Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hier vertelt hy haer Godts insettinghen, statuten ende Ceremonien. Ende vermaent haer die te onderhouden, ende haren kinderen die oock te leeren.

1

⁺ MAer dit zijn de wetten,^* ende gheboden ende rechten, die de HEEre uwe God gheboden heeft, dat ghijse leeren ende doen sout, in dat lant daer ghi henen trect, om dat selue in te nemen.

+ A vers 1

* Deut. 4.a.5. 5.d.31. 10.c.12.

2

Dat ghy den HEERE uwen Godt vreest, ende behout alle zijn rechten ende gheboden, die ick v ghebiede, ghy ende uwe kinderen, ende ws kints kinderen, al v leefdage, op dat ghy langhe leuet.

3

Israel ghy sult hooren ende behouden dat ghijt doet, dattet v wel gae, ende seer vermeerdert wort, soo v de HEEre uwer vaderen God geseyt heeft, een Lant daer Melck ende Honich in vloeyt.

4

⁺ Hoort Israel, de HEEre^* onse God is een eenich HEEre.

+ B vers 4

* Deut. 4.f.35. Mat. 22.d.36. Mar. 12.c.29. Luc. 10.c.27.

5

Ende ghy sult den HEEre uwen God lief hebben, van gantscher herten, van gantscher sielen, van alle vermogen.

6

Ende dese woorden die ick v heden ghebiede, suldy ter herten nemen,

7

Ende uwen kinderen^† scherpen, ende daer af spreken, als ghi in v huys sidt, oft opten weghe gaet, als ghy v nederlegt, oft op staet,

† Dat is altoos drijuen ende oeffenen.

8

Ende sultse binden, tot een teeken op uwe hant, ende sullen v een ghedenckteeken zijn voor uwen ooghen,

9

Ende sultse op de posten van uwen huyse schrijuen, ende aen de poorte.

10

^* Als v nv de HEEre uwe Godt in dat lant brenghen sal, dat hy uwen Vaderen, Abraham, Isaac, ende Iacob gesworen heeft, v te gheuen, groote ende fijne steden die ghy niet ghetimmert en hebt,

* Iosu. 24.c.13.

11

⁺ Ende huysen, vol van allen goede, die ghy niet geuult en hebt, ende wtgehouwen fonteynen, die ghi niet wtghehouwen en hebt, ende wijnbergen ende Olijfberghen, die ghy niet gheplant en hebt,^* dat ghy eet, ende sadt wordt.

+ C vers 11

* Deut. 32.b.15.

12

Soo wacht v, dat ghy niet en vergheet des HEEren,^† die v wt Egipten lant, wt den diensthuyse gheleyt heeft.

† Deut. 4.c.20.

13

Maer sult^‡ den HEEre uwen God vreesen, ende hem dienen, Ende by sinen Naem sweeren.

‡ Deut. 10.d.20. Mat. 4.b.10. Luc. 4.a.8.

14

Ende^* en sult gheen ander goden nae volgen, der volcken die rontsom v zijn.

* Exo. 32.a.4. Num. 25.a.1.

15

Want de HEEre uwe God, is een ijuerich Godt onder v. Dat den tooren des HEEREN ws Gods op v niet en vergramme, ende v verdoe vander Aerden.

16

^* Ghy en sult den HEEre uwen God niet tempteren,^† gelijc ghy hem tempteerdet te Massa.

* Mat. 4.a.7. Luc. 4.b.12.

† Exo. 17.b.7. Num. 20.b.13.

17

Maer ghy sult de geboden ws HEEren ws Gods houden, ende zijn getuychenissen, ende zijn rechten, die hi geboden heeft,

18

Dat ghijt doet, wat recht ende goet is, voor de oogen des HEEren. Op dattet v wel gae, ende ingaet, ende inneemt dat goede lant, dat de HEEre gesworen heeft uwen vaderen,

19

Dat hy veriage alle uwe vianden voor v, so de HEEre gesproken heeft.

20

^+* Als v nv dijn sone heden oft morgen vragen sal, ende segghen: Wat zijn dat voor getuychenissen geboden ende rechten, die v de HEEre onse God geboden heeft?

+ D vers 20

* Deut. 4.b.9.

21

Dan suldy uwen sone segghen: Wy waren Pharaos knechten in Egipten, ende de HEEre leyde ons wt Egipten, met machtiger hant.

22

Ende de HEEre dede groote ende quade teekenen, ende wonder ouer Egipten, ende Pharao, ende alle sinen huyse, voor onsen oogen.

23

Ende leyde ons van daer, op dat hy ons inleyde, ende gaue ons dat lant, dat hy onsen vaderen ghesworen hadde.

24

Ende de HEEre heeft ons gheboden te doen, nae alle dese rechten, dat wy den HEEre onsen God vreesen, op dattet ons wel gae, alle onse leefdage, gelijct gaet heden sdaechs.

25

Ende

[p. 68v]

het sal onse gherechticheyt zijn voor den HEEre onsen God. Ist dat wy houden ende doen alle dese gheboden, so hy ons gheboden heeft.