Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Hy schrijft haer weder de Insettinghen des HEEren.

1

⁺ DAt zijn de gheboden ende rechten, die ghy houden sult, dat ghy daer nae doet int Lant, dat de HEEre uwer vaderen Godt, v ghegheuen heeft om in te nemen, also lange als ghy opter Aerden leeft.

+ A vers 1

2

^† Verdestrueert alle plaetsen, daer de Heydenen (die ghy innemen sult) haer Goden ghedient hebben, het si op hooghe Bergen, op cleyne bergen, oft onder groene boomen.

† Deut. 7.a.5. Exo. 34.b.13. Nu. 33.a.52.

3

Ende breect hare Altaren af, breeckt hare Columnen in stucken, ende verbrant met vier hare Haghen. Ende de Afgoden haerder goden doet af, ende doet te niet haer namen wt de selue plaetse.

4

Ghy en sult den HEEre uwen Godt also niet doen.

5

Maer in de plaetse,^* die de HEEre v Godt kiesen sal, wt allen uwen stammen,^† dat hy sinen Naem aldaer laet woonen, daer suldy nae vragen^† ende daer henen comen.

* 3.Reg. 9.a.3. 2.Par. 7.c.12.

† 3.Re. 8.d.29.

† Deu. 14.b.23. 15.c.20. 16.a.2.

6

Ende uwen Brantoffer, ende uwen anderen offer, ende uwe thienden, ende uwer handen Heffinghe, ende v gheloften, ende v vrijwillighe offeren, ende yerst gheboorten van uwen Runderen, ende schapen daer henen brenghen.

7

^† Ende ghy sullet aldaer voor den HEEre uwen Godt eten, ende vrolijck zijn, van alle dat ghy ende v huys brengt, daer v de HEEre uwe Godt in ghebenedijt heeft.

† 1.Reg. 1.a.3. 16.a.5.

8

^* Ghy en sult dier [dinghen] gheen doen, dat wy heden hier doen, een yeghelijck wat hem recht dunckt.

* Deut. 29.c.19.

9

Want ghy en zijt tot hier toe, noch niet totter rusten ghecomen, noch totten erfdeel, dat v de HEEre uwe Godt gheuen sal.

10

⁺ Maer ghy sult ouer de Iordaen gaen, ende int Lant woonen, dat v de HEEre uwe Godt tot een Erue wtdeylen sal. Ende sal v ruste gheuen, van alle uwe vianden rontsom v, ende sult seker woonen.

+ B vers 10

11

Als nv de HEEre uwe Godt, een plaetse kiest, dat sinen Naem aldaer woone, so suldy aldaer henen brengen al wat ick v ghebiede: Vwen Brantoffer, uwen anderen offer, uwe thienden, de Heffinghe van uwen handen, ende alle uwe vrij gheloften, die ghy den HEEre ghelouen sult.

12

Ende sult vrolijck wesen voor den HEEre uwen Godt, ghy ende uwe soonen, ende uwe dochteren, ende uwe knechten, ende uwe maerten, ende de Leuiten die daer binnen uwer poorten zijn.^† Want si en hebben gheen deel noch Erue met v.

† Deut. 10.b.9.

13

Wacht v, dat ghy niet en offert uwen Brantoffer in alle plaetsen die ghy siet:

14

Maer alleene, in de plaetse, die de HEEre verkiest, erghens in eenen van uwen stammen, daer suldy uwen Brantoffer offeren, ende doen al wat ick v ghebiede.

15

Nochtans muecht ghy slaen ende vleesch eten binnen alle uwe poorten,^* nae alle lust uwer sielen, nae de ghebenedijnghe des HEEren ws Godts, die hy v ghegeuen heeft.^† Beyde de reyne ende de onreyne moghent eten, als een Ree oft Hert,

* Gen. 9.a.3.

† Deut. 15.c.22.

16

Behaluen dat^* bloet en suldy niet eten, maer opter Aerden ghieten als water.

