Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Hoe datmen doen sal metten dooden lichaem eens verslaghenen inden velde gheuonden. Hoe met een vrouwe inden crijch gheuangen. Hoe hem een man met twee wijuen ende zijn kinderen hebben sal. Men en behoort de doode lichamen niet aender ghalghen te hanghen.

1

⁺ ALsmen eenen verslaghenen vint in dat lant, dat de HEEre uwe God, v geuen sal in te nemen, ende leyt int veldt, ende men en weet niet wien verslagen heeft.

+ A vers 1

2

So sullen uwe Ouders ende Rechters wtgaen, ende vanden verslaghenen meten, aen de Steden, die rontsom ligghen,

3

Welcke stadt de naeste is. Der seluer Ouders sullen een ionghe Koe vanden Runderen nemen, daermen niet mede ghearbeyt en heeft, noch iock ghetrocken en heeft,

4

Ende sullense af brenghen tot eenen steenachtigen gront, die noch bearbeyt noch besaeyt en is, ende aldaer in de Leechte haer den hals af houwen.

5

So sullen daer toe comen de Priesters^* de kinderen Leui (want de HEEre v Godt heeftse vercoren, dat sy hem dienen ende zijnen Naem louen, ende na haren mont sullen alle saecken, ende alle schaden gehandelt worden)

* Deut. 17.c.14 Eccl. 45.d.25.

6

Ende alle de Ouders van dier stadt sullen comen totten verslaghenen, ende wasscen haer handen ouer de ionghe Koe, die inde Leechte den hals afgehouwen is.

7

⁺ Ende sullen antwoorden ende seggen: Onse handen en hebben dit bloet niet gestort, ende onse ooghen en hebbent oock niet ghesien,

+ B vers 7

8

^† Weest genadich uwen volcke Israel, dat welcke ghy de HEERE verlost hebt: Ende en legt dat ontschuldich bloet op uwen volcke Israel niet. Also sullen sy van dien bloede versoent wesen.

† Ione. 1.c.14.

9

Also suldy dat ontschuldich bloet van v doen, dat ghy doet wat recht is voor des HEEren oogen.

10

Als ghy in eenen strijt trect teghen uwe Vianden, ende de HEEre uwe Godt, geeftse v in uwen handen, dat ghy haer gheuangenen wech voert:

11

Ende siedy een schoon Wijf, onder de gheuangenen ende hebdy lust tot haer, dat ghyse tot eenen Wijue neemt,

12

⁺ So brengtse in v huys, ende laet haer dat hayr afscheren, ende haer naghelen corten,

+ C vers 12

13

Ende de cleederen aflegghen, daer sy in gheuanghen is, ende laetse sitten in v huys, ende

[p. 74r]

beweenen een maent lanck haren Vader, ende haer Moeder.^† Daer na slaept by haer, ende neemtse te houwelijck, ende laetse v Wijf zijn.

† Deut. 7.a.3.

14

Maer als ghy gheenen lust tot haer en hebt, so suldyse wtlaten, werwaerts dat sy henen wil, ende niet om ghelt vercoopen, noch versetten. Om dat ghyse vernedert hebt.

15

^* Als yemant twee wijuen heeft: Eene die hy lief heeft, ende eene die hy haet. Ende sy hem kinderen baren, beyde de liefste, ende die hy haet, dat de eerstegheboren behoort der gheender die hy haet.

* Gene. 29. 30.

16

Ende als de tijt coemt, dat hy zijnen kinderen de erue wtdeylt, so en mach hy den soon des liefsten niet totten eerstengheboren soon maken, die hy haet.

17

Maer hy sal den soon der gheender die hy haet voor den eersten soon bekennen, dat hy hem dubbel gheue, al wat voor handen is.^† Want de selue is zijn eerste cracht, ende der eerstgheboren recht is zijn.

† Gen. 49.a.3.

18

^+* Als yemant eenen eyghenwillighen ende ongehoorsamen soon heeft, die zijn vaders, ende moeders stemme niet en hoort. Ende als sy hem castyen, hen niet hooren en wil,

+ D vers 18

* Exod. 21.b.17

19

So sullen hem zijn Vader ende Moeder grijpen, ende totten Ouders vander stadt brenghen, ende totter poorten der seluer plaetsen,

20

Ende totten Ouders der stadt segghen: Dese onse soon is eyghenwillich ende ongehoorsaem, ende en hoort onse stemme niet, ende is gulsich ende een dronckaert.^†

† 2.Reg. 18.c.17

21

Soo sullen hem steenen alle de lieden van dier stadt, dat hy sterue: Ende sult also den boosen van v doen, dattet dat gantsche Israel hoore ende vreese.

22

Als yemant een sonde ghedaen heeft, die des doots weerdich is, ende wort also ghedoot^* datmen hem aen een houdt hangt,

* Iosue. 8.f.29. 10.e.26. Mat. 27.d.35.

23

Soo en sal zijn lichaem aent hout niet blijuen ouer nacht, maer sult hem van dien daghe begrauen.^† Want een opghehangen is veruloect by Gode. Op dat ghy v landt niet en ontreynicht, dat welcke v de HEEre uwe God geeft tot een erue.

† Gala. 3.b.13.