Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Dat si teghen Seir de Moabiten ende Ammoniten niet en souden strijden. Maer Sihon der Amoriten Coninck, wert in haer hant ghegheuen.

1

⁺ DOen keerden wy ons, ende trocken wter woestijnen,^* op de strate totter Rooder zee, soo de HEEre tot

+ A vers 1

* Num. 21.a.4.

[p. 66r]

my seyde,

2

Ende omtrocken dat gheberchte Seir eenen langhen tijt.

3

Ende de HEEre sprack tot my: Ghy hebt dit gheberchte nv ghenoech om ghetoghen, keert v noortwaert.^† Ende ghebiet den volcke, ende segt: Ghy sult door de palen uwer broederen, der kinderen Esau trecken, die te Seir woonen, ende si sullen hen voor v vreesen:

† Num. 20.c.17

4

Maer wacht v neerstelijck, dat ghyse niet en^† becrijcht. Want ic en sal v van haren lande niet eenen voetbreet gheuen.^* Want dat gheberchte Seir heb ick Esaus kinderen te besitten ghegheuen.

† Bestrijt, beuecht.

* Gene. 36.a.8 Malac. 1.a.3. Iosu. 24.a.4

5

Ghy sult spijse van hen om gelt coopen, om te eten: Ende sult water van hen coopen om gelt, om te drincken.

6

Want de HEEre uwe Godt, heeft v ghebenedijt, in alle wercken uwer handen. Hy heeft v reysen ter herten ghenomen door dese groote woestijne. Ende de HEEre uwe God, is veertich iaer by v geweest, dat v niet ghebroken en heeft.

7

⁺ Doen wy nv door onse broederen, Esaus kinderen ghetrocken waren, die opt gheberchte Seir woonden, opten weghe des velts, van Elath, ende EzeonGaber, keerden wy ons, ende ghinghen door den wech der woestijnen der Moabiten.

+ B vers 7

8

Doen sprac de HEEre tot my:^† Ghy en sult den Moabiten niet lastich wesen, noch hen bestrijden: Want ic en sal v van haer lant niet gheuen te besitten.^† Want ic hebt Ar, Lots kinderen ghegheuen te besitten.

† Iudic. 3.d.30.

† Genes. 13.c.11.

9

De^† Emim hebben in voortijden daer in ghewoont, dat was een groot, sterck, ende lanck volck, ghelijck de Enakim,

† Gene. 14.a.5.

10

Men hieltse oock voor Ruesen, ghelijc als de Enakim. Ende de Moabiten hietense oock Emim.

11

Oock soo woonden in voortijden, in Seir,^* de Horiten, ende Esaus kinderen verdreuense, ende dedense te niete voor hen, ende woonden in haer steden. Ghelijck als Israel dede den Lande zijnder besittingen, dat hem de HEERE gaf.

* Gene. 36.d.20

12

⁺ Soo maect v nv op, ende treckt door de beke Sared: Ende wy trocken daer door.

+ C vers 12

13

Maer den tijt die wy van KadesBarnea trocken, tot dat wy quamen door de beke Sared, was achtendertich iaer, op dat alle crijschlieden inden Leger storuen,^* soo hen de HEEre gesworen had.

* Num. 14.c.20 26.g.65.

14

Daer toe was oock de handt des HEEREN teghen hen, dat sy verginghen wten legher, tot dat haerder een eynde wert.

15

Ende doen alle der crijschlieden een eynde was, dat si storuen onder dat volc,

16

Sprac de HEEre met my, seggende:

17

Ghy sult heden door der Moabiten palen trecken, by Ar,

18

Ende sult nae by comen teghen de kinderen Ammon,^* die en sult ghi niet lastich wesen, noch bestrijden. Want ick en wil v niet te besitten geuen vanden Lande der kinderen Ammon, want ick hebt Loths kinderen gegeuen te besitten.

* Iudi. 11.f.32.

