Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Als si int lant comen, so en sullen si gheen vrientschap, noch ghemeynscap met dien volcke houden. Maer si sullense wtroeden, ende van haer niet verschricken.

1

⁺ ALs v de HEEre uwe Godt in dat lant brengt, daer ghi in comen sult, om dat selue in te nemen, ende wt wortelt vele volcken voor v, de Hethiten, Girgositen, Amoriten, Cananiten, Pheresiten, Heuiten ende Iebusiten. Seuen volcken die grooter ende stercker zijn dan ghy.

+ A vers 1

2

Ende^† alsse de HEEre uwe God voor v gheeft, dat ghyse slaet, soo suldijse verbannen, dat ghi geen verbont met hen en maeckt, noch hen gonste bewijst.

† Exod. 23.d.32. 34.b.12. Iosue. 23.c.12. 2.Cor. 6.b.14 2.Esd. 13.e.25 3.Reg. 3.a.1. 11.a.1.

3

Ende ghy en sult met hen geen vrientschap maken. Vwe dochteren en sult ghy haren sonen niet gheuen. Ende hare dochteren en suldy uwen sonen niet nemen.

4

Want^* si sullen uwe sonen my afuallich maken, dat si den anderen goden dienen. Soo sal dan des HEEren toren vergrammen op v, ende v gheringhe vernielen.

* Num. 25.a.1.

5

Maer aldus suldy met hen doen,^* haer Altaren suldy verdestrueren, haer Columnen breken, haer Hagen afhouwen, ende haer Afgoden met vier verbernen.

* Exod. 34.b.13 Num. 33.e.52.

6

^+† Want ghy zijt een heylich volck den HEEre uwen Gode. V heeft de HEEre uwe God^* vercoren tot een volck des eyghendoms, wt allen volcken, die op Aerden zijn.

+ B vers 6

† Deut. 14.a.2. 26.d.18.

* 1.Pet. 2.b.9. Exod. 19.a.5.

7

Niet en heeft v de HEEre aenghenomen ende v vercoren, dat uwer meer waer dan alle volcken. Want ghy zijt dat minste onder alle volcken.

8

Maer dat hy v lief ghehadt heeft, ende dat hy sinen eedt hielde,^* die hy uwen Vaderen ghesworen heeft. Daerom heeft hy v wtgheleyt met machtigher hant, ende heeft v verlost vanden huyse des dienst, wter hant Pharaos, des Conincks in Egipten.

* Gene. 22.c.15.

9

So sult ghy nv weten,^* dat de HEEre uwe God een God is, een ghetrouwe God, die dat verbont, ende bermherticheyt houdt, den ghenen die hem lief hebben, ende zijn gheboden houden, in duysent leden.

* Exod. 20.a.5. 34.a.7.

10

Ende betaelt den ghenen, die hem haten, voor zijn aenghesichte, Dat hijse te niete doe, ende en versuymet niet, dat hy den ghenen verghelde voor zijn aenghesichte, die hem haten.

11

Soo onthout nv de gheboden ende Wetten ende Rechten, die ick v heden ghebiede, dat ghy daer nae doet.

12

^+* Ende als ghy dese Rechten hoort, ende houtse ende doetse, soo sal de HEEre uwe God oock houden dat verbont ende bermherticheyt, die hy uwen Vaderen gesworen heeft,

+ C vers 12

* Exod. 23.d.25. Leuit. 26.a.1. Deut. 28.a.1.

13

Ende sal v lief hebben, ende ghebenedijen, ende vermeerderen. Ende sal de vrucht ws lichaems gebenedijen, ende de vrucht ws lants, uwe Coren, most ende olie. De vruchten uwer koeyen, ende de vruchten uwer Schapen op den lande, dat hy uwen Vaderen ghesworen heeft, v te gheuen.

14

Ghebenedijt suldy wesen bouen alle volcken.^* Daer en sal niemandt onder v onuruchtbaer wesen, noch onder uwe Vee.

* Deut. 23.d.26.

15

De HEEre sal van v nemen, alle crancheyt, ende en sal v gheen quade siecten der Egiptenaren oplegghen,^* die ghi beuonden hebt, ende salse allen uwen Haters oplegghen.

* Exod. 9.a.2.

16

⁺ Ghy sult alle volcken verslinden, die v de HEERE uwe Godt gheuen sal. Ghy en sultse niet sparen, ende haren Goden niet dienen, want dat soude v eenen strick zijn.

+ D vers 16

17

Ist dat ghy in uwer herten segghen sult: Deses volcx is meer dan ic ben, hoe can icse verdrijuen?

18

^† So en vreest v niet voor hen. Ghedenct wat de HEEre uwe Godt Pharao, ende allen den Egiptenaren gedaen heeft,

† Deut. 20.a.3. Iosue. 8.a.1. Luc. 12.a.4.

19

Door groote versoeckingen, die ghy met ooghen ghesien hebt, ende door teekenen ende wonderen. Door een machtighe hant, ende wtghestrecten arm, daer v de HEEre uwe God mede wt leyde. Alsoo sal de HEERE uwe God, allen volcken doen, daer ghy v voor vreest.

20

^* Daer toe sal de HEEre uwe Godt Horselen onder hen seynden, tot dattet vernielt worde watter ouerblijft, ende hem voor v verbercht.

* Exod. 23.d.28 33.a.2. Iosue. 24.c.12

21

En laet v voor hen niet grouwelen. Want de HEEre uwe Godt is onder v, de groote ende vreesselijcke Godt.

22

⁺ Hy de HEEre uwe God sal dese lieden wtroeyen voor v, die een na den anderen.^† Ghy en contse niet haestelijck te niete gedoen, op dat de dieren opten velde teghen v niet v niet en vermeerderen.

+ E vers 22

† Exod. 23.d.28

23

De HEEre uwe Godt, salse voor v gheuen, ende salse met groote slagen verslaen tot dat hijse verniele.

24

^† Ende sal v hare Coninghen in uwe handen gheuen, ende sult haren naem te niete doen, onder den Hemel. Niemandt en sal v wederstaen, tot dat ghyse vernielt.

† Iosu. 10. 11. 12.

25

De Beelden van haren Goden suldy met vier verbernen,^* Ende en sult niet begheeren van dat siluer oft gout, dat daer aen is, oft tot v nemen, dat ghy v daer in niet en verstrict. Want sulcx is den HEERE uwen Gode eenen grouwel.

* Deut. 13.c.17. Iosue. 7.a.1. 2.Macha. 12.g.40.

26

Daerom en suldy den grouwel in v huys niet brenghen, op dat ghy niet verbannen en wordt, ghelijck dat selue is. Maer ghy sult een walghinghe ende grouwel daer aen hebben, want het is verbannen.