Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Hy vermaentse datse de Gheboden Gods niet en souden vergheten, maer ghedachtich souden zijn aller weldaden Godts, ende der moeyten die sy gheleden hebben. Ende hoe Godt haer daer af verlost hadde, hy prijst tlandt daer sy in comen souden.

[p. 69r]

1

⁺ ALle gheboden die ick v heden ghebiede, suldy houden, dat ghy daer nae doet, op dat ghy leuet, ende vermenichfuldicht wort, ende incoemt ende inneemt dat lant, dat de HEEre uwen vaderen ghesworen heeft.

+ A vers 1

2

Ende weest ghedachtich alle des weechs, daer de HEEre uwe Godt, v door geleyt heeft, dese veertich iaren, in de woestijne,^* op dat hy v verootmoedichde, ende proefde, dattet kennelijck worde, watter in uwer herten ware, oft ghy zijn gheboden houden sout oft niet.

* Deut. 13.a.3. Iud. 2.d.22. 3.a.1.

3

Hy verootmoedichde v, ende liet v hongher hebben,^† ende spijsde v met Man, dat ghy, ende uwe vaderen noyt ghekent en hadt, op dat hy v condt dede:^* Dat de mensche niet byden broode alleen en leeft, maer by al, dat wt des HEEren mondt gaet.

† Exo. 16.d.16. Num. 11.b.7.

* Mat. 4.a.4. Luc. 4.a.4.

4

Vwe^† cleederen en zijn niet veroudert aen v, Ende uwe voeten en zijn niet gheswollen dese veertich iaren.

† Deut. 29.a.5.

5

⁺ So bekent ghy emmers in uwer herten, dat v de HEEre uwe Godt opgetoghen heeft, ghelijck een man sinen soon optreckt.

+ B vers 5

6

So hout nv de geboden des HEEren ws Godts, dat ghy in zijn weghen wandelt, ende hem vreest.

7

Want de HEEre uwe Godt,^* leydt v in een goet lant, een lant daer Beken, ende Fonteynen, ende Meren in zijn, die aen de Berghen, ende inden Beemden vlieten.

* Deut. 11.b.10

8

Een lant, daer terwe, gherste, wijngaert, vijchboomen, ende Granaet appelen in zijn. Een lant, daer Olijfboomen ende Honich in wast.

9

Een lant daer ghy broots ghenoech te eten hebt, daer oock niet en ghebreeckt.^† Een lant diens steenen ijser zijn, daer ghy metael wten Berghen houwet.

† Iob. 28.a.1.

10

^‡ Ende als ghy geten hebt ende versaet zijt, dat ghy den HEEre uwen Godt looft, voor dat goede lant dat hy v ghegheuen heeft.

‡ Nu. 15.b.18. 1.Cor. 10.d.30 1.Tim. 4.a.3.

11

⁺ So wacht v nv, dat ghy uwen HEEre uwen Godt niet en vergheet, daermede dat ghy zijn gheboden, ende zijn wetten, ende rechten, die ick v heden ghebiede niet en hout:

+ C vers 11

12

Dat, als ghy nv gheten hebt ende versaet zijt, ende schoon huysen timmert, ende daer in woont:

13

Ende uwe Runderen, ende Schapen, ende siluer ende gout, ende al wat ghy hebt, vermenichfuldicht wort.

14

^‡ Dat dan uwe hert hem niet en verheffe, ende verghetet den HEEre uwen Godt, die v wt Egypten lant gheleyt heeft, wten diensthuyse.

‡ Deut. 31.d.20. Pro. 30.a.9.

15

Ende die v gheleyt heeft door dese groote ende veruaerlijcke woestijne, daer vyerige^† Slangen ende Schorpioenen in waren, ende enckel dorheyt, ende gheen water en was.^* Ende liet v water wten herden steenen gaen,

† Num. 21.b.6.

* Exod. 17.d.6. Nu. 20.b.10.

16

Ende spijsde v met Man in de woestijne, van twelcke uwe Vaders niet gheweten en hebben. Op dat hy v verootmoedichde, ende proefde, dat hy v daer nae wel dede.

17

Ghy mocht anders segghen in uwer herten:^† Mijn cracht, ende mijnder handen sterckheyt, hebben my dit vermoghen wt te rechten.

† 1.Reg. 2.b.9.

18

⁺ Maer dat ghy gedachtet aen den HEEre uwen Godt, ^* want hy ist, die v cracht gheeft sulcke machtige daden te doen. Op dat hy hielde zijn verbont, dat hy uwen vaderen ghesworen heeft, ghelijckt heden ten daghe gaet.

+ D vers 18

* Ezec. 36.c.27. Phil. 2.b.13.

19

Maer ist dat ghy uwen HEEre uwen Godt verghetet,^* ende ander Goden nae volcht, ende hen dient, ende aenbidt: So ghetuyge ick heden ouer v, dat ghy geheelijck vergaen sult.

* Deut. 4.d.25.

20

Effen gelijck de Heydenen, die de HEEre verdoet voor uwen aensichte, soo suldy oock vergaen, om dat ghy niet ghehoorsaem en zijt der stemmen des HEEren ws Godts.