19

Het is oock gheacht voor der Ruesen lant, ende daer hebben oock in voortijden Ruesen in ghewoont. Ende de Ammoniten heetense Sammesumim:

20

⁺ Dat was een groot sterck ende lanck volck, ghelijck de Enakim. Ende de HEEre verdedese voor hen, ende lietse de selue besitten, dat si daer in haer plaetse woonden:

+ D vers 20

21

^† Ghelijck als hy ghedaen hadde met Esaus kinderen, die opt gheberchte Seir woonden, als hy de Horiten voor hen te niete dede, ende lietse die seluer besitten, dat si daer in haer plaetse woonden, tot op desen dach.

† Gene. 36.d.20

22

Ende de Caphthorim, trocken wt Caphthor, ende verdeden de Auim, die te Hazerim woonden tot Gasa toe, ende woonden in hare plaetse aldaer.

23

Maect v op, ende trect wt, ende gaet ouer de beke by Arnon. Siet, ick hebbe Sihon den Coninck der Amoriten tot Hesbon in uwen handen ghegeuen, met sinen Lande: Beghint in te nemen, ende strijdet teghen hem.

24

Heden op desen dach wil ick beghinnen, dat hen voor v vreesen ende verscricken sullen, alle volcken onder alle Hemelen, dat hen, als sy van v hooren, banghe ende wee worden sal, van uwer toecoemste.

25

^+* Doe sant ick boden wter woestijnen van Oostenwaert, tot Sihon den Coninc tot Hesbon, met vreedsame woorden, ende liet hem seggen:

+ E vers 25

* Num. 21.c.21. Deut. 20.b.10. Iudi. 11.c.19.

26

Ick wil door v Lant trecken, ende waer de strate henen gaet, wil ick gaen. Ick en wil noch ter rechter noch ter slincker hant wtwijcken.

27

Spijse suldy my om ghelt vercoopen, dat ick ete, ende water suldy my om gelt gheuen, dat ick drincke.^† Ick en wil maer te voet henen door gaen,

† Num. 20.c.17 1.mac. 5.e.48.

28

Ghelijck my de kinderen Esau ghedaen hebben, die te Seir woonen, ende de Moabiten, die te Ar woonen, tot dat ick come ouer de Iordaen, int Lant dat ons de HEERE onse Godt gheuen sal.

29

Maer Sihon, de Coninck tot Hesbon, en wilde ons niet door laten trecken. Want de HEEre uwe Godt, verherde sinen moet, ende verstocte hem zijn herte, op dat hy hem in uwen handen gaue, gelijct nv aenden dach is.

30

⁺ Ende de HEEre sprac tot my: Siet, ick hebbe begost te gheuen voor v, Sihon met sinen Lande, begint in te nemen, ende te besitten zijn Lant.

+ F vers 30

31

Ende^† Sihon trock wt teghen ons, met allen sinen volcke totten strijdt nae Iahza.

† Num. 21.d.23. Deut. 29.b.7.

32

Maer de HEERE onse Godt, gaf hem voor ons, dat wy hem sloegen met sinen Kinderen, ende alle sinen volcke.

33

Doen wonnen wy tot dier tijt, alle zijne Steden, ende verbanden alle Steden, beyde Mannen, Wijuen ende Kinderen, ende en lieten niemandt ouer blijuen.

34

Behaluen dat Vee roofden wy voor ons. Ende den anderen roof der steden, die wi wonnen,

35

Van Aroar aen, die aenden Oeuer der beken by Arnon leyt, ende van dier Stadt aent water Gilead toe. Daer en was gheen Stadt, die haer voor ons bescutten conde. De HEEre onse Godt, gaf ons alle dinc voor ons.

36

^† Behaluen aen dat Landt der kinderen Ammon en

† Nu. 21.d.24.

[p. 66v]

quaemdy niet, noch tot al, dat aen de Beke Iaboc was, noch totten steden opten gheberchte, noch tot alle dat, dat ons de HEEre onse Godt verboden hadde.