Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Hier werden sommige Insettingen verhaelt. Ende den Coninck wat hy doen sal, wert hier beschreuen.

1

⁺ GHy sult^‡ Rechters ende Officiers in alle uwe Poorten stellen, die v de HEEre uwe Godt gheuen sal onder uwe stammen, dat sy dat volc rechten, met rechten^† gherichte.

+ A vers 1

‡ 2.Par. 19.b.5. Titum. 1.a.5.

† Oordeel.

2

^* Ghy en sult dat recht niet buyghen, ende ghy en sult ooc gheen Persoonen aensien, noch giften nemen.^† Want de ghiften maken de Wijse blindt, ende verkeeren de saken der rechtueerdigen.

* Deut. 24.c.17 1.Reg. 8.a.3.

† Exod. 23.a.8 Eccle. 20.d.31.

3

Wat recht is, dat suldy na volgen, op dat ghy leuen ende innemen muecht dat lant, dat v de HEEre uwe Godt gheuen sal.

4

Ghy en sult gheen Hagen van boomen planten, by den Altaer des HEEren ws Gods, den welcken ghy v maect.

5

^* Ghy en sult v gheen Columnen

* 1.Re. 15.c.12. 2.Reg. 18.d.18

[p. 72v]

op rechten, die de HEEre uwe God haet.

6

^* Ghy en sult den HEEre uwen Gode gheenen Ossche, oft Schaep offeren dat eenige smette heeft, oft yet quaets aen hem heeft. Want tis den HEEre uwen Gode eenen grouwel.

* Leuit. 22.c.20.

7

⁺ Als onder v, in eenich vander poorten, die v de HEEre uwe Godt gheuen sal^* beuonden wort eenich Man oft Wijf, die daer quaet doet voor de ooghen des HEEREN ws Gods, dat hy zijn verbont ouertreedt,

+ B vers 7

* Exod. 32.f.27. 4.Re. 10.d.19

8

Ende gaet henen^† ende dient andere Goden, ende bidtse aen,^* het sy Sonne oft mane, oft eenich Heyr des Hemels, dat ick niet gheboden en hebbe.

† 3.Reg. 9.b.6

* Deut. 4.c.19

9

Ende wordet v ghebootschapt, ende hoordijt,^* so suldy wel daer na vragen. Ende als ghy vint, dat het gewisselijc waer is, dat alsulcken grouwel in Israel gheschiet is,

* Deut. 13.b.8. 18.d.19. 19.d.18. Iosue. 7.d.19.

10

So suldy den seluen man, oft dat selue Wijf wt brengen, die alsulcken quaet gedaen hebben, tot uwer poorten, ende sultse doot steenen.

11

Inden^* mont van twee oft drie ghetuygen sal die steruen, die den doot weert is. Maer in eens ghetuyghen mont, en sal hy niet steruen.

* Num. 35.e.30. Deut. 19.c.15. Mat. 18.b.16. Ioan. 8.b.17. 2.Cor. 13.a.1. Hebr. 10.d.28.

12

De hant der ghetuyghen sal de eerste zijn om hem te dooden, ende daer na al des volcx hant, dat ghy den Boosen van v doet.

13

^+† Als v een sake voor dat Recht te swaer zijn sal, tusschen bloet, ende bloet, tusschen handel ende handel, tusschen schade ende schade, ende so wat twistighe saken zijn binnen uwer poorten, soo suldy v op maken, ende op trecken totter stadt, die de HEEre uwe Godt verkiesen sal,

+ C vers 13

† Deut. 1.c.17.

14

Ende tot den Priesteren, ende Leuijten, ende tot den Rechtere, die tot dier tijt zijn sal, comen ende vraghen:^† Ende die sullen v dat Ordeel spreken.

† Eze. 44.d.23.

15

Ende^* ghy sult na dien doen, dat sy v segghen in de Stede, die de HEEre vercoren heeft, ende sultet houden, dat ghy doet na dat sy v leeren sullen.

* Deut. 4.a.5.

16

Na de Wet, die sy v leeren, ende na dat Rechte dat sy v seggen, suldy v houden, dat ghy van dat selue niet af en wijcket, noch ter rechter hant, noch ter slincker.

17

Ende oft yemant vermetentlijc handelde, dat hy den Priester niet en hoorde, die aldaer aen des HEEren ws Godts ambacht staet, oft den Rechtere, die sal steruen. Ende sult den quaden wt Israel doen:

18

Dattet al tvolck hoore ende vreese, ende niet meer vermetentlijc en sy.

19

Als ghy in dat landt coemt, dat v de HEEre uwe Godt gheuen sal, ende neemt het in, ende woont daer in, ende sult seggen:^† Ick wil eenen coninc ouer my setten, gelijck alle volcken rontsom my hebben,

† 1.Reg. 8.a.5.

20

So suldy dien tot eenen Coninc ouer v setten, den welcken de HEEre uwe Godt verkiesen sal. Maer ghy sult eenen van uwen broederen tot eenen Coninck ouer v setten. Ghy en muecht gheenen vreemden, die v broeder niet en is, ouer v setten.

21

^+† Alleen dat hy niet veel Rossen en houde, ende en brenghe dat volck niet weder in Egipten, om de veelheyt der Rossen wille. Want de HEEre heeft v gheseyt, dat ghy voort niet weder in Egipten door desen wech comen en sult.

+ D vers 21

† 3.Reg. 4.c.26 2.Par. 9.e.25.

22

Hy^* en sal oock niet veel wijuen nemen, dat zijn hert niet afgekeert en worde.^† Ende hy en sal oock niet veel siluers ende gouts vergaderen.

* Gene. 6.a.2. 3.Reg. 11.a.1.

† 3.Re. 10.e.27 Esaie. 2.b.7.

23

Ende als hy nv sitten sal opten stoel zijns Conincrijcx, so sal hy dese ander wet vanden Priesteren den Leuiten nemen, ende in eenen boec laten schrijuen.

24

Dat sal by hem zijn^† ende sal daer in lesen zijn leefdaghe, op dat hy leer vreesen den HEEre zijnen Godt. Dat hy houde alle de woorden van deser wet, ende dese Rechten, dat hy daer na doe. Hy en sal zijn herte niet verheffen ouer zijn broeders, ende en sal niet wijcken vanden geboden, noch ter rechter hant, noch ter slincker,^* op dat hy zijn dagen verlenge in zijn conincrijck, hy ende zijn kinderen in Israel.

† Iosue. 1.b.8.

* Leuit. 25.c.18.