Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Aenghesien dat sy een heylich, reyn volck behooren te zijn, Daerom en sullen sy haer na der Heydenen gebruyc niet teeckenen noch veronreynighen.

1

⁺ GHy zijt kinderen ws HEEren ws Gods.^* Ghy en sult v geen teecken steken, noch calu scheren bouen den ooghen ouer eenen dooden.

+ A vers 1

* Leu. 10.b.6.

2

^† Want ghy zijt een Heylich volck den HEEre uwen Gode.^* Ende de HEEre heeft v vercoren, dat ghy zijn eyghendom zijn soudt, wt alle Volcken die op Aerden zijn.

† Deut. 7.b.6.

* Exod. 19.a.5.

3

Ghy en sult gheenen grouwel eten.

4

Maer^* dit is dat ghedierte dat ghy

* Leuit. 11.a.2.

[p. 71v]

eten sult: Ossen, Schapen, Gheyten,

5

Herten, Reen, Buffels, Gemsen, Eenhornen, Vorsscen ende Elanden.

6

Ende alle ghedierte dat zijn clauwen clieft ende^† wederkauwet, suldy eten.

† Irrict, hercaut.

7

Maer dat en suldy niet eten dat wedercauwet ende de clauwen niet en clieft: De Kemel den Hase, ende Conijnkens, die daer wedercauwen, ende de clauwen niet en clieuen, sullen v onreyn wesen.

8

Het Vercken, al clieuet de clauwen wel, so en wedercauwet doch niet, sal v oock onreyn wesen.^† Van haren vleesche en suldy niet eten, ende haer Aes en suldy niet aenroeren.

† 2.Mac. 6.d.18 7.a.1.

9

^* Dat ist dat ghy eten sult van alle dat int water is: Al wat vlimmen ende scelferen heeft, suldy eten.

* Leui. 11.b.9.

10

Maer wat geen vlimmen noch schelferen en heeft, en suldy niet eten, want het is v onreyn.

11

⁺ Alle reyne voghelen eet.

+ B vers 11

12

Maer dat zijnse die ghy niet eten en sult:^† Den Arent, den Hauic, de Meeuwe,

† Leuit. 11.c.13.

13

Den Dueckelaer, den Wouwe, den Ghier met zijnder aert,

14

Ende alle Rauen, met haerder aert,

15

Den Struys den Nachtwle, den Koeckoec, den Sperwaert, met zijnder Aert,

16

Den Steenwle, den Schuyfwt, de Vledermuys, den Roerdump, den Swaen,

17

Den Odeuaer, den Reyger. den Hegher met zijnder aert,

18

De Hoppe, de Swaleme.

19

Ende alle dat gheuogelte dat cruypt, sal v onreyn zijn, ende ghy en sultet niet eten.

20

Dat reyne geuogelte suldy eten.

21

Ghy en sult geen Aes eten. Den Vreemdelinck binnen uwer Poorten muechdijt gheuen, dat hijt ete, oft vercoopet eenen Vreemden.^† Want ghy zijt een heylich volck den HEEre uwen Gode.

† Deut. 7.b.6.

22

Ghy^* en sult dat Bocxken niet coken, dewijle dattet noch zijn Moeder suycht. Ghy sult alle Iaer dat thiende van uwen incomenden sade af scheyden, dat welck van uwen Acker coemt.

* Exod. 23.c.19. 24.c.26.

23

Ende sultet eten voor den HEEre uwen Gode^* in de Plaetse die hy verkiest, dat zijnen Naem aldaer woone, te weten, vanden thienden van uwen coren, van uwen most, van uwe olye^* ende de eerstegeboorten van uwen Runderen, ende van uwen Schapen, op dat ghy leert vreesen den HEEre uwen Godt dijn leefdaghe.

* Esaie. 65.a.3.

* Exod. 34.c.19

24

^+* Mer als v des wechs te vele is, dat ghy sulcx niet wech en cont ghedraghen, daeromme dat v de stede te verre is, die de HEEre uwe Godt gecosen heeft, dat hy zijnen Naem aldaer laet woonen (Want de HEEre uwe Godt heeft v ghebenedijt)

+ C vers 24

* Deut. 12.c.21. Baruch. 1.c.10

25

Soo maket te ghelde, ende nemet dat ghelt in uwe handt, ende gaet inde plaetse, die de HEEre uwe Godt vercoren heeft,

26

Ende geeft dat gelt voor al dat ghene, dat v siele lust, het sy voor Runderen, Schapen, Wijn, stercken dranc, oft voor al dat gene dat uwe Siele wenschet. Ende etet aldaer voor den HEEre uwen Gode, ende weest vrolijck, ghy ende v huys,

27

Ende de Leuijt die binnen uwer poorten is. Ghy en sult hem niet verlaten^* want hy en heeft gheen deel noch erue met v.

* Nu. 18.b.20.

28

^* Ouer drye Iaren suldy wtscheyden, alle de thiende, van alle dat v in coemt, in dien seluen Iare, ende ghy sultet laten in uwer Poorten.

* Deut. 26.c.12.

29

Soo sal de Leuijt comen, die met v gheen deel noch erue en heeft, ende de Vreemdelinc, ende de Weesen, ende de Weduwen, die binnen uwer poorten zijn, ende eten, ende versaet worden. Op dat de HEEre uwe Godt, v gebenedie, in alle wercken uwer handen, die ghy doet.