Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Wt de menichte der weldaden Gods die si ontfanghen hebben, ende wt de oueruloedighe duechden des landts, dat si ontfanghen sullen, soo verwect hyse te onderhouden de gheboden Godts.

1

⁺ SO suldy nv den HEEre uwen Godt lief hebben, ende zijn wetten, zijn seden, zijn rechten, ende zijn gheboden houden uwe leefdage.

+ A vers 1

2

Ende bekent heden, dat welcke uwen kinderen niet en weten, noch ghesien en hebben, te weten, de onderwijsinge des HEEren ws Godts zijn heerlicheyt, daer toe zijn machtige hant, ende wtgereckten arm,

3

Ende zijn teekenen, ende wercken die hy ghedaen heeft onder den Egyptenaren, aen Pharao den Coninck in Egypten, ende aen alle zijn Landt:

4

Ende wat hy aen der Egyptenaren macht ghedaen heeft, aen hare Rossen ende waghenen,^* doen hy dat water des roode zees ouer hen bracht doen si v nae iaechden, ende de HEEre verdedese tot op desen dach.

* Exo. 14.f.27.

5

Ende wat hy v ghedaen heeft, inde woestijne, tot dat ghy in dese plaetse ghecomen zijt.

6

Wat hy^* Dathan ende Abiram gedaen heeft, Eliabs kinderen, die Rubens soon was. Hoe dat de Aerde haren mont op dede, ende verslontse met haren ghesin, ende Hutten, ende met alle haer goet dat si verworuen hadden midden onder al Israel.

* Nu. 16.e.31. 26.b.10. Psa. 106.b.17

7

⁺ Want uwe ooghen hebben de groote wercken des HEEren gesien, die hy gedaen heeft.

+ B vers 7

8

Daer om suldy alle de gheboden houden, die ick v heden ghebiede, op dat ghy ghesterckt wert in te comen, ende dat lant in te nemen, daer ghy henen treckt, dat ghijt in neemt.

9

^† Ende dat ghy lange leuet op den Lande, dat de HEEre uwen vaderen ghesworen heeft hen te gheuen, ende haren sade, een landt daer melck ende honich in vloeyt.

† Exo. 23.d.26.

10

^* Want dat lant daer ghy henen coemt om dat in te nemen, en is niet gelijck Egypten lant, daer ghy wt getrocken zijt, daer ghy uwe saet saeyen, ende selue^† drencken moestet, gelijc eenen koolhof.

* Deut. 8.b.7.

† wateren, oft vochtich maken.

11

Maer het heeft berghen ende beemden, die den Reghen vanden Hemel drencken moet.

12

Op welck Landt de HEERE uwe Godt acht heeft, ende de oogen des HEEren ws Godts sien altoos daer op, vanden beginne des iaers, tot aen dat eynde.

13

Ist dat ghy nv mijn geboden hoort, die ick v heden gebiede, dat ghy den HEEre uwen Godt liefhebt, ende hem dient, van gantscher herten ende van gantscher sielen,

14

So wil ic uwen Lande^† regen geuen tot zijnder tijt, vroeghen regen ende spaden reghen, dat ghy in muecht doen v coren, uwen most, ende uwe olye.

† Deu. 28.b.12. Ioel. 2.e.23. Amo. 4.b.7.

15

Ende wil uwen vee gras geuen op uwen velde, dat ghy etet, ende versaedt wort.

16

⁺ Mer wacht v, dat uwe herte hem niet en laet^* bepraten, dat ghy aftredet, ende dienet andere goden, ende biddetse aen.

+ C vers 16

* ouerreden, becallen.

17

Ende dat dan den toren des HEEren op v vergramme,^† ende sluyte den Hemel toe, datter geenen regen en come, ende de Aerde haer vrucht niet en geue, ende haest vergaet vanden goeden lande, dat de HEEre v ghegeuen heeft.

† Deut. 28.c.23. 3.Reg. 17.a.1. 18.a.1.

18

^* So neemt nv dese woorden ter herten, ende in uwe siele, bindtse tot een teeken op uwen handen, dat si een ghedenckteeken zijn voor uwen ooghen.

* Deut. 6.b.6. Prou. 3.a.1.

19

^† Ende leertse uwen kinderen, dat ghy daer af spreeckt als ghy in v huys sidt, oft opten weghe gaet. Als ghy gaet neder liggen, ende als ghy op staet.

† Deut. 4.b.9.

20

Ende schrijftse aen de posten van uwen huyse, ende aen uwe poorten,

21

Op dat ghy, ende uwe kinderen langhe leeft opten Lande, dat de HEEre uwen vaderen gesworen heeft, hen te gheuen. Also langhe als de dagen vanden Hemel op Aerden dueren.

22

Want ist dat ghy dese gheboden alle houden sult, die ick v ghebiede, dat ghy daer nae doet, dat ghy den HEEre uwen Godt lief hebt, ende wandelt in alle sine wegen, ende hem aenhangt.

23

So sal de HEEre alle dese Volcken voor v henen verdrijuen, dat ghy grooter ende stercker volcken inneemt, dan ghy zijt.

24

^+† Alle plaetse daer uwe voetsole op treedt, sal v zijn. Van de woestijne aen, ende vanden berch Libanon, ende vanden water Phrat, tot aen de wterste zee, sullen uwe

+ D vers 24

† Iosu. 1.a.3.

[p. 70v]

palen zijn.

25

Niemant en sal v moghen wederstaen. Vwe vreesen ende verschricken, sal de HEEre laten comen, ouer alle landen daer ghy in reyst, soo hy v gheseyt heeft.

26

^* Siet, ick legge v heden voor de^† gebenedijnghe, ende de vermaledijnghe.

* Deut. 30.c.15.

† Seghen, ende Vloeck.

27

^‡ De ghebenedijnghe, ist dat ghy ghehoorsaem zijt den geboden des HEEren ws Godts, die welcke ick v heden gebiede.

‡ Deu. 28.a.2.

28

Maer de vermaledijnghe, ist dat ghy niet en zijt ghehoorsaem den gheboden des HEEren ws Godts, ende aftredet vanden weghe, die ick v heden gebiede, dat ghy ander goden nae wandelt die ghy niet en kent.

29

Als de HEEre uwe Godt, v brengt in dat lant, daer ghy in coemt, dat ghijt in neemt, soo suldy de^† ghebenedijnge laten spreken opten berch Grisim, ende de vermaledijnghe opten berch Ebal.

† Deu. 27.b.12. Iosu. 8.g.33.

30

De welcke zijn op dander sijde vander Iordanen, der straten nae, tegen den nederganck der Sonnen, inder Cananiten landt, die opt vlack velt woonen teghen Gilgal ouer, by de Haghen More.

31

Want ghy sult ouer de Iordaen gaen, dat ghy incoemt dat Lant in te nemen, dat v de HEEre uwe Godt gegeuen heeft, dat ghijt inneemt ende daer in woont.

32

^† Soo onthout nv, dat ghy doet nae alle gheboden ende rechten, die ick v heden voor legghe.

† Deut. 4.a.2. Prou. 30.a.6.