tot dat hy hem met water voor den Auont bade.

11

Ende als de Sonne onder ghegaen is, soo sal hy weder inden Legher comen.

12

Ende ghy sult buyten voor den Leger een plaetse hebben, daer toe ghy ter noot wt gaet,

13

Ende sult een Schupken hebben: Ende als ghy daer buyten sitten wilt, so suldy daermede grauen.

14

⁺ Ende als ghy geseten hebt, so suldy toedecken wat van v gheghaen is. Want de HEEre uwe Godt wandelt onder uwen Legher dat hy v verlosse, ende gheue uwe Vianden voor v. Daerom sal uwen Legher heylich zijn, datter gheen schande onder v ghesien en worde, ende hy hem van v keere.

+ C vers 14

15

Ghy en sult den knecht zijnen HEEre niet leueren, de welcke van hem tot v gecomen is.

16

Hy sal by v blijuen inde plaetse die hy verkiest, binnen een van uwe poorten, hem te goede, ende en sult hem gheenen lachter doen.

17

^† Daer en sal gheen Hoere zijn onder den Dochteren Israels. Ende gheen Hoeriagher onder de Sonen Israels.

† Num. 25.b.6. Deut. 22.c.20.

18

^‡ Ghy en sult geen Hoeren loon, noch Hondts ghelt in dat huys Godts dijns HEEren brenghen, wt eenigher geloeften: Want dat is den HEERE uwen Gode beyde eenen grouwel.

‡ Mich. 1.b.7.

19

^† Ghy en sult aen uwen Broeder niet woeckeren, noch met ghelt, noch met spijse, noch met al daermen mede gewoeckeren can.

† Exod. 22.c.25. Leuit. 25.f.35. 2.Esd. 5.a.7.

20

Aenden vreemden muechdy woeckeren, maer niet aen uwen Broeder. Op dat v, de HEEre uwe Godt, ghebenedije in alle dat ghy voor handen neemt, in dat lant daer ghy henen coemt, dat selue in te nemen.

21

⁺ Als ghy den HEEre uwen Gode,^* een geloefte doet, so en suldijt niet vertrecken te houden. Want de HEEre uwe God, salt v eysschen, ende tsal v sonde wesen.

+ D vers 21

* Num. 30.a.3. Eccle. 5.a.3. Baru. 6.e.34. Act. 5.a.2.

22

Als ghy dat gelouen af hout, so en ist v gheen sonde.

23

Maer wat tot uwen lippen wtgegaen is, dat suldy houden, ende daer na doen, so ghy den HEEre uwen Gode vrijwillich gheloeft hebt dat ghy met uwen monde ghesproken hebt.

24

Als ghy in ws naesten Wijnberch gaet, so meuchdy vanden druyuen eten, na uwen wille, tot dat ghi genoech hebt. Maer ghy en sult niet in dijn vat doen.

25

Als ghy in ws naesten^* saet gaet, soo muechdy metter handt Aren af breken: Maer metter sickelen niet daer in maeyen.

* Matt. 12.a.1.