Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Hoemen de valsche Propheten kennen ende straffen sal.

1

⁺ ALs een^† Propheet oft Droomer onder v opstaen sal, ende gheeft v een Teecken oft Wonder,

+ A vers 1

† Mat. 7.b.15.

2

Ende dat Teecken oft Wonder coemt, daer hy v af gheseyt heeft. Ende [nochtans] seyt: Laet ons andere Goden na volghen, dewelcke ghy niet en kent, ende hen dienen:

3

So en suldy niet hooren de woorden sulcx Propheets oft Droomers. Want de HEEre uwe Godt^† beproeft v, op dat hy verneme, of ghy hem van gantscher herten ende van gantscher sielen lief hebt.

† Deut. 8.a.2. Iudic. 2.d.22. 3.a.1. 2.Par. 32.f.31.

4

Want ghy sult den HEERE uwen Godt^* na volghen, ende hem vreesen, ende zijn gheboden houden, ende zijn stemme hooren, ende hem dienen, ende hem aenhangen.

* Ioan. 10.a.4.d.27.

5

^† Maer die Propheet oft Droomer sal steruen, daerom, dat hy v vanden HEERE uwen Godt (die v wt Egipten Lant geleyt, ende v vanden diensthuyse verlost heeft) af te vallen gheleert, ende v wten weghe verleyt heeft, die de HEEre uwe Godt geboden heeft, daer inne te wandelen, op dat ghy dien boosen, van v doet.

† Iere. 28.c.16. 29.e.31.

6

^+† Als uwe Broeder uwer Moeders soon, oft v soon, oft uwe dochter, oft dat wijf in uwen arme, oft uwe vriendt, die v is als dijn herte, bepraeten sal heyme-lijck, ende segghen: Laet ons gaen ende dienen andere Goden, die ghy niet en kent noch uwe vaderen,

+ B vers 6

† Sach. 13.a.3. Matt. 18.a.8. Luc. 17.a.1.

7

Die onder de volcken rontsom v zijn, sy zijn v na by, oft verre vanden eenen eynde der Aerden totten anderen,

8

So en consenteert hem niet, noch en verhoort hem niet.^† Oock en sal uwe ooge hem niet sparen, ende en sult v zijnder niet ontfermen, noch hem verberghen.

† Deut. 17.b.9.

9

Maer ghy sult hem dooden: Vwe hant sal de eerste op hem zijn, datmen hem doode, ende daer na de hant des gantschen volcx.

10

Men sal hem door steenen: Want hy heeft v willen verleyden vanden HEERE uwen Godt, die v wt Egipten Landt, vanden diensthuyse gheleydt heeft.

11

^* Op dattet dat geheele Isreal hoore, ende vreese, ende niet meer alsulck quaet voor en neme onder v.

* Deut. 19.d.20

12

Als ghy van eenighe stadt hoort, die v de HEEre v Godt ghegheuen heeft, om daer in te woonen, datmen seyt:

13

Daer zijn sommige kinderen Belials wt gegaen onder v, ende hebben de Borghers van haerder Stadt verleyt, ende gheseyt: Laet ons gaen, ende dienen andere Goden, die ghy niet en kent,

14

⁺ So suldy^* neerstelijck ondersoecken, vernemen, ende vraghen: Ende ist dat haer de waerheyt vindt, dattet ghewis alsoo is, dat den grouwel onder v gheschiet is,

+ C vers 14

* Deut. 17.b.9.

15

Soo suldy de Borghers van dier seluer Stadt slaen, met de scherpte des sweerts. Ende verbannense met al dat daer in is, ende haer Vee met de scherpte des sweerts.

16

Ende al haren Roof, suldy vergaderen midden op de strate, ende met vyere verbernen, beyde de Stadt ende alle haren Roof, deen metten anderen den HEEre uwen Gode. Also datse op eenen hoop ligghe eewelijck, ende nemmermeer gesticht en worde.

17

^† Ende en laet niet van dien BANNE aen uwer hant hanghen: Op dat de HEEre vander gramschap zijns torens afghekeert wordde, ende gheue v bermherticheyt. Ende dat hy uwer ontferme, ende v vermeerdere, alsoo hy uwen vaderen ghesworen heeft.

† Deut. 7.e.25. Iosue. 7.a.1. 1.Ma. 12.f.40

18

Daerom dat ghy de stemme ws HEEren ws Godts, ghehoort hebt, te houden alle zijne gheboden, die ick v heden ghebiede, dat ghy doet wat recht is, voor de ooghen des HEEren ws Godts.