Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Hoe datmen de liefde tegen den naesten bewijsen sal, Ende menigerley ander gheboden. Hoe hem een man hebben sal tegen dwijf, die hy geen maecht beuonden en heeft.

1

⁺ ALs ghy ws Broeders^† Osse oft Schaep siet gaen dolen, so en suldy v niet ontrecken van hem: Maer sultse weder tot uwen Broeder brengen.

+ A vers 1

† Exod. 23.a.4.

2

Maer als v uwe Broeder niet na en is, ende en kent hem niet, soo suldyse in v huys nemen, dat sy by v zijn, tot datse v broeder soect, ende hem dan weder gheuen.

3

Also suldy doen met zijnen Ezel, met zijnen cleede, ende met al dat verloren is, dat welck uwe Broeder verliest, ende ghijt vint: Ghy en moecht v niet ontrecken.

4

^* Als ghy ws Broeders Ezel oft Osse, siet vallen op den weghe, soo en suldy v niet van hem ontrecken, maer sult hem ophelpen.

* Matt. 12.b.11. Luc. 13.b.15. 14.a.5.

5

^† Een Wijf en sal geens mans Habijt draghen: Ende een man en sal geen vrouwen cleederen aendoen. Want wie sulcx doet, die is den HEEre uwen God eenen grouwel.

† 1.Cor. 11.a.6.

6

⁺ Als ghy opten weghe vint eenen Vogels nest, op eenen Boom, oft opter Aerden, met ionghen oft met eyeren, ende dat de Moeder op de ionghen oft op de eyeren sidt, soo en suldy de Moeder metten iongen niet nemen:

+ B vers 6

7

Maer ghy sult de Moeder laten vlieghen, ende de Iongen nemen, op dattet v wel ga, ende langhe leuet.

8

Als ghy een nieu Huys timmert, soo maect een Lene daerom op v dack, op dat ghy gheen bloet op v Huys en laet, als yemant daer af viele.

9

Ghy en sult uwen Wijnberch niet^† met menigerley besaeyen, dat ghy totter Vullingen niet en heylicht sulck saet (dat ghy ghesaeyt hebt) met dat ghene dat v incoemt vanden Wijnberch.

† Leuit. 19.e.20.

10

Ghy en sult niet ackeren met eenen Osse, ende met eenen Ezel te samen.

11

Ghy^† en sult niet aentrecken een cleet, van wullen ende lijnen te samen ghemengt.

† Leuit. 19.e.20.

12

^† Ghy sult v Freengien maken aen de vier hoecken ws mantels, daer ghy v mede bedect.

† Num. 15.d.37

13

Als yemandt een^* Wijf neemt, ende wordt op haer gram, als hyse beslapen heeft,

* Num. 5.b.12.

14

Ende leyt haer yet schandelijcx op, ende brenghet eenen quaden roep van haer wt, seggende: Dit Wijf hebbe ic genomen, ende doen ick my tot haer dede, beuant ick dat sy gheen maecht en was.

15

Soo sullen de Vader, ende de Moeder vander Deernen haer nemen, ende voor de Ouders vander Sadt in de poorte voortbrengen der Deernen Maechdom.

16

⁺ Ende der Deernen vader sal totten Ouders segghen: Ick heb desen Man mijn dochter tot eenen Wijue ghegeuen. Nv is hy op haer gram gheworden,

+ C vers 16

17

Ende tijget haer een schandelijck dinck aen, seggende: Ick en hebbe v Dochter gheen Maecht gheuonden. Hier is de Maechdom van mijnder Dochter: Ende sullen de cleederen wtspreyden voor de Ouders vander stadt.

18

Soo sullen de Ouders vander stadt den Man nemen, ende castijen,

19

Ende om hondert Sikels siluers straffen. Ende de selue der Deernen Vader gheuen, om dat hy een Maecht in Israel berucht heeft, ende salse tot eenen Wijue hebben, dat hyse zijn leefdaghe niet verlaten en can.

20

Maer ist waer, dat de Deerne gheen Maecht geuonden en is,

21

Soo salmense buyten voor haers Vaders duere brenghen, ende de lieden vander stadt, sullense doot steenen.^* Om dat sy een dwaesheyt ghedaen heeft in Israel, ende in haers vaders huys gehoereert heeft, ende sult dat quaet van v doen.

* Deut. 23.c.17.

22

Als yemandt beuonden wordt,^* die by een Wijf slaept, die eenen ghetrouden man heeft, so sullen sy beyde steruen de Man, ende dat Wijf, daer hy by gheslapen heeft, ende sult dat quaet van Israel doen.

* Leui. 20.b.10.

23

⁺ Als een Maget yemanden beloeft is,

+ D vers 23

[p. 74v]

ende een Man crijchtse in de stadt, ende slaept by haer,

24

Soo suldyse alle beyde ter stadt poorten wt brengen, ende sultse beyde steenen, dat sy steruen. De Maget daerom dat sy niet gheroepen en heeft, dewijle sy inde stadt was. Den Man, daerom, dat hy zijns naesten Wijf ghescheynt heeft, ende sult dat quaet van v doen.

25

Maer als yemant een verloefde Maghet opten velde crijcht, ende grijptse, ende slaept by haer, so sal de Man alleen steruen, die by haer gheslapen heeft,

26

Ende der Maghet en suldy niet doen, want sy en heeft gheen sonde des doots weerdich ghedaen. Maer gelijck als wanneer hem yemandt teghen zijnen naesten verhief, ende sloech zijn siele doot, also is dit ooc.

27

Want hy vantse opten velde, ende de verloefde Maget riep, ende daer en was niemant diese holp.

28

Als^† yemandt aen een Maecht coemt die niet verloeft en is, ende grijptse, ende slaept by haer, ende het wort also beuonden,

† Exod. 22.c.16.

29

Soo sal die, diese beslapen heeft, haren Vader vijftich Sikels siluers geuen, ende salse tot eenen wijue hebben, daerom dat hyse vercracht heeft. Hy en machse niet verlaten zijn leuen lanck.

30

^† Niemant en sal zijns vaders Wijf nemen, ende niet ontdecken zijn vaders decsel.

† Leuit. 18.a.7. 1.Cor. 5.a.1.