Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Van de Paeschfeest, Pinxterfeest, ende Loouertenten. De Rechters behooren rechtelijck te vonnissen.

1

⁺ HOut de maent Abib, dat ghy^† Paesschen houdet den HEEre uwen Gode. Want in de Maent Abib heeft v de HEEre uwe Godt, wt Egipten gheleydt inder nacht.

+ A vers 1

† Exod. 12.a.3. 23.b.15. Leuit. 23.a.4. Num. 9.a.2. 28.c.16.

2

Ende sult den HEERE uwen Gode dat Passah slaen: Schapen ende Runderen,^* in de stede die de HEEre verkiesen sal, dat zijnen naem aldaer woone.

* Deute. 12.a.6.c.18. 14.b.23. 15.c.20.

3

Ghy en sult niet ghesuerts op dat Feest eten. Seuen daghen suldy onghesuert broot des ellendicheyts eten. Want met vreese sydy wt Egipten Lant ghetrocken, op dat ghy ghedachtich wesen muecht, alle v leuen lanck, des daechs ws wtgancs wt Egipten.

4

Daer en sal in seuen daghen niet ghesuers ghesien worden in alle uwe palen. Ende ooc en sal vanden vleesche, dat tsauonts inden eersten dage geslegen is, ouer nacht niet blijuen, tot des morgens.

5

Ghy en muecht dat Passah niet slaen in eenige van uwen poorten, die de HEEre uwe Godt v ghegheuen heeft:

6

⁺ Behaluen^* in de stede, die de HEEre uwe Godt verkiesen sal, dat zijnen Naem aldaer woone. Daer suldy dat Passah slaen, des auonts als de Sonne onder ghegaen is, tot dier tijt als ghy wt Egip-ten troct.

+ B vers 6

* 2.Par. 35.a.1.

7

Ende sultet coken ende eten in de stede, die de HEEre uwe Godt verkiesen sal, ende v daer na keeren des morghens, ende te huys gaen in uwer hutten.

8

Ses daghen suldy van dat ongesuerde eten, ende inden seuensten daghe, is de vergaderinge des HEEren ws Gods so en suldy gheenen arbeyt doen.

9

^† Seuen weken suldy v tellen, ende beghinnen te tellen, alsmen beghint metter Sickelen in dat saet.

† Exo. 23.b.16 Leuit. 23.c.15.

10

^* Ende sult houden dat feest der weken den HEEre uwen Gode, dat ghy een vrijwillie gaue uwer hant gheeft, na dien dat de HEEre uwe Godt v ghebenedijt heeft.

* Acto. 2.a.1.

11

Ende sult vrolijc zijn voor Gode uwen HEEre, ghy ende v soon, v dochter, v knecht, v dienstmaecht, ende de Leuijt, die binnen uwer poorten is, die vreemdelinck, die Weesen ende de Weduwen, die onder v zijn in de stede, die de HEEre uwe Godt vercoren heeft, dat zijnen Naem daer woone.

12

Ende ghedenct dat ghy een knecht in Egipten zijt gheweest, dat ghy hout, ende doet na dese gheboden.

13

^+* Dat Feest der Loouerhutten suldy houden, seuen daghen als ghy vergadert hebt van uwen dorschvloer, ende van v Wijnpersse.

+ C vers 13

* Exod. 23.b.16

14

Ende sult vrolijck zijn op uwe Feeste, ghy ende v Soon, v dochter, v knecht, v dienstmaecht, de Leuijt, de vreemdelinck, de Weese, ende de Weduwe, die binnen uwer poorten zijn.

15

^† Seuen daghen suldy den HEEre uwen Gode dat Feest houden in de stede, die de HEEre verkiesen sal. Want de HEEre uwe Godt, sal v ghebenedien in alle dat ghene dat v incomende is, ende in alle wercken uwer handen. Daerom suldy vrolijc zijn.

† 3.Reg. 8.I.65

16

^* Driemael des iaers, sal al dat manlijck is onder v, voor den HEEre uwen Gode openbaren, in de stede, die de HEEre verkiesen sal. Op het Feest der onghesuerder brooden: Op het Feest der Weken, ende op het Feest der Loouerhutten.^* Maer daer en sal niet ydels voor den HEEre openbaren.

* Exod. 23.d.17

* Exod. 34.c.20 Eccle. 35.a.13.

17

Een yeghelijck, na de gaue van zijnder hant, nader ghebenedijngen, die v de HEEre uwe God ghegheuen heeft.