Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Van de bescheydinghe der Vrijsteden voor de dootslaghers. Hoe veel ghetuyghen eenen ouertuyghen moghen. Ende hoemen den valschen getuyghe straffen sal.

1

⁺ ALs de HEEre uwe Godt de volcken wtgheroyt heeft, der welcker lant v de HEEre uwe Godt gheuen sal, dat ghyse inneemt, ende in haer steden ende huysen woont,

+ A vers 1

2

^† So suldy v drie steden wtscheyden inden lande, dat v de HEEre uwe God gheuen sal in te nemen.

† Deut. 4.g.41 Num. 35.b.11. Iosue. 20.a.2.

3

Ende sult bequame plaetsen verkiesen, ende de Palen van uwen lande, dat v de HEEre uwe Godt, wtdeylen sal, in drie deelen scheyden, dat daer henen vliede, wie eenen dootslach gedaen heeft.

4

Ende dat sal de sake zijn, dat hy daer henen vliede, die eenen dootslach gedaen heeft, dat hy leuende blijue.

^* Als yemant zijnen naesten slaet, niet met opset, ende en heeft te voren gheenen haet op hem ghehadt.

* Num. 35.d.22. Deut. 27.c.25.

5

⁺ Mer als wanneer yemant met zijnen naesten int Wout ghinghe, om hout te houwen, ende recte de hant metter Axe wt, om dat hout af te houwen, ende dat yser spronge af vanden stele, ende trefte zijnen naesten dat hy storf, die sal in een van desen Steden vlie-den dat hy leuendich blijue.

+ B vers 5

6

Op dat de Bloetwreker den dootslagher niet na en iaghe, dewijle dat zijn herte verhit is ende begrijpe hem, om dat den wech soo verre is, ende sla hem zijn siele, soo doch gheen oordeel des doots aen hem en is. Dewijle hy te voren gheenen haet tot hem ghedraghen en heeft.

7

Daerom ghebiede ick v, dat ghy drie steden wtscheyt.

8

Ende ist dat de HEEre uwe Godt uwe Palen verbreyden sal, soo hy uwen Vaderen ghesworen heeft, ende gheeft v al dat Landt, dat hy gheseyt heeft uwen vaderen te geuen,

9

(Ist dat ghy anders alle dese geboden houden sult, so dat ghy daer na doet dat ick v heden ghebiede, dat ghy uwen HEEre uwen Godt lief hebbet, ende in zijn weghen wandelt uwe leefdaghe) Soo suldy noch drie steden doen tot desen drien,

10

Op dat daer geen ontschuldich bloet ghestort en worde in uwen Lande, dat v de HEERE uwe Godt gheeft tot een Erue, ende op v bloetschult come.

11

^+* Maer als yemant haet draecht teghen zijnen naesten, ende loert op hem, ende gaet op hem, ende slaet hem zijn siele doot, ende vliet in een van desen Steden.

+ C vers 11

* 2.Re. 14.a.7.

12

Soo sullen de Ouders in zijnder Stadt henen schicken, ende van daer laten halen, ende hem in de handen des bloetwrekers gheuen, dat hy sterue.

13

Vwe ooghen en sullen hem niet sparen, ende sult dat ontschuldighe bloet wt Israel doen, op dattet v wel ga.

14

Ghy^* en sult ws Naesten Palen niet achterwaerts stooten, die de voorsaten geset hebben in uwen erfdeele, dat ghy eruet inden Lande, dat v de HEEre uwe Godt, ghegheuen heeft in te nemen.

* Deut. 27.c.18. Iob. 24.a.2.

15

^* Een ghetuyge alleen en sal tegen niemant opstaen, ouer eenighe misdaet oft sonde, het sy wat sonde dattet sy, diemen gedoen can.^† Maer inden monde van twee ofte drie getuyghen, sal alle sake bestaen.

* Num. 35.d.30

† Mat. 18.b.16. Ioan. 8.b.17. 2.Cor. 13.a.1. Hebr. 10.d.28

16

⁺ Als een vermeten ghetuyge tegen yemanden opstaet, om tegen hem te betuygen een ouertredinge,

+ D vers 16

17

So sullen beyde de Mannen, die een sake met malcanderen hebben, voor den HEEre, voor den Priester, ende voor de rechteren staen, die tot dier seluer tijt zijn sullen.

18

Ende de Rechters sullent wel^† vereysschen. Ende als de valsche ghetuyghe, een valsch ghetuychenis teghen zijnen broeder ghegheuen heeft,

† Ondersoecken, vernemen.

19

^† So suldy hem doen, so hy dachte zijnen broeder te doen, dat ghy den boosen van v wech doet,

† Susan. 1.g.62 Prou. 19.a.5.

20

Op^* dattet die andere hooren, hen vreesen, ende niet meer alsulcken quaden stuck voor en nemen te doen onder v.

* Deut. 13.b.11

21

V ooghe en sal zijnder niet sparen.^† Siele om siele. Ooghe om ooghe. Tant om tandt. Handt om handt. Voet om voet.

† Exod. 21.c.23. Leui. 24.d.18. Matt. 5.f.38.