Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Vanden deele ende erffenisse der Leuiten, ende toecomende Prophete, die den volcke belooft wert, Ende datmen de valsche Propheten onderkennen sal.

1

⁺ DE Priesteren,^* de Leuiten vanden geheelen Stamme Leui, en sullen gheen deel noch erue hebben met Israel. De Offerhanden des HEEren, ende zijn Erfdeele sullen sy eten.

+ A vers 1

* Nu. 18.d.20. Deut. 10.b.9. 12.b.12. 14.c.27. Eze. 44.d.28 Iosue. 13.b.14 d.33.

2

Daeromme en sullen sy gheen Erue onder haren Broederen hebben, om dat de HEEre haer Erue is, soo hy hen geseyt heeft.

3

Maer dat sal dat Recht der Priesteren zijn aen den volcke, ende aenden ghenen die daer offeren, het sy eenen Osse oft Schaep. Datmen den Priestere gheue de schouder, ende beyde Wangen, ende de Pensen.

4

Ende de eerstelinghen, van uwen Coren, van uwen Most, ende van uwer Olyen. Ende de eerstelinghen van de bescheeringhe van uwen Schapen.

5

^† Want de HEEre uwe Godt heeft hem vercoren wt alle uwe Stammen, dat hy stae inden Dienst, inden Naem des HEEren, hy ende zijn sonen eewelijck.

† Num. 3.b.11 18.a.2.

6

Als een Leuijt coemt ergens wt een van uwe poorten, oft elders wt den geheelen Israel, daer hy een gast is, ende coemt na aller lust zijnder sielen, in de stede die de HEEre vercoren heeft,

7

Dat hy diene inden Naem des HEEren zijns Godts. Ghelijck alle zijn broederen de Leuiten, die aldaer voor den HEERE staen,

8

Die sullen gelijcken deel te eten hebben, behaluen wat hy heeft van dat vercochte goet zijnder vaderen.

9

^+* Als ghy in dat lant coemt, dat v de HEEre uwe Godt geuen sal, soo en suldy niet leeren doen, de grouwelen deser Volcken, dat onder v niet beuonden en worde,

+ B vers 9

* Leuit. 18.a.3. Deut. 12.d.29

10

^† Die zijnen Soon oft Dochter door dat vyer laet gaen, oft een Propheteerder, oft eenen Dachverkiesere, oft een die op dat voghelen ghesanck acht, oft eenen Toouenaer,

† 4.Re. 21.a.6. Iere. 7.d.30. 19.a.5.

11

Oft een Besweerder,^* oft een Waerseggher, oft een Teeckenbedieder, oft een die den Dooden vrage.

* 1.Reg. 28.a.7.

12

Want so wie sulcx doet, die is eenen grouwel den HEEre, ende om alsulcke

[p. 73r]

grouwels wille, verdrijftse de HEEre uwe Godt, voor v wech.

13

Maer ghy sult sonder gebreck wesen, metten HEEre uwe Gode.

14

Want dese Volcken die ghy innemen sult, hooren de Dachverkiesers ende Propheteerders. Maer ghy en sult v niet also stellen teghen den HEEre uwen Godt.

15

^† Eenen Propheet, ghelijck my, sal v de HEEre uwe God verwecken, wt v ende wt uwen Broederen,^* dien suldy hooren.

† Acto. 7.d.37.

* Mat. 17.a.5

16

⁺ Ghelijc ghy dan vanden HEEre uwen Gode gebeden hebt, tot Horeb, inden dage der vergaderingen ende spraect:^† Ic en wil nv voortaen niet meer hooren de stemme des HEEren mijns Gods, ende dat groote vier niet meer sien, op dat ick niet en sterue.

+ C vers 16

† Exod. 20.c.19. Deut. 5.c.25.

17

Ende de HEEre sprack tot my: Sy hebben wel ghesproken. Ick wil hen eenen Propheet, ghelijc ghy zijt, verwecken wt haren Broederen, ende mijn woorden in zijnen mont gheuen.^* Die sal tot hen spreken, al wat ick hem ghebieden sal.

* Matt. 17.a.

18

^† Ende so wie mijn woorden niet hooren en sal, die hy in mijnen Naem spreken sal, van dien wil ict eysschen.

† Ioan. 12.f.48 Hebr. 2.a.3.

19

^+† Doch als een Propheet vermeten is te spreken in mijnen Naem, dat ick hem niet gheboden en hebbe te spreken: Ende wie dat spreeckt in ander Goden name, die selue Propheet sal steruen.

+ D vers 19

† Num. 16.a.1 Deut. 13.a.1. Iere. 28.a.1. Ezec. 14.a.4.

20

Maer oft ghy in uwer herten seggen sult: Hoe can ick gemercken, welc woort de HEEre niet ghesproken en heeft?

21

Als de Propheet spreect inden Naem des HEEren, ende daer en wordt niet wt, ende en coemt niet, dat is dat woort dat de HEERE niet ghesproken en heeft. De Propheet heeftet wt vermetenheyt ghesproken: Daerom en suldy hem niet ontsien.