Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Og de Coninck van Basan werdt verslaghen, de landen werden inghenomen ende verdoruen, van Ruben, Gad, ende den haluen stamme Manasse hier aen dese zijde des Iordaens, Iosua werdt in Moses plaetse gheordineert.

1

⁺ ENde wy keerden ons, ende trocken opwaerts den wech tot Basan.^† Ende Og de Coninck tot Basan, trock wt ons teghen met alle zijnen volcke, om te strijden by Edri.

+ A vers 1

† Num. 21.e.33. Deut. 29.b.7.

2

Maer de HEEre sprack tot my: En vreest v niet voor hem. Want ick heb hem, ende alle zijn volck, met sinen lande, in uwen handen ghegeuen. Ende ghy sult met hem doen,^† ghelijc ghy met Sihon den Coninc der Amoriten ghedaen hebt, die te Hesbon woonde.

† Deut. 2.f.31.

3

Alsoo gaf de HEEre onse God, oock den Coninck Og tot Basan, in onsen handen, met alle sinen volcke, dat wy hem sloeghen, tot datter niet van hem ouer en bleef.

4

Doen wonnen wy tot dier tijt alle zijn steden, ende daer en was gheen stadt, die wy hen niet en namen. Tsestich steden, de geheele Contreye Argob, inden Conincrijcke Og, tot Basan.

5

Alle dese steden waren vast, met hooghen mueren, poorten ende grendelen, behaluen seer vele ander vlecken sonder mueren,

6

⁺ Ende verbandese, ghelijc als wy met Sihon den Coninck te Hesbon deden. Alle steden verbanden wy, beyde met mannen, wijuen, ende kinderen.

+ B vers 6

7

Maer alle dat Vee ende roof der steden, roofden wy voor ons.

8

Alsoo namen wy dat lant tot dier tijt, wt der handt van twee Coninghen der Amoriten, op gheen zijde der Iordanen, van de Beke by Arnon aen, tot aenden Berch Hermon,

9

Den welcken de Sidoniten,^† Sireon heeten. Maer de Amoriten heeten hem Senir.

† Psal. 29.a.6.

10

Alle steden op den slechten velde, ende dat gheheele Gilead, ende dat gheheele Basan, tot Salcha toe, ende Edrei, de steden des Conincrijcx Og, tot Basan.

11

Want de Coninc Og tot Basan was noch alleen ouer vanden Ruesen. Siet, zijn ijseren bedde is hier tot Rabath, der kinderen Ammon, neghen ellen lanck, ende vier ellen breet, na eens mans ellenboge.

12

Alsulcken lant namen wy in, tot dier seluer tijt, van Aroar aen, die aen de Beke by Arnon leyt.^† Ende ick gaf dat half gheberchte Gilead met sinen steden, den Rubeniten, ende Gadditen.

† Num. 32.f.33. Deut. 29.b.8. Iosue. 12.a.2. 22.a.1.

13

Maer dat ouerblijuende van Gilead, ende dat gantsce Basan des Conincrijcx Og, gaf ic den haluen stamme Manasse. De gantsche Contreye Argob, tot den gantschen Basan, dat heet der Ruesen lant.

14

⁺ Iair Manasses soon nam de gantsche Contreye Argob, tot aen de palen Gessuri, ende Maachati. Ende hiet dat Basan nae sinen naem, Hauoth Iair, tot opten dach van heden.

+ C vers 14

15

Maer Machir gaf ick Gilead.

16

Ende den Rubeniten ende den Gadditen, gaf ick een deel van Gilead, tot aen de Beke by Arnon, midden inde Beke, die de pale is, ende totter Beken Iabock, die de pale is der kinderen Ammon,

17

Daer toe dat velt, ende de Iordaen (die de pale is) van Cinereth aen, tot aen de zee, aenden velde, te weten, de soute zee beneden aenden Berch Pisga, teghent Oosten.

18

^* Ende gheboot v ter seluer tijt, ende sprack: De HEEre uwe God heeft v dit lant ghegheuen in te nemen. So trect nv gheruster voor uwen broederen den kinderen Israels henen, wat strijdtbaer is.

* Num. 32.d.20

19

Alleen uwe Wijuen, ende Kinderen, ende uwe Vee (want ick weet dat ghy veel vees hebt) latet in uwe steden blijuen, die ick v ghegheuen hebbe,

20

⁺ Tot dat de HEEre uwe Godt, v broederen oock tot ruste brengt, ghelijck v, dat sy ooc dat lant innemen, dat hen de HEEre uwe Godt gheuen sal, op gheen zijde vander Iordane. So sult ghy dan weder keeren tot uwer besittingen, die ic v ghegheuen hebbe.

+ D vers 20

21

^* Ende ick gheboot Iosua ter seluer tijt, ende sprack: Vwe ooghen hebben gesien, al wat de HEEre uwe Godt desen twee Coninghen ghedaen heeft. Also sal de HEEre ooc alle Conincrijcken doen, daer ghy henen trect.

* Num. 27.c.18

22

En vreest v niet voor hen, want de HEEre uwe Godt, strijdt voor v.

23

Ende ick badt den HEEre ter seluer tijt, ende sprac:

24

HEEre HEEre, ghy hebt begonst te bewijsen uwen knecht, uwe heerlijcheyt ende uwe stercke handt. Want waer isser een God, inden Hemel ende Aerden, diet uwen wercken ende uwe macht soude connen nae ghedoen?

25

Laet my gaen, ende sien dat goede lant, op gheen zijde vander Iordane, dit goede gheberchte, ende den Libanon.

26

^+† Maer de HEEre was toornich op my om uwen wille, ende en hoorde my niet. Maer sprack tot my: Latet genoech zijn, en segt my daer niet meer af.

+ E vers 26

† Deut. 1.f.37. 4.c.21.

27

^† Climt op de hoochte des Berchs Pisga, ende heft uwe ooghen op, teghen het Westen, ende teghen het Noorden, ende teghen het Suyden, ende tegen het Oosten, ende besiettet met ooghen, want ghy en sult ouer dese Iordane niet gaen.

† Num. 27.c.12.

28

Ende ghebiet Iosua, dat hy getroost ende onuersaecht sy: Want hi sal ouer de Iordaen gaen, voor dat volck,^† ende sal hen dat lant wt deylen, dat ghy sien sult.

† Nu. 34.d.17. Iosue. 14.a.1.

29

Aldus bleuen wy in dat dal, teghen dat huys Peor.