Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Hy waerschoutse, dat zijt al der genaden Godts niet haerder cracht toeschrijuen en souden, want van haren tweghen hadden si veel bet verdient, datse Godt alle te samen hadde laten vergaen.

1

⁺ HOort Israel, Ghy sult heden ouer de Iordaen gaen, dat ghy in coemt om in te nemen de volcken,^* die grooter ende stercker zijn dan ghy.

+ A vers 1

* Num. 13.c.28. Deut. 1.d.28.

2

Groote steden, bemuert tot inden Hemel, een groot lanck volck, de kinderen Enakin, die ghy ghekent hebt, vanden welcken ghy oock ghehoort hebt: Wie can teghen de kinderen Enak bestaen?

3

So suldy heden weten, dat de HEEre uwe Godt, voor v henen gaet,^* een verslindende vier. Hy salse verdoen, ende salse onderworpen voor v henen, ende salse verdrijuen, ende te niete doen gheringhe, so de HEEre v gheseyt heeft.

* Deu. 4.d.24. Heb. 12.d.29.

4

^* Wanneerse nv de HEERE uwe Godt, wtghestooten heeft voor v henen, soo en spreeckt niet in uwer herten: De HEEre heeft my hier in geleyt, dit lant in te nemen om mijnder rechtueerdicheyt wille.^† Soo doch de HEEre dese Heydenen voor v henen verdrijft, om haers godtloos wesens wille.

* 1.Re. 20.e.28.

† Leui. 20.d.23.

5

^‡ Want ghy en coemt hier niet in, haer lant in te nemen, om uwer gherechticheyts wille, ende ws oprechtighen herts wille. Maer de HEERE uwe Godt verdrijft dese Heydenen, om haer godtloosen wesens wille, dat hy dat woort houde, dat de HEEre gesworen heeft uwen Vaderen Abraham, Isaac, ende Iacob.

‡ Rom. 11.a.6.

6

⁺ So wetet nv, dat v de HEEre uwe Godt, niet om uwer gerechticheyts wille, dit goede lant gheeft in te nemen, aengesien dat ghy een hertneckich volck zijt.

+ B vers 6

7

Ouerdenct,^* ende en verghetes niet, hoe ghy den HEEre uwen Godt vertoorndet, in de woestijne. Van dien dage aen, doen ghy wt Egypten lant trockt, tot dat ghy gecomen zijt in dese stede, hebdy ongehoorsaem geweest den HEEre.

* Exo. 14.c.11. 16.a.2. 17.a.2.

8

^† Want in Horeb vertoornde ghy den HEEre, alsoo, dat hy van gramschap v verdoen wilde,

† Exod. 32.b.7.

9

Doen ick opten berch ghegaen was, om de steenen Tafelen te ontfangen, de tafelen des verbonts,^* dat de HEEre met v maecte, ende ick veertich daghen ende veertich nachten opten Berch bleeft, ende gheen broot en adt, ende

* Deut. 5.a.2.

[p. 69v]

gheen water en dranck.

10

Ende de HEEre my twee steenen tafelen gaf, met den vingher Godts beschreuen, ende daer op alle woorden,^* Soo de HEEre met v wten viere opten Berch gesproken hadde, inden daghe der vergaderinghen.

* Exod. 19.c.18 Deut. 4.b.12.

11

⁺ Ende nae de veertich daghen ende veertich nachten,^* gaf my de HEEre die twee steenen tafelen des verbonts,

+ C vers 11

* Exo. 31.d.18.

12

Ende sprack tot my:^† Maeckt v op, ende gaet haestelijck nederwaerts van hier, want v volck dat ghy wt Egypten gheleyt hebt, heuet verdoruen. Sy zijn haest afghetreden vanden weghe, die ick hen gheboden heb: Sy hebben hen een ghegoten beeldt ghemaeckt.

† Exod. 32.b.7.