* Leuit. 3.c.17. 7.e.26. 19.f.27

17

⁺ Maer ghy en muecht niet eten in uwer poorten, vanden thienden van uwen coren, van uwen most, van uwen olye, noch vanden yerstgeboorten van uwen Runderen, van uwen schapen, oft van eenige ghelofte die ghy gelooft hebt, oft van uwen vrijwilligen offer, of vanden Heffinghen uwer handen.

+ C vers 17

18

Maer voor^† den HEEre uwen Godt, suldy sulcx eten, in de plaetse die de HEERE uwe Godt verkiest: Ghy, ende v soon, ende v dochter, v knecht, v dienstmaecht, ende de Leuijt die binnen uwer poorten is. Ende sult vrolijck zijn voor den HEEre uwen Godt, van allen dat ghy brengt.

† Deu. 14.b.23. 15.c.20. 16.a.2

19

Ende wacht v,^* dat ghy de Leuiten niet en verlaet, alsoo langhe als ghy op aerden leeft.

* Eccl. 7.d.32.

20

Maer als de HEEre uwe Godt uwe Palen verbreyden sal, soo hy v gheseyt heeft, ende spreeckt: Ick wil vleesch eten, dewijle uwe siele lust heeft om vleesch te eten, dan eet vleesch nae alle uwer sielen lust.

21

Maer is de Stadt verre van v, die de HEEre uwe Godt gecoren heeft, dat hy sinen Naem aldaer laet woonen, so slaet van uwen Runderen, oft Schapen die de HEEre v ghegheuen heeft, so ick v geboden hebbe, ende etet in uwer poorten nae alle uwer sielen lust.

22

Alsomen een Ree oft Hert eedt, muechdijt eten. Beyde de^† reyne ende onreyne moghent tsamen eten.

† Deut. 15.c.22.

23

Alleen merckt,^* dat ghy dat bloet niet en eet. Want dat bloet is de siele. Daerom en suldy de siele niet eten

* 1.Re. 14.e.32

[p. 71r]

metten vleessche:

24

Maer ghy sullet opter Aerden ghieten gelijck water.

25

Ende ghy en sultet daerom niet eten, dattet v wel ga, ende uwen kinderen na v, dat ghy ghedaen hebt, wat recht is voor den HEEre.

26

⁺ Maer als ghy yet heyligen wilt vanden uwen, oft gelouet, so suldijt opladen,^† ende brenghen in de stede, die de HEEre vercoren heeft.

+ D vers 26

† Deu. 14.b.23. 15.c.20.

27

Ende uwen Brantoffer metten vleesche ende den bloede opten Altaer des HEEren ws Godts doen.

28

Dat bloet van uwen offer suldy ghieten opten Altaer des HEEren ws Gods, ende dat vlees eten. Siet toe, ende hoort alle dese woorden, die ick v ghebiede, op dattet v wel ga, ende uwen kinderen na v eewelijc, dat ghy gedaen hebt, wat recht ende welbehaghelijck is voor den HEEre uwen Godt.

29

Als de HEEre uwe Godt,^* voor v henen de Heydenen wtroyt, daer ghy henen coemt om in te nemen, ende als ghyse inghenomen hebt. Ende in haren Lande woont,

* Deut. 18.b.9. Iosue. 23.c.12.

30

So wacht v, dat ghy niet inden strick en valt na hen, na dien dat sy verdaen zijn voor v. Ende niet en vraecht na hare Goden, segghende: Ghelijckerwijs dese volcken hare Goden gedient hebben, alsoo wil ick oock^† doen.

† Deut. 18.b.14 Iere. 10.a.2. Esai. 65.a.3.

31

Ghy en sult also niet aen uwen HEEre uwen Godt doen. Want sy hebben haren Goden gedaen, al wat den HEEre eenen grouwel is, ende dat hy haet. Want sy hebben ooc haer Sonen ende Dochteren met vier verbrant, haren Goden.

32

Al wat ick ghebiede, dat suldy houden, dat ghy daer na doet.⁺ Ghy en sult daer niet toe doen, noch daer af doen.

+ Deut. 4.a.2. Iosue. 1.b.7. Prou. 30.a.6.