Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Hoe datmen inde Oorloghe ende strijt handelen sal. Oock in dat belech ende innemen der Steden.

[p. 73v]

1

⁺ ALs ghy in eenen Crijch trect tegen uwe vianden,^* ende siet Rossen ende Waghenen des volcx, dat grooter is dan ghy, so en vreest v niet voor hen: Want de HEEre uwe Godt, die v wt Egipten Lant gheleyt heeft, is met v.

+ A vers 1

* Deut. 7.d.17.

2

Als ghy nv totten strijde coemt, soo sal de Priester toe treden ende metten volcke spreken,

3

Ende segghen: Israel hoort toe: Ghy gaet heden inden strijdt teghen uwe vianden.^† V herte en sy niet versaecht, en vreest v niet, ende en verscrict niet, ende en laet v niet grouwelen voor^* hen.

† Deute. 1.c.21. Num. 14.a.9. 1.Mac. 4.a.8

* Deut. 28.a.7 2.Esd. 4.d.20

4

Want de HEEre uwe Godt gaet met v, dat hy voor v strijde teghen uwe vianden, om v te helpen.

5

Maer de Officiers sullen metten volcke spreken, ende segghen:^* Soo wie een nieu huys ghemaect heeft, ende en heuet noch niet ingewijt, die gae henen, ende blijue in zijn huys, op dat hy niet en sterue inden Crijch, ende een ander wijet in.

* 1.Mac. 3.g.56

6

^* Soo wie eenen wijngaert gheplant heeft, ende en heuet hem noch niet ghemeyn ghemaect, die gae wech, ende blijue thuys, dat hy niet een sterue inden Crijch, ende datten een ander ghemeyn make.

* 1.Mac. 3.g.65

7

^* So wie een wijf ondertrout heeft, ende en heeftse noch niet thuys gehaelt, die gae henen, ende blijue thuys, dat hy niet inden crijch en sterue, ende datse een ander thuys hale.

* Deut. 24.a.5.

8

⁺ Ende de Officiers sullen breeder metten volcke spreken ende segghen:^† Soo wie dat vreest, ende een versaecht herte heeft, die ga henen, ende blijue thuys, op dat hy zijnder broederen herdt niet verbaest en make, gelijck zijn herte is.

+ B vers 8

† Iudic. 7.a.3.

9

Ende als de Officiers wt gesproken hebben metten volcke, soo sullen sy de Ouerste des Heyrs, voor dat volc aen de spitse setten.

10

^† Als ghy voor een stadt trect, om teghen haer te strijden, soo suldy haer den vrede ontbieden.

† Deut. 2.e.25. Num. 21.c.22.

11

Ist dat sy v vredelijc antwoort, ende v open doet. So sal alle dat volck, dat daer inne geuonden wort, v onder tribuyt dienen, ende onderdaen zijn.

12

Maer en wil sy niet vredelijck met v handelen, ende wil met v oorloghen, so belegtse.

13

Ende alse de HEEre uwe Godt v in de hant geeft, so suldy al wat manlijc daer in is, met des sweerts scherpte slaen.

14

Behalue de Wijuen, Kinderen ende^* Vee, ende al wat inde stadt is, ende al den roof suldy onder v wt deylen. Ende sult eten van uwer vianden gedeylden roof, die v de HEEre uwe Godt ghegeuen heeft.

* Iosue. 8.a.2. 11.c.14

15

Alsoo suldy alle den steden doen, die seer verre van v ligghen, ende de ghene die niet en zijn vanden steden van dese volcken.

16

^+* Maer in de steden van dese volcken, die v de HEEre uwe God, tot een erue gheuen sal, en suldy niet laten leuen, soo wat eenen adem heeft.

+ C vers 16

* Deut. 31.a.5. Iosue. 6.c.17. 8.f.26. Iudic. 1.b.8.

17

Maer ghy sultse verbannen,^† te weten, de Hethiten, Amoriten, Cananiten, Pheresiten, Heuiten, ende Iebusiten. Alsoo de HEEre uwe Godt v geboden heeft,

† Deut. 7.a.1.

18

Op dat sy v niet en leeren doen alle de grouwelen, die sy haren Goden doen, ende ghy v beson-dicht aen den HEEre uwen Godt.

19

Als ghy voor een stadt langhen tijdt ligghen moet, daer ghy teghen strijt, om die te winnen, soo en suldy^† de Boomen niet verderuen, dat ghy metter Aexen daer aen houwet. Want ghy condt daer af eten daerom en suldyse niet wtroyen. Want het is doch Hout opten Velde, ende geen Mensch, dattet v voor een Bolwerck zijn mochte.

† 4.Reg. 3.d.19

20

Maer dat boomen zijn, die ghy weet datmen daer af niet en eet, die suldy verderuen ende wtroyen, ende maken daer af Bolwerck tegen de stadt, die teghen v oorloocht, tot dat ghy haerder machtich wort.