13

Ende de HEERE sprack tot my: Ick sie, dat dit volck, een hertneckich volck is.

14

Laet van my af, dat ickse verniele, ende haren naem wt doe onder den Hemel. Ick wil wt v een stercker ende grooter volck maken, dan dit is.

15

^* Ende als ick my keerde, ende vanden berch ghinck, die met vier bernde, ende de twee Tafelen des verbonts in beyde mijn handen hadde,

* Exod. 32.d.15.

16

Doen sach ick op, ende siet, doen hadt ghy v aenden HEEre uwen Godt besondicht, dat ghy v een ghegoten Calf gemaect hadt, ende haest vanden weghe afghetreden waert, die v de HEEre geboden had.

17

Doen vatte ick beyde de Tafelen, ende worptse wt beyden handen, ende bracse voor uwen oogen.

18

⁺ Ende viel voor den HEEre, gelijck ten yersten,^† veertich dagen ende veertich nachten. Ende en adt gheen broot, ende en dranck gheen water, om alle uwer sonden wille die ghy gedaen hadt doen ghy alsulcken quaet deet voor den HEEre, om hem te vertoornen.

+ D vers 18

† Exo. 24.d.18. 34.d.28.

19

Want ic^† vreesde my voor den tooren ende gramschap, daer de HEERE op v mede vertoornt was, dat hy v verderuen woude.^* Maer de HEEre verhoorde my oock die reyse.

† Mat. 10.c.28.

* Deut. 10.b.10.

20

Oock was de HEEre seer toornich op Aaron, dat hy hem verdoen woude: Maer ick badt oock voor Aaron in dien seluen tijt.

21

Maer uwe sonde.^† Dat Calf, dat ghy ghemaeckt hadt, nam ick, ende verbrandet met vier, ende sloecht in stucken, ende maeldet, tot dattet stof wert. Ende worp dat stof in de Beke die vanden Berghe vloeyt.

† Exo. 32.e.20.

22

Ooc so^* vertoornde ghy den HEEre tot Thabera,^† ende tot Massa, ende byden Lustgrauen.

* Num. 11.a.1.

† Exo. 17.b.6

23

^‡ Ende doen hy v wt Kades Barnea sant, ende sprac: Gaet opwaerts, ende neemt dat lant in, dat ick v ghegeuen hebbe, waert ghy onghehoorsaem des HEEren mont ws Godts, ende en geloofdet aen hem niet, ende en hoordet zijn stemme niet.

‡ Nu. 13.d.31.

24

^* Want ghy zijt den HEEre onghehoorsaem gheweest, alsoo langhe als ick v ghekent heb.

* Act. 7.f.51.

25

⁺ Doen viel ick voor den HEEre veertich dagen ende veertich nachten, die ick daer lach. Want de HEERE seyde, hy woude v verdoen.

+ E vers 25

26

Maer ick badt den HEEre, ende sprac^† HEEre HEEre, en verderft uwe volck, ende uwe erfdeel niet, dat welcke ghy door uwe groote cracht verlost, ende met machtiger hant wt Egypten gheleyt hebt.

† Exo. 34.a.6. Nu. 14.b.13. Iosu. 7.b.8.

27

Weest ghedachtich ws knechts, Abraham, Isaac, ende Iacob. En aensiet niet de herdicheyt, ende dat godtloos wesen, ende sonde van desen volcke,

28

Dat dat lant daer ghy ons wt gheleyt hebt, niet en segghe: De HEEre en condese niet ghebrengen in dat lant, daer hy hen af gheseyt hadde. Ende daerom heeft hyse wtgheleyt, om dat hy op hen gram was, dat hyse dooden soude in de woestijne.

29

^† Want si zijn uwe volck, ende uwe erfdeel, dat welcke ghy met uwer grooter crachten, ende met uwen wtgherecten arm wtgheleyt hebt.

† 1.Reg. 10.a.